49
ཡ༌ཀོབ༌བི༌ བུ༌ཚ༌གུན༌ལ༌ སྟིང༌ཇུག༌གི༌ ཅིན༌ལབས༌།
1 ཡ༌ཀོབ༌བི༌ ཁོ༌རང༌ངི༌ བུ༌ཚ༌གུན༌ བོད༌ཏེ༌ ཟེརས༌, "ངའ༌ ཁོར༌ཏེ༌ དུགས༌ཤིག༌, ངའེ༌ ཁྱོ༌རང༌གུན༌ ཉམ༌པོ༌ སྟིང༌ཞིན༌ བྱུང༌ཅེས༌ཅན༌གུན༌ ཤད༌ཨིན༌།
2 "ཡ༌ཀོབ༌བི༌ བུ༌ཚ༌གུན༌, ཛོམས༌ཏེ༌ ཉོན༌,
ཁྱོ༌ཞ༌གུན༌ནི༌ ཨ༌བ༌ ཨིས༌ར༌ཨེལ༌ལ༌ ཉོན༌།"
3 "རའུ༌བེན༌ ཁྱོ༌རང༌ ངའེ༌ བུ༌ཚ༌ ཏང༌པོ༌,
ངའེ༌ ཤུགས༌, ངའེ༌ ཁྱོག༌ཏོང༌ངི༌ ཤུགས༌སི༌ སྟགས༌ ཏང༌པོ༌,
ཚང༌མའེ༌སང༌ སྤལ༌ཅན༌ དང༌ སྟོབས༌ཅན༌ ཨིན༌།
4 ཨིན༌ནའང༌ ཁྱོ༌རང༌ ཆུ༌ལོག༌ ཙོགས༌ལ༌ རང༌སེམས༌ཅུན༌ མ༌ཉན༌ཁན༌,
ཏ༌ནེ༌ཕར༌ལ༌ ཁྱོ༌རང༌ ཚང༌མའེ༌སང༌ ཁག༌ཅན༌ མི༌ལུས༌
ཅིའ༌ཟེར༌ན༌ ཁྱོ༌རང༌ ངའེ༌ ན༌མ༌ ཉམ༌པོ༌ བྲེལ༌ཏེ༌
ངའེ༌ མལ༌ཙ༌ ཚི༌ཏུ༌ གྱུར༌ཅུགས༌ཏེ༌ ཨིན༌ནོག༌།"
5 "སི༌མི༌འོན༌ དང༌ ལི༌ཝི༌ སྤུན༌ལ༌ ཨིན༌ནོག༌།
ཁོང༌གུན༌ནི༌ ཁོ༌རང༌གུན༌ནི༌ ར༌འི༌ ནོད༌སྐྱལ༌ ཏང༌ཅེས༌ལ༌ ཀོལ༌ལ༌ནོག༌།
6 ང༌ ཁོང༌གུན༌ནི༌ ཚོགས༌དུའི༌ ནང༌ང༌ ཛོམས༌ཏེ༌
ཁོང༌ངི༌ ཐབས༌ལྡིངས༌གུན༌ནི༌ ནང༌ང༌ གྲེས༌ ཅུག༌ག༌ མ༌ཛད༌
ཅིའ༌ཟེར༌ན༌ ཁོང༌གུན༌ནི༌ སྲོའེ༌ ནང༌ང༌ མི༌གུན༌ སདས༌
ཡང༌ ལང༌ཏོའེ༌ རྐང༌པའེ༌ གྱུས༌པ༌ ཅད༌ཏེ༌ ལྟན༌མོ༌ ལྟས༌།
7 ཇིགས༌ནང༌ཅན༌, ངན༌པ༌ དང༌ རྩོག༌པོ༌ ཁོང༌གུན༌ནི༌ སྲོའ༌ ངན༌ ཕོག༌ཤིག༌།
ཁོང༌གུན༌ནི༌ མིར༌གྱུད༌གུན༌ ཛོམས༌ཏེ༌ མ༌ལུས༌ས༌
ཨིས༌ར༌ཨེལ༌ལི༌ ས༌ཆ༌ གང༌པོའེ༌ ནང༌ང༌ ཡན༌ཏེ༌ ཆེན༌།"
8 "ཡ༌ཧུ༌དཱ༌ ཁྱོ༌རང༌ངི༌ གྲ༌འོ༌གུན༌ལ༌ ཕམ༌ཀལ༌ཨིན༌,
ཁྱོ༌རང༌ངི༌ སྤུན༌ལ༌གུན༌ནི༌ ཁྱོ༌རང༌ང༌ སྟོད༌ཨིན༌
ཡང༌ ཁོང༌གུན༌ནི༌ ཁྱོ༌རང༌ངི༌ དུན༌ལ༌ གོ༌ སྒུ༌ཨིན༌
9 ངའེ༌ བུ༌ཚ༌ ཡ༌ཧུ༌དཱ༌ ཁྱོ༌རང༌ སིང༌གེ༌ ཕྲུ༌གུ༌ གྲོད༌པ༌ གྲངས༌ཏེ༌
ཚངས༌སི༌ ནང༌ང༌ ལོགས༌ཏེ༌ ཡོང༌ཁན༌ ཙོགས༌ ཨིན༌ནོག༌།
ཡང༌ སིང༌གེ༌ རྐང༌ལག༌ རྐྱངས༌ཏེ༌ ཉིད༌ལོགས༌ཏེ༌ ཡོད༌ཁན༌ ཙོགས༌,
སུའི༌ ཁོའ༌ ཉིད༌ཚད༌ཅེས༌སི༌ ཧམ༌པ༌ ཅོ༌ཨིན༌?
10 ཝང༌སྲུལ༌པ༌ ཏུས༌གྱུན༌ ཡ༌ཧུ༌དཱའེ༌ གྱུད༌ནེ༌ ཡོང༌ཨིན༌།
གྱལ༌པོའེ༌ ཆག༌བེར༌, ཝང༌ཆ༌ ཡོད༌ཁན༌ནི༌ སྟགས༌པོ༌
ཁོང༌གུན༌ནི༌ ལག༌པའེ༌ ནང༌ང༌ ཐམས༌ཏེ༌ བོར༌ཨིན༌
ནམ༌ཚག༌པ༌ ཏེ༌བོའེ༌ དག༌པོ༌བོ༌ མི༌ཡོང༌།
ཡང༌ ཁོང༌ང༌ ཇིག༌རྟེན༌པ༌ ཚང༌མའེ༌ རྩི༌ཝ༌ ཅོ༌ཨིན༌།
11 ཁོའེ༌ ཁོ༌རང༌ངི༌ བུང༌བུ༌ རྒུན༌ཚས༌སི༌ ནང༌ང༌,
ཡང༌ ཀུ༌རུག༌ རྒུན༌ནི༌ ལྕང༌མ༌ གྱལ༌ཤོག༌ག༌ ཏག༌ཨིན༌།
ཁོའེ༌ ཁོ༌རང༌ངི༌ ཀོས༌ལག༌གུན༌ རྒུན༌ཆང༌ངི༌ ནང༌ང༌
ཡང༌ ཀོས༌པོ༌ རྒུན༌ཆང༌ མར༌པོ༌ ཉམ༌པོ༌ ཁྲུ༌ཨིན༌།
12 ཁོའེ༌ མིག༌གུན༌ རྒུན༌ཆང༌ངི༌ སང༌ མང༌ང༌ ནག༌པོ༌ ཡང༌
ཁོའེ༌ སོ༌གུན༌ འོ༌མའེ༌ སང༌ མང༌ང༌ ཀར༌པོ༌ ཡོང༌ཨིན༌།"
13 "ཟེ༌བུ༌ལོན༌ ཚོའེ༌ ཐའ༌མ༌ ཚུགས༌ཏེ༌
གྲུ༌ཟིང༌གུན༌ བོར༌སའེ༌ ཇིགས༌ནང༌ མེད༌ཁན༌ནི༌ ནས༌ས༌ གྱུར༌ཨིན༌།
ཁོའེ༌ ས༌ཆའ༌ སི༌དཱོན༌ ཚག༌པ༌ གྱས༌ཨིན༌།"
14 "ཨིས༌ས༌ཁར༌ མ༌ ཤེད༌ཅན༌ བུང༌བུ༌,
རྒལ༌གུན༌ནི༌ པར༌ལ༌ སའེ༌ཀ༌ ངལ༌ཚོས༌ཏེ༌ དུག༌ཁན༌།
15 ངལ༌ཚོ༌སའེ༌ ས༌ཆ༌བོ༌ གྱལ༌ལ༌ ཡང༌ ལྡེ༌མོ༌ ཐོང༌ཏེ༌
ཁོའེ༌ ཁུ༌རུ༌ ཁུར༌ཅེས༌ལ༌ ཁོ༌རང༌ངི༌ སྤུང༌པ༌ སྒུས༌ ཡང༌ ཚེ༌ཡོག༌ གྱུར༌ཅེས༌ལ༌ ཐད༌།"
16 "ཨིས༌ར༌ཨེལ༌ལི༌ ཞན༌ཡང༌ མི༌སྡེ༌གུན༌ ཙོགས༌ལ༌
གྲེན༌ནི༌ ཁོ༌རང༌ངི༌ མི༌གུན༌ནི༌ཀ༌ ཝང༌སྲུལ༌ ཨིན༌།"
17 གྲེན༌ གྱ༌ལམ༌མི༌ ཐའ༌མ༌ ཡོད༌ཁན༌ནི༌ རུལ༌,
ལམ༌མི༌ ཐའ༌མའེ༌ དུག༌རུལ༌ ཙོགས༌,
ཀ༌བོའེ༌ རྟའེ༌ རྐང༌པའེ༌ མོང༌ལོའ༌ ཐམས༌ཏེ༌
རྟའེ༌ཀ༌ ཞོན༌ཁན༌བོ༌ གྱབ༌ལོག༌ག༌ གྱེལ༌ཅུག༌ཨིན༌།"
18 "ཡ༌ཝ༌, ཉེ༌རང༌ངི༌ ཐར༌པའེ༌ ཕིའ༌ ངའ༌ སྲུངས༌ཏེ༌ ཡོད༌།"
19 "ཅག༌པའེ༌ སྡེ༌ གཱད༌ལ༌ སྤུང༌གོལ༌ ཅོ༌ཨིན༌།
ཨིན༌ནའང༌ ཁོའེ༌ ཁོང༌གུན༌ནི༌ གྱབ༌གལ༌ལ༌ སྤུང༌གོལ༌ ཅོའ༌ཅིག༌
ཁོང༌གུན༌ ཤོར༌ཨིན༌ ཨང༌ ཁོའེ༌ ཏེད༌ཏེ༌ ཁྱེར༌ཨིན༌།"
20 "ཨ༌ཤེར༌ དུག༌སའེ༌ ས༌ཆའེ༌ཀ༌ སྟོན༌ཐོག༌ གྱལ༌ལ༌ སྨིན༌ཨིན༌།
གྱལ༌པོ༌ ཟའ༌ཁན༌ནི༌ ཁར༌ཇི༌ ཞིམ༌པོ༌ ཁོའེ༌ རིག༌ཨིན༌།"
21 "ནཕ༌ཐལ༌ལི༌ རང༌ཝང༌ཅན༌ནི༌ ཤ༌ཝ༌ ཙོགས༌,
ཀ༌བོའ༌ མ༌ ལྡེ༌མོ༌ ཕྲུ༌གུ༌གུན༌ སྐྱེའ༌ནོག༌།"
22 "ཡོ༌སེབ༌ ཁ༌ཟས༌ ཆགས༌ཁན༌ རྒུན༌ནི༌ ལྕང༌མ༌ ཟང༌པོ༌,
ཁྱོ༌རང༌ངི༌ པུར༌གྱུད༌གུན༌ ཆུ༌མིག༌གི༌ དུན༌ལ༌ ཡོད༌ཁན༌ནི༌ རྒུན༌ནི༌ ལྕང༌མ༌ ཙོགས༌
ཀ༌བོའེ༌ ཡལ༌ག༌གུན༌ གྱས༌ཏེ༌ གྱང༌ངི༌ཀ༌ ཁྲིལ༌ལད༌།
23 དའ༌ དང༌ ཞུ༌ ཀོལ༌ཁན༌གུན༌ནི༌ ཁོའ༌ སྤུང༌གོལ༌ ཀྲག༌པོ༌ ཅོ༌ཨིན༌,
ཡང༌ དའ༌ ཏང༌ཨིན༌ ཁོའ༌ ཏེད༌ཏེ༌ ཁྱེར༌ཨིན༌།
24 ཨིན༌ནའང༌ ཁྱོ༌རང༌ངི༌ ལག༌པ༌ ཤེད༌ཅན༌ནི༌ ནང༌ང༌
ཞུ༌ སྟན༌པོ༌ ཐམས༌ཏེ༌ བོར༌ཨིན༌།
ཅིའ༌ཟེར༌ན༌ ངའེ༌ དཀོན༌མཆོག༌ ཀུན༌ཝང༌ངི༌ ཆག༌
ཁྱོ༌རང༌ངི༌ཀ༌ བོར༌ར༌ ཛད༌ཨིན༌,
ཁོང༌ ནི༌ ལུག༌རྫི༌, ཨིས༌ར༌ཨེལ༌པ༌གུན༌ནི༌ བྲག༌ ཨིན༌ནོག༌།
25 ཁྱོ༌རང༌ངི༌ ཕ༌མེས༌པོའེ༌ དཀོན༌མཆོག༌གི༌ ཁྱོ༌རང༌ང༌ རོགས༌ ཛད༌ཤིག༌།
དཀོན༌མཆོག༌ ཀུན༌ཝང༌ངི༌ ཁྱོ༌རང༌ང༌ ཅིན༌ལབས༌ སལ༌ཤིག༌།
ནམ༌ཁའ༌ནེ༌ ཆར༌པ༌ དང༌ སའེ༌ ཐིལ༌ནེ༌ ཆུ༌,
ཡང༌ སེམས༌ཅན༌ནི༌ ཁྱུ༌ དང༌ པུར༌གྱུད༌ མང༌པོའེ༌ ཅིན༌ལབས༌ སལ༌ཤིག༌།
26 ཁྱོ༌རང༌ང༌ དཀོན༌མཆོག༌གི༌ ཅིན༌ལབས༌གུན༌
སྔུན༌ཏུས༌སི༌ རི༌ དང༌ བྲག༌ གུན༌ནི༌ ཀ༌ནེ༌ ཐོབ༌ཁན༌ནི༌
ཕན༌ཐོགས༌སི༌ སང༌ ཀྲག༌ག༌ ཡོང༌ཅེས༌ ངའེ༌ ཨིད༌ཤེས༌ ཅོའད༌།
ཡོ༌སེབ༌བི༌ གོ༌ དང༌ ཐོད༌པའེ༌ཀ༌ འི༌ ཅིན༌ལབས༌གུན༌ བབས༌ཤིག༌
ཅིའ༌ཟེར༌ན༌ ཁོ༌ ཁོའེ༌ ཨ༌ཅོ༌ནོ༌གུན༌ནི༌ ཕྲོ༌ནེ༌ གྱལ༌ལུ༌བོ༌ ཨིན༌ནོག༌།"
27 "བེན༌ཡཱ༌མིན༌ སྲན༌ཏྲེ༌ སྟོགས༌ཏེ༌ ཡོད༌ཁན༌ནི༌ ཤང༌ཀུ༌ ཙོགས༌ ཨིན༌ནོག༌,
ང༌ཏོག༌ ཁོའེ༌ ཟའ༌ཅེས༌ལ༌ སེམས༌ཅན༌ སད༌ད༌ནོག༌ ཡང༌
ཕི༌ཏོག༌ ཏེ༌ སད༌ཁན༌ ཚང༌མ༌ བགོའ༌ནོག༌།"
28 ཁོང༌ ཚང༌མ༌ ཨིས༌ར༌ཨེལ༌ལི༌ མི༌སྡེ༌ ཅུག༌ཉིས༌གུན༌ ཨིན༌ནོག༌ ཡང༌ ཏེ༌གུན༌ ཁོང༌གུན༌ནི༌ ཨ༌བའེ༌ བུ༌ཚ༌ རེ༌རེའ༌ འོས༌པའ༌ ནང༌ཞིན༌ ཅིན༌ལབས༌ སལ༌ཁན༌བོ༌ ཨིན༌།
ཡ༌ཀོབ༌ ཀྲོངས༌།
29 ཏེ༌ནེ༌ ཡ༌ཀོབ༌བི༌ ཁོ༌རང༌ངི༌ བུ༌ཚ༌གུན༌ལ༌ བཀའ༌ ཏངས༌ཏེ༌ ཟེརས༌, "ཏ༌ ངའ༌ ང༌རང༌ངི༌ ཕ༌མེས༌པོ༌གུན༌ ཉམ༌པོ༌ ཛོམ༌ཅེས༌ ཨིན༌ནོག༌། ངའ༌ ང༌རང༌ངི༌ ཨ༌བ༌ དང༌ མེ༌མེ༌ ཉམ༌པོ༌, ཧེད༌པ༌ ཨེ༌ཕོ༌རོན༌ནི༌ ཞིང༌ངི༌ཀ༌ ཡོད༌ཁན༌ནི༌ གྲག༌ཕུགས༌སི༌ ནང༌ང༌ སུབ༌། 30 ཏེ༌བོ༌ ཀེ༌ནན༌ནི༌ ནང༌ང༌ མམ༌རེ༌ ཉེ༌མོའ༌ མེཁ༌ཕི༌ལའི༌ ཞིང༌ངི༌ གྲག༌ཕུག༌ ཀ༌བོ༌ ཨབ༌ར༌ཧམ༌མི༌ ཧེད༌པ༌ ཨེ༌ཕོ༌རོན༌ནི༌ ཀ༌ནེ༌ རོ༌ སུབ༌ཅེས༌སི༌ ཕིའ༌ ཉོས༌ཏེ༌ ཨིན༌པིན༌། 31 ཏེ༌ནང༌ང༌ ཨབ༌ར༌ཧམ༌ དང༌ ཁོང༌ངི༌ ན༌མ༌ སཱ༌ར༌ ཡང༌ ཨི༌སཱག༌ དང༌ ཁོང༌ངི༌ ན༌མ༌ ར༌བེ༌ཀ༌ གུན༌ སུབས༌ཏེ༌ ཨིན༌པིན༌ ཡང༌ ཏེ༌ནང༌ང༌ ངའེ༌ ལི༌ཨ༌ སུབས༌ཏེ༌ ཨིན༌། 32 ཏེ༌ ཞིང༌ དང༌ གྲག༌ཕུགས༌ གུན༌ ཧེད༌པ༌གུན༌ནི༌ ཀ༌ནེ༌ ཉོས༌ཏེ༌ ཨིན༌པིན༌།"
33 ཡ༌ཀོབ༌བི༌ ཁོ༌རང༌ངི༌ བུ༌ཚ༌གུན༌ལ༌ ལབ༌ཞ༌ ཏང༌ ཚར༌ར༌ཅིག༌ ཁོ༌རང༌ མལ༌ཙེ༌ཀ༌ ཉལས༌ ཡང༌ སྟིང༌ཇུག༌གི༌ འུགས༌ ལེན༌ཏེ༌ ཁོ༌རང༌ངི༌ ཕ༌མེས༌པོ༌གུན༌ ཉམ༌པོ༌ ཛོམས༌།