46
ཡ༌ཀོབ༌ ཨི༌ཇིབ༌བ༌ སོང༌།
1 ཡ༌ཀོབ༌བི༌ ཁོ༌རང༌ང༌ ཡོད༌ཁན༌ ཚང༌མ༌ ཁུར༌ཏེ༌ ཨི༌ཇིབ༌བ༌ སོང༌ ཡང༌ བེར༌ཤེ༌བ༌ ལེབ༌བ༌ཅིག༌ ཁོའེ༌ ཁོ༌རང༌ངི༌ ཡབ༌ ཨི༌སཱག༌གི༌ དཀོན༌མཆོག༌ག༌ ཆོད༌པ༌ ཕུལས༌།
2 ཚན༌ལ༌ ཞལ༌ཟིགས༌ཤིག༌གི༌ ནང༌ང༌ དཀོན༌མཆོག༌གི༌ ཁོའ༌ ཞལ༌ཏ༌ སལ༌ཏེ༌ མོལས༌, "ཡ༌ཀོབ༌། ཡ༌ཀོབ༌།"
ཡ༌ཀོབ༌བི༌ ལན༌ཏངས༌, "ང༌ འི༌ཀ༌ནེ༌ ཡོད༌ལེ༌།"
3 ཁོང༌ངི༌ མོལས༌, "ང༌ དཀོན༌མཆོག༌ ཨིན༌, ཁྱོ༌རང༌ངི༌ ཨ༌བའེ༌ དཀོན༌མཆོག༌། ཨི༌ཇིབ༌བ༌ ཆ༌ཅེས༌ལ༌ ཇིགས༌ མ༌ཇིགས༌, ཅིའ༌ཟེར༌ན༌ ཏེ༌ ནས༌སའེ༌ ནང༌ང༌ ངའེ༌ ཁྱོ༌རང༌ངི༌ པུར༌གྱུད༌གུན༌ གྱལ༌ཁམས༌ ཀྲག༌པོ༌ཞིག༌ གྱུར༌ཅུག༌ཨིན༌། 4 ང༌ ཁྱོ༌རང༌ ཉམ༌པོ༌ ཨི༌ཇིབ༌བ༌ ཆེན༌ ཡང༌ ངའེ༌ ཁྱོ༌རང༌ངི༌ པུར༌གྱུད༌གུན༌ ཏེ༌ ས༌ཆའེ༌ ནང༌ནེ༌ ཕིངས༌ཏེ༌ ཁྱོང༌ཨིན༌། ཤི༌ ཟ༌ནེ༌ ཁྱོ༌རང༌ངི༌ མིག༌ ཡོ༌སེབ༌བི༌ ཁོ༌རང༌ངི༌ ལག༌པ༌ ཉམ༌པོ༌ ཀབ༌ཨིན༌།
5 ཏེ༌ནེ༌ ཡ༌ཀོབ༌ བེར༌ཤེ༌བ༌ནེ༌ བིངས༌། ཁོའེ༌ བུ༌ཚ༌གུན༌ནི༌ ཨ༌བ༌ ཡ༌ཀོབ༌, ཁོ༌རང༌གུན༌ནི༌ ན༌མ༌ དང༌ ཕྲུ༌གུ༌གུན༌ ཨི༌ཇིབ༌བི༌ གྱལ༌པོའེ༌ ཀལ༌ཁན༌ནི༌ ལང༌རེལ༌གུན༌ ནི༌ ནང༌ང༌ སྐྱོན༌ཏེ༌ ཁྱེརས༌། 6 ཡ༌ཀོབ༌ དང༌ ཁོའེ༌ པུར༌གྱུད༌ ཚང༌མའེ༌ ཀེ༌ནན༌ནི༌ ནང༌ང༌ ཇོར༌ཁན༌ནི༌ སེམས༌ཅན༌ དང༌ ནོར༌ གུན༌ ཁུར༌ཏེ༌ ཨི༌ཇིབ༌བ༌ སོང༌། 7 ཡ༌ཀོབ༌བི༌ ཨི༌ཇིབ༌བ༌ ཁོ༌རང༌ ཉམ༌པོ༌ ཁོ༌རང༌ངི༌ བུ༌ཚ༌ དང༌ བུ༌མོ༌, ཚ༌འོ༌ དང༌ ཚ༌མོ༌ ཡང༌ན༌ ཁོའེ༌ པུར༌གྱུད༌ ཚང༌མ༌ ཁྲིད༌ཏེ༌ ཁྱེརས༌།
8 འི༌ ཚང༌མ༌ ཨི༌ཇིབ༌བ༌ ཆའ༌ཁན༌ནི༌ ཨིས༌ར༌ཨེལ༌པ༌གུན༌ནི༌ མིང༌ ཨིན༌ནོག༌ ཀ༌གུན༌ ཡ༌ཀོབ༌ དང༌ ཁོའེ༌ པུར༌གྱུད༌གུན༌ ཨིན༌།
རའུ༌བེན༌, ཡ༌ཀོབ༌བི༌ བུ༌ཚ༌ གོ༌སྐྱེས༌།
9 རའུ༌བེན༌ ནི༌ བུ༌ཚ༌གུན༌ ཧ༌ནོག༌, པ༌ལུ༌, ཧེས༌རོན༌ དང༌ ཀར༌མི༌།
10 སི༌མེ༌འོན༌ ནི༌ བུ༌ཚ༌གུན༌ ཡེ༌མའུལ༌, ཡ༌མིན༌, ཨོ༌ཧད༌, ཡ༌ཀིན༌, ཟོ༌ཧར༌ དང༌ ཤོལ༌ ༼ཤོལ༌ལི༌ ཨ༌མ༌ ཀེ༌ནན༌མ༌ ཨིན༌པིན༌༽།
11 ལི༌ཝི༌ བུ༌ཚ༌གུན༌ གེར༌ཤོན༌, ཀོ༌ཧད༌ དང༌ མི༌ར༌རི༌།
12 ཡ༌ཧུ༌དཱའེ༌ བུ༌ཚ༌གུན༌ ཨེར༌, ཨོ༌ནན༌, ཤི༌ལ༌, པེ༌རེཟ༌ དང༌ ཟི༌རཧ༌ ༼ཨིན༌ནའང༌ ཨེར༌ དང༌ ཨོ༌ནན༌ གུན༌ ཀེ༌ནན༌ནི༌ ནང༌ང༌ ཤི༌།༽
པེ༌རེཟ༌སི༌ བུ༌ཚ༌གུན༌ ཧེཟ༌རོན༌ དང༌ ཧ༌མུལ༌ ཨིན༌པིན༌།
13 ཨིས༌ས༌ཁར༌རི༌ བུ༌ཚ༌གུན༌ ཏོ༌ལ༌, པུ༌, ཡ༌ཤེབ༌ དང༌ ཤིམ༌རོན༌།
14 ཟེ༌བུ༌ལོན༌ནི༌ བུ༌ཚ༌གུན༌ སེ༌རེད༌, ཨི༌ལོན༌ དང༌ ཡ༌ལིལ༌ གུན༌ ཨིན༌པིན༌།
15 ཁོང༌གུན༌ པ༌དན༌ ཨ༌རམ༌མི༌ ནང༌ང༌ ཡ༌ཀོབ༌བ༌ ལི༌ཨ༌ གྱུད༌ཏེ༌ ཇོར༌ཁན༌ནི༌ བུ༌ཚ༌གུན༌, དང༌ དི༌ནཱ༌ ཁོའེ༌ བུ༌མོ༌ ཨིན༌ནོག༌། ལི༌ཨ༌ གྱུད༌ཏེ༌ ཡ༌ཀོབ༌བ༌ ཕྲུ༌གུ༌ དང༌ ཚ༌འོ༌ ཚ༌མོ༌ ཚང༌མ༌ སུམ༌ཅུ༌སོག༌སུམ༌ ཡོད༌པིན༌།
16 གཱད༌དི༌ བུ༌ཚ༌གུན༌ ནི༌ ཛེ༌ཕོན༌, ཧ༌གི༌, ཤུ༌ནི༌, ཨེཟ༌བོན༌, ཨེ༌རི༌, ཨ༌རོད༌དི༌ དང༌ ཨ༌རེ༌ལི༌།
17 ཨ༌ཤེར༌རི༌ བུ༌ཚ༌གུན༌ ནི༌ འིམ༌ནཧ༌, ཨིཤ༌ཝ༌, ཨིཤ༌ཝི༌ དང༌ བེ༌རིའ༌ ཡང༌ ཁོང༌གུན༌ནི༌ སྲིང༌མོ༌ སཱ༌ར༌ ཨིན༌པིན༌། བེ༌རིའ༌འི༌ བུ༌ཚ༌གུན༌ ནི༌ ཧེ༌བར༌ དང༌ མལ༌ཀེལ༌།
18 ཁོང༌གུན༌ ཟིལ༌པཧ༌ གྱུད༌ཏེ༌ སྐྱེ༌ཁན༌ ཡ༌ཀོབ༌བི༌ ཕྲུ༌གུ༌ ཅུ༌རུག༌བོ༌ ཨིན༌ནོག༌, ལ༌བན༌ནི༌ ཁོ༌རང༌ངི༌ བུ༌མོ༌ ལི༌ཨའ༌ ཁོ༌ ཡོག༌མོའ༌ ཏངས༌ཏེ༌ ཨིན༌པིན༌།
19 ཡ༌ཀོབ༌བི༌ ན༌མ༌ རེ༌ཅལ༌ལ༌ བུ༌ཚ༌ ཡོ༌སེབ༌ དང༌ བེན༌ཡཱ༌མིན༌ སྐྱེས༌། 20 ཨི༌ཇིབ༌བི༌ ནང༌ང༌ ཡོ༌སེབ༌བ༌ མ༌ནས༌སེཧ༌ དང༌ ཨེཕ༌ར༌ཡིམ༌ བུ༌ཚ༌ ཉིས༌ ཡོད༌པིན༌, ཁོང༌གུན༌ འོན༌ ནེ༌ ཨིན༌ཁན༌ བླ༌མ༌ པོ༌ཏི༌ཕར༌རི༌ བུ༌མོ༌ ཨ༌སི༌ནད༌ལ༌ སྐྱེས༌ཏེ༌ ཨིན༌པིན༌།
21 བེན༌ཡཱ༌མིན༌ནི༌ བུ༌ཚ༌གུན༌ ནི༌ བི༌ལ༌, བེ༌ཀར༌, ཨཤ༌བེལ༌, གི༌ར༌, ན༌མན༌, ཨེ༌ཧི༌, རོཤ༌, མུ༌པིམ༌, ཧུ༌པིམ༌ དང༌ ཨ༌རད༌ ཨིན༌པིན༌། 22 འི༌ ཅུབ༌ཞི༌བོ༌ རེ༌ཅལ༌ གྱུད༌ཏེ༌ ཡ༌ཀོབ༌བི༌ བུ༌ཚ༌ དང༌ ཚ༌འོ༌ གུན༌ ཨིན༌ནོག༌།
23 དཱན༌ནི༌ བུ༌ཚ༌ ཧུ༌ཤིམ༌།
24 ཡང༌ ནབ༌ཐལ༌ལིའི༌ བུ༌ཚ༌གུན༌ ནི༌ ཡཧ༌ཟིལ༌, གུ༌ནི༌, ཡ༌ཟེར༌ དང༌ ཤི༌ལེམ༌ གུན༌ ཨིན༌པིན༌། 25 ཏེ༌ བུ༌ཚ༌ རྡུན༌ཀོ༌ བིལ༌ལཧ༌ གྱུད༌ཏེ༌ སྐྱེ༌ཁན༌ ཡ༌ཀོབ༌བི༌ ཕྲུ༌གུ༌གུན༌ ཨིན༌ནོག༌, ལ༌བན༌ནི༌ ཁོ༌རང༌ངི༌ བུ༌མོ༌ རེ༌ཅལ༌ལ༌ ཁོ༌ ཡོག༌མོའ༌ ཏངས༌ཏེ༌ ཨིན༌པིན༌།
26 ཡ༌ཀོབ༌ ཉམ༌པོ༌ ཨི༌ཇིབ༌བ༌ ཆའ༌ཁན༌ ཁོའེ༌ པུར༌གྱུད༌གུན༌ནི༌ ཀྲངས༌ཀ༌ དྲུག༌ཅུ༌ ར༌རུག༌ ཡོད༌པིན༌ ཀ༌བོའེ༌ ནང༌ང༌ ཁོའེ༌ བུ༌ཚ༌གུན༌ནི༌ ན༌མ༌ མ༌ཐེའ༌ ཨིན༌ནོག༌། 27 ཨི༌ཇིབ༌བི༌ ནང༌ང༌ ཡོ༌སེབ༌བ༌ སྐྱེས༌ཁན༌ནི༌ བུ༌ཚ༌ ཉིས༌ཀོ༌ ཐེས༌ཏེ༌ ཡ༌ཀོབ༌བི༌ ནང༌ཚངས༌ ཨི༌ཇིབ༌བ༌ ཆའ༌ཁན༌གུན༌ནི༌ ཀྲངས༌ཀ༌ རྡུན༌ཅུ༌ ཡོད༌པིན༌།
28 ཡ༌ཀོབ༌བི༌ གོ༌ཤེན༌ལ༌ ཆ༌སའེ༌ ལམ༌ གྱུས༌ཅོ༌ཅེས༌ལ༌ ཡ༌ཧུ༌དཱ༌ སྔུན༌ལ༌ ཡོ༌སེབ༌བི༌ཀ༌ ལམ༌ཅུགས༌། ཁོང༌གུན༌ གོ༌ཤེན༌ནི༌ ས༌ཆའེ༌ཀ༌ ལེབ༌བ༌ཅིག༌ 29 ཡོ༌སེབ༌བི༌ ཁོ༌རང༌ངི༌ རྟ༌རེལ༌ གྲལ༌གྲིག༌ ཅོས༌ཏེ༌ གོ༌ཤེན༌ལ༌ ཁོ༌རང༌ངི༌ ཨ༌བ༌ ཐུག༌ག༌ སོང༌། ཨ༌བའ༌ ཐུག༌ག༌ཅིག༌ ཡོ༌སེབ༌བི༌ ཨ༌བའ༌ ཁྲིལ༌ཏེ༌ ཏུས༌བན༌ཤིག༌ ངུས༌།
30 ཡ༌ཀོབ༌བི༌ ཡོ༌སེབ༌བ༌ ཟེརས༌, "ངའེ༌ ཁྱོ༌རང༌ སོན༌ཏེའ༌ ཐོང༌པ༌ ཏ༌ ང༌ ཤི༌ཅེས༌ལ༌ གྲལ༌གྲིག༌ ཨིན༌།"
31 ཏེ༌ནེ༌ ཡོ༌སེབ༌བི༌ ཁོ༌རང༌ངི༌ ཨ༌ཅོ༌ནོ༌ དང༌ ཞན༌ ནང༌མི༌གུན༌ལ༌ ཟེརས༌, "ཏ༌ ང༌ གྱལ༌པོའེ༌ཀ༌ སོང༌ཏེ༌ ཟེར༌ཨིན༌ 'ཀེ༌ནན༌ནི༌ ནང༌ང༌ དུག༌ཁན༌ ངའེ༌ ཨ༌ཅོ༌ནོ༌ དང༌ ངའེ༌ ཨ༌བའེ༌ ནང༌མི༌ ཚང༌མ༌ ཡོང༌ཏེ༌ དུག༌། 32 ཁོང༌གུན༌ ལུག༌རྫི༌ ཡང༌ སེམས༌ཅན༌གུན༌ལ༌ ལྟ༌སྟོག༌ ཅོ༌ཁན༌ ཨིན༌ནོག༌ ཡང༌ ཁོང༌གུན༌ནི༌ ཁོ༌རང༌གུན༌ནི༌ སྲལ༌ཁན༌ནི༌ སེམས༌ཅན༌ནི༌ ཁྱུ༌གུན༌ དང༌ ཁོང༌གུན༌ལ༌ ཡོད༌ཁན༌ ཚང༌མ༌ ཁྱོངས༌ཏེ༌ དུག༌།' 33 གྱལ༌པོའེ༌ ཁྱོ༌ཞ༌གུན༌ བོད༌ཏེ༌ 'ཁྱོ༌རང༌གུན༌ནི༌ ལས༌ ཅི༌ ཅོའད༌?' ཟེར༌ཏེ༌ ཏྲིའ༌ཅིག༌, 34 ཁྱོ༌ཞ༌གུན༌ནི༌ ཟེར༌གོས༌, 'ང༌ཞའེ༌ ཕ༌མེས༌པོ༌གུན༌ ཙོགས༌ལ༌ ང༌ཞའ༌ ཕྲུ༌གུ༌ ནེ༌ པར༌ལ༌ སེམས༌ཅན༌ སྲལ༌ཏེ༌ ཚོ༌ཁན༌གུན༌ ཨིན༌།' ཏེ༌ནེ༌ ཁོའེ༌ ཁྱོ༌ཞ༌གུན༌ གོ༌ཤེན༌ ཡུལ༌ཇོངས༌སི༌ ནང༌ང༌ དུག༌ཅུག༌ཨིན༌ ཅིའ༌ཟེར༌ན༌ ཨི༌ཇིབ༌པ༌གུན༌ནི༌ སེམས༌ཅན༌ སྲལ༌ཁན༌ནི༌ མི༌གུན༌ རྩང༌མ༌ ཐེའ༌ མེད༌པིན༌།