1 སཱ༌ར༌ ལོ༌ 127 ཚོག༌པ༌ སོན༌ཏེའ༌ ལུས༌། 2 ཁོ༌ ཀེ༌ནན༌ ཡུལ༌ཇོངས༌སི༌ ཀི༌རིའད༌ ཨར༌བའི༌ ནང༌ང༌ ཀྲོངས༌ ཀ༌བོའ༌ དག༌ས༌ ཧེབ༌རོན༌ ཟེར༌ར༌ནོག༌ ཡང༌ ཨབ༌ར༌ཧམ༌མི༌ སཱ༌རའེ༌ ཕིའ༌ རྡུག༌པོ༌ ཅོས༌ཏེ༌ ངུས༌།

3 ཁོ༌ སཱ༌རའེ༌ སྤུར༌རི༌ དུན༌ནེ༌ ལངས༌ཏེ༌ ཧེད༌དི༌ པུར༌གྱུད༌གུན༌ལ༌ ཟེརས༌, 4 "ཁྱོ༌ཞ༌གུན༌ནི༌ ཕྲོའ༌ དུག༌ཁན༌ ང༌ ཞན༌ཡུལ༌ལི༌ མི༌ཞིག༌ ཨིན༌, ཇུ༌ཇུ༌ ངའེ༌ ན༌མའེ༌ སྤུར༌ སུབ༌ཅེས༌ལ༌ ངའ༌ ས༌ཀྱད༌ཞིག༌ ཙོང༌ང༌ ཛད༌།"

5 ཧེད༌པའེ༌ བུ༌ཚ༌གུན༌ནི༌ ཨབ༌ར༌ཧམ༌མ༌ ལན༌ཏངས༌, 6 "ང༌ཞ༌གུན༌ལ༌ སན༌ནའང༌ ཀ༌ག༌ལེ༌, ང༌ཞའེ༌ ཕྲོའ༌ ཉེ༌རང༌ སྤོན༌བོ༌ ཁྱུད༌ཅན༌ཞིག༌ ཨིན༌ནོག༌། ང༌ཞའེ༌ རོམ༌ཁང༌ངི༌ ནས༌ས༌ ཉེ༌རང༌ ཐད༌ཁན༌བོའེ༌ ནང༌ང༌ ཉེ༌རང༌ངི༌ ན༌མ༌ སུབ༌བ༌ ཛད༌། ཉེ༌རང༌ང༌ སྤུར༌ཁང༌ངི༌ ནས༌ས༌ ཏང༌ཅེས༌ལ༌ ང༌ཞའ༌ ཚང༌མ༌ ཐད༌པོ༌ ཨིན༌།

7 ཏེ༌ནེ༌ ཨབ༌ར༌ཧམ༌མི༌ གོ༌ སྒུས༌ཏེ༌ ཁོང༌གུན༌ལ༌ ཀུས༌པ༌ ཅོས༌ 8 ཡང༌ མོལས༌, "གལ༌ཏེས༌ ཁྱོ༌ཞ༌གུན༌ ངའེ༌ ང༌རང༌ངི༌ ན༌མ༌ སུབ༌ཅུག༌ཅེས༌ལ༌ ཐད༌དད༌ན༌, ཇུ༌ཇུ༌ ཟོ༌ཧར༌རི༌ བུ༌ཚ༌ ཨེ༌ཕོ༌རོན༌ལ༌ 9 ཁོའེ༌ ཨིན༌ཁན༌ མེཁ༌ཕི༌ལའི༌ གྲག༌ཕུག༌པོ༌ ངའ༌ ཙོང༌ཅེས༌ལ༌ མོལ༌ལའང༌, ཀ༌བོ༌ ཁོའེ༌ ཞིང༌ངི༌ ཐའ༌མའ༌ དུག༌། ཤི༌ཁན༌གུན༌ སུབ༌ཅེས༌སི༌ ཕིའ༌ ཏེ༌ ནས༌ས༌བོ༌ ཁྱོ༌ཞ༌གུན༌ནི༌ དུན༌ལ༌ རིན༌ དྲན༌དྲ༌ ཏངས༌ཏེ༌ ངའེ༌ ཉོན༌།"

10 གྱལ༌སའེ༌ སྒོའེ༌ཀ༌ ཛོམས༌ཁན༌ནི༌ ཧེད༌པ༌གུན༌ནི༌ ཕྲོའ༌ ཨེ༌ཕོ༌རོན༌ནའང༌ ཡོད༌པིན༌, ཏེ༌ཀ༌ ཡོད༌ཁན༌ ཚང༌མའེ༌ དུན༌ལ༌ ཁོའེ༌ ཨབ༌ར༌ཧམ༌མ༌ ལན༌ཏངས༌, 11 "ཀ༌ག༌ལེ༌ ཉན༌ན༌ཛད༌, ངའེ༌ ཉེ༌རང༌ང༌ ཞིང༌ གང༌པོ༌ དང༌ ཏེ༌ནང༌ང༌ ཡོད༌ཁན༌ གྲག༌ཕུག༌པོའང༌ ཏང༌ཨིན༌། འི༌ཀ༌ ཡོད༌ཁན༌ མི༌ཚང༌མའེ༌ དུན༌ལ༌ ཏེ༌བོ༌ ངའེ༌ ཉེ༌རང༌ང༌ ཏང༌ངད༌, ཉེ༌རང༌ངི༌ ཤི༌ཁན༌བོ༌ སུབ༌བ༌ ཛད༌།"

12 ཡང༌སྐྱར༌ ཨབ༌ར༌ཧམ༌མི༌ ཧེད༌པ༌གུན༌ནི༌ དུན༌ལ༌ སྒུས༌ཏེ༌ ཀུས༌པ༌ སྟནས༌, 13 ཡང༌ ཚང༌མའེ༌ དུན༌ལ༌ ཁོའེ༌ ཨེ༌ཕོ༌རོན༌ལ༌ ཟེརས༌, "ཇུ༌ཇུ༌ ངའ༌ ཉན༌ན༌ཛད༌ ངའེ༌ ཞིང༌ གང༌པོའེ༌ རིན༌བོ༌ ཏང༌ཨིན༌, ལེན༌ན༌ ཛད༌དའང༌ ཏེ༌ནེ༌ ངའ༌ ང༌རང༌ངི༌ ན༌མ༌ ཏེ༌རུ༌ སུབ༌ ཉན༌ཨིན༌།"

14 ཨེ༌ཕོ༌རོན༌ནི༌ ལན༌ཏངས༌, 15 "ཀ༌ག༌ལེ༌ ས༌ཆའེ༌ རིན༌བོ༌ མུལ༌ ཞིབ༌གྱ༌ མ༌ནེ༌ མ༌ནོག༌, ང༌དང༌ ཉིས༌ཀོའེ༌ ཕར༌ལ༌ ཏེ༌བོ༌ ཅི༌ ཨིན༌ནོག༌། ཉེ༌རང༌ངི༌ ན༌མ༌ ཏེ༌ ནང༌ང༌ སུབ༌བ༌ཛད༌།

16 ཨབ༌ར༌ཧམ༌མི༌ ཨེ༌ཕོ༌རོན༌ ཉམ༌པོ༌ ཁའ༌ཆམས༌ཏེ༌ མི༌ཚང༌མའེ༌ དུན༌ལ༌ ཁོའེ༌ ཟེར༌ཁན༌ནི༌ མུལ༌ 400 སྐར༌ཏེ༌ ཏངས༌, ཀ༌བོ༌ ཏེན༌ན༌ ཏུས༌སི༌ ཚོང༌པའེ༌ ཀོལ༌ཁན༌ནི༌ ཚད༌པོ༌ ཨིན༌པིན༌།

17 ཏེན༌ན༌ ཟུག༌གི༌ མམ༌རེའེ༌ ཉེ༌མོའ༌ མེཁ༌ཕི༌ལའི༌ ནང༌ང༌ ཡོད༌ཁན༌ནི༌ ཨེ༌ཕོ༌རོན༌ནི༌ གྲག༌ཕུག༌, ཞིང༌ དང༌ ཏེ༌ ནང༌ཀུག༌ དང༌ ཐའ༌མ༌ ཡོད༌ཁན༌ནི༌ ལྕང༌མ༌ ཚང༌མ༌ ཨབ༌ར༌ཧམ༌མི༌ ཉོས༌། 18 ཡང༌ གྱལ༌སའེ༌ སྒོའེ༌ཀ༌ ཛོམས༌ཏེ༌ ཡོད༌ཁན༌ ཧེད༌པ༌ ཚང༌མའེ༌ དུན༌ལ༌ ཨབ༌ར༌ཧམ༌ ཏེ༌ ནོར༌གུན༌ནི༌ དག༌པོ༌ གྱུར༌། 19 ཏེ༌སྟིང༌ནེ༌ ཨབ༌ར༌ཧམ༌མི༌ ཁོ༌རང༌ངི༌ ན༌མ༌ སཱ༌ར༌ མམ༌རེའེ༌ ཉེ༌མོའ༌ མེཁ༌ཕི༌ལའི༌ ཞིང༌ངི༌ གྲག༌ཕུག༌པོའི༌ ནང༌ང༌ སུབས༌, ཀ༌བོ༌ ཀེ༌ནན༌ནི༌ ནང༌ང༌ ཨིན༌པིན༌། 20 ཏེན༌ན༌ ཟུག༌གི༌ ཧེད༌པ༌གུན༌ནི༌ ཞིང༌ དང༌ གྲག༌ཕུག༌ ཨབ༌ར༌ཧམ༌མི༌ ནོར༌ གྱུར༌, ཀ༌བོ༌ རོ༌ སུབ༌སའེ༌ ས༌ཀྱད༌ གྱུར༌།