1 ཨབ༌རམ༌མི༌ ལོ༌ 99 ཨིན༌ ཟ༌ནེ༌ ཁོའ༌ ཡ༌ཝ༌ ཇལ༌ ཡང༌ མོལས༌, "ང༌ ནི༌ ཀུན༌ཝང༌ དཀོན༌མཆོག༌ ཨིན༌, ངའ༌ ཨིད༌ཤེས༌ཅན༌ ཞབ༌སྟོག༌ ཞུ༌ཨིན༌ ནོངས༌མེད༌ཁན༌ནི༌ མི༌ཚེ༌ཞིག༌ པུད༌། 2 ངའེ༌ ཁྱོ༌རང༌ དང༌ ངའེ༌ ཕར༌ལ༌ ཅོ༌ཁན༌ནི༌ ཆད༌དོན༌བོ༌ སྟན༌པོ༌ ཅོས༌ཏེ༌ ཁྱོ༌རང༌ང༌ པུར༌གྱུད༌ མང༌པོ༌ ཏང༌ཨིན༌།"

3 ཨབ༌རམ༌མི༌ གོ༌ སྒུས༌ཏེ༌ ཆག༌ཕུལས༌ ཡང༌ དཀོན༌མཆོག༌གི༌ ཁོའ༌ མོལས༌, 4 "ངའེ༌ འི༌ ཆད༌དོན༌བོ༌ ཁྱོ༌རང༌ ཉམ༌པོ༌ ཅོའད༌། ཁྱོ༌རང༌ གྱལ༌ཁམས༌ མང༌པོའེ༌ ཕ༌མེས༌པོ༌ གྱུར༌ཨིན༌། 5 ཏ༌ནེ༌ཕར༌ལ༌ ཁྱོ༌རང༌ང༌ ཨབ༌རམ༌ མ༌ཟེར༌ར༌ ཨབ༌ར༌ཧམ༌ ཟེར༌ཨིན༌, ཅིའ༌ཟེར༌ན༌ ངའེ༌ ཁྱོ༌རང༌ གྱལ༌ཁམས༌ མང༌པོའེ༌ ཕ༌མེས༌པོ༌ གྱུར༌ཅུག༌ཨིན༌། 6 ངའེ༌ ཁྱོ༌རང༌ང༌ པུར༌གྱུད༌ མང༌པོ༌ ཏང༌ཨིན༌ ཀ༌གུན༌ གྱལ༌ཁམས༌ མང༌པོ༌ གྱུར༌ཨིན༌ ཡང༌ ཁོང༌གུན༌ནི༌ ནང༌ནེ༌ གྱལ༌པོ༌གུན༌ བིང༌ཨིན༌། 7 ངའེ༌ ཁྱོ༌རང༌ དང༌ ང༌ ཡང༌ ཁྱོ༌རང༌ངི༌ པུར༌གྱུད༌གུན༌ནི༌ པར༌ལ༌ ཅོ༌ཁན༌ནི༌ ཆད༌དོན༌, ཀ༌བོ༌ ང༌ ཁྱོ༌རང༌ དང༌ ཁོང༌གུན༌ནི༌ དཀོན༌མཆོག༌ ཨིན༌ཁན༌བོ༌ མི༌རབས༌ནེ༌ མི༌རབས༌ ལུས༌ཨིན༌། 8 ཡང༌ ངའེ༌ ཁྱོ༌རང༌ང༌ ཀེ༌ནན༌ནི༌ ཡུལ༌ གང༌པོ༌ ཏང༌ཨིན༌ ཀ༌རུ༌ དག༌ས༌ ཁྱོ༌རང༌ ཞན༌ཡུལ༌ལི༌ མི༌ ཙོགས༌ལ༌ དུག༌ཨིན༌ ཡོད༌, འི༌ ས༌ཀྱད༌ ཁྱོ༌རང༌ངི༌ པུར༌གྱུད༌གུན༌ནི༌ ལག༌ག༌ ཏུས༌གྱུན༌ནི༌ གྱུ༌ནོར༌རི༌ ཚུལ༌ལ༌ ལུས༌ཨིན༌ ཡང༌ ང༌ ཁོང༌གུན༌ནི༌ དཀོན༌མཆོག༌།"

9 ཏེ༌ནེ༌ དཀོན༌མཆོག༌གི༌ ཨབ༌ར༌ཧམ༌མ༌ མོལས༌, "ངའེ༌ ཁྱོ༌རང༌ ཉམ༌པོ༌ ཆད༌དོན༌ ཅོ༌ཁན༌བོ༌ ཁྱོ༌རང༌ངི༌ ཁའ༌ཉན༌གོས༌ ཡང༌ ཡོང༌ཅེས༌ཅན༌ནི༌ ཁྱོ༌རང༌ངི༌ པུར༌གྱུད༌ ཚང༌མེའང༌། 10 ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌ གུན༌ནི༌ འི༌ ཆད༌དོན༌བོ༌ ཅོས༌, ཁྱོ༌ཞ༌གུན༌ནི༌ ཕྲོའ༌ ཡོད༌ཁན༌ནི༌ བུ༌ཚ༌ ཚང༌མའེ༌ སུན༌ནད༌ ཅོ༌གོས༌། 11 ངའ༌ དང༌ ཁྱོ༌ཞ༌གུན༌ནི༌ ཕར༌ལ༌ ཅོ༌ཁན༌ནི༌ ཆད༌དོན༌ནི༌ སྟགས༌སི༌ ཚུལ༌ལ༌ ཁྱོ༌ཞའེ༌ ཅུ༌ཅུའི༌ གོའེ༌ ཀ༌ནེ༌ པགས༌པ༌ ཆུ༌ངུན༌ཞིག༌ ཅད༌ཏེ༌ སུན༌ནད༌ ཅོ༌གོས༌། 12 ཏ༌ནེ༌ཕར༌ལ༌ ཁྱོ༌ཞ༌གུན༌ནི༌ ཕྲུ༌གུ༌ བུ༌ཚ༌གུན༌ལ༌ ཞག༌པོ༌ 8 ཆའ༌ཅིག༌ སུན༌ནད༌ ཅོ༌གོས༌, ཏེ༌བོ༌ ཁྱོ༌རང༌ངི༌ པུར༌གྱུད༌གུན༌ ཅིག༌པོ༌ མན༌པ༌ ཁྱོ༌རང༌ངི༌ ཁང༌པའེ༌ ནང༌ང༌ སྐྱེས༌ཁན༌ དང༌ ཞན༌ མི༌རིགས༌གུན༌ནི༌ ཀ༌ནེ༌ ཉོས༌ཁན༌ནི༌ ཚེ༌ཡོག༌ གུན༌ལའང༌ ཅོ༌གོས༌། 13 བུ༌ཚ༌ ཚང༌མའ༌ སུན༌ནད༌ ཅོ༌གོས༌། ངའེ༌ ཏུས༌གུན༌ ལུས༌ཤེས༌སི༌ ཆད༌དོན༌ ནི༌ སྟགས༌པོ༌ ཁྱོ༌ཞའེ༌ ཟུགས༌པོའེ༌ཀ༌ ལུས༌གོས༌། 14 སུན༌ནད༌ མ༌ཅོས༌ཁན༌ནི༌ བུ༌ཚ༌གུན༌ ངའེ༌ མི༌གུན༌ནི༌ ཕྲོ༌ནེ༌ ཕིང༌གོས༌ ཅིའ༌ཟེར༌ན༌ ཁོང༌གུན༌ནི༌ ངའེ༌ ཆད༌དོན༌བོ༌ ཅགས༌ཏེ༌ ཨིན༌ནོག༌།

15 དཀོན༌མཆོག༌གི༌ ཨབ༌ར༌ཧམ༌མ༌ འི༌བོའང༌ མོལས༌, "ཏ༌ནེ༌ཕར༌ལ༌ ཁྱོ༌རང༌ངི༌ ན༌མའ༌ སཱ༌རཱིའ༌ མ༌ཟེར༌ར༌ སཱ༌ར༌ ཟེར༌གོས༌། 16 ངའེ༌ ཁོའ༌ ཅིན༌ལབས༌ ཏང༌ཨིན༌, ཏན༌ཏན༌ ངའེ༌ ཁྱོ༌རང༌ང༌ ཁོ༌ གྱུད༌ཏེ༌ བུ༌ཚ༌ཞིག༌ ཏང༌ཨིན༌། ཁོ༌ གྱལ༌ཁམས༌ མང༌པོའེ༌ ཨ༌མ༌ གྱུར༌ཨིན༌ ཡང༌ ཁོའེ༌ པུར༌གྱུད༌གུན༌ནི༌ ཕྲོའ༌ གྱལ༌པོ༌ མང༌པོ༌ བིང༌ཨིན༌།"

17 ཨབ༌ར༌ཧམ༌མི༌ ཆག༌ཕུལས༌ ཨིན༌ནའང༌ གོད༌ཅེས༌ ཡོངས༌ཏེ༌ སམ༌, "ང༌ ལོ༌ རྒྱའ༌ ལོན༌ཏེ༌ ཀ༌ཟུག༌གི༌ ཨ༌བ༌ གྱུར༌ཉན༌ཨིན༌?" ཡང༌ སཱ༌ར༌ ལོ༌ 90 སོང༌ཏེ༌ ཀ༌ཟུག༌གི༌ ཕྲུ༌གུ༌ སྐྱེ༌ཉན༌ཨིན༌།" 18 ཁོའེ༌ དཀོན༌མཆོག༌ག༌ ཞུས༌, "ཉེ༌རང༌ངི༌ ཅིན༌ལབས༌པོ༌ ཨིཤ༌མ༌ཨེལ༌ལ༌ སལ༌ལ༌ ཛད༌ལེ༌།"

19 ཨིན༌ནའང༌ དཀོན༌མཆོག༌གི༌ མོལས༌, "མན༌ ཁྱོ༌རང༌ངི༌ ན༌མ༌ སཱ༌ར༌ བུ༌ཚ༌ཞིག༌ སྐྱེ༌ཨིན༌ ཡང༌ ཁྱོ༌རང༌ངི༌ ཁོའེ༌ མིང༌ང༌ ཨི༌སཱག༌ ཏག༌ཨིན༌། ངའེ༌ ཅོ༌ཁན༌ནི༌ ཆད༌དོན༌བོ༌ ཁོ༌ དང༌ ཁའེ༌ པུར༌གྱུད༌གུན༌ ཉམ༌པོ༌ ཐའ༌མེད༌པ༌ ལུས༌ཨིན༌། 20 ཁྱོ༌རང༌ངི༌ ཞུ༌ཝ༌ ཕུལ༌ཁན༌ ནང༌ཞིན༌ ངའེ༌ ཨིཤ༌མ༌ཨེལ༌ལའང༌ ཅིན༌ལབས༌ ཏང༌ཨིན༌། ཁོའ༌ ཕྲུ༌གུ༌ མང༌པོ༌ ཇོར༌ཏེ༌ ཁོའེ༌ པུར༌གྱུད༌ མང༌པོ༌ ཕེལ༌ཅུག༌ཨིན༌ ཡང༌ ཁོ༌ ཝང༌སྲུལ༌པ༌ ཅུག༌ཉིས༌སི༌ ཨ༌བ༌ གྱུར༌ཨིན༌། ངའེ༌ ཁོའེ༌ གྱལ༌ཁམས༌པོ༌ བྲག༌པོ༌ གྱུར༌ཅུག༌ ཨིན༌། 21 ཨིན༌ནའང༌ ངའེ༌ ཆད༌དོན༌བོ༌ ཁྱོ༌རང༌ངི༌ བུ༌ཚ༌ ཨི༌སཱག༌ ཉམ༌པོ༌ བོར༌རད༌, ཀ༌བོ༌ སྟིང༌མ༌ ལོ༌ འིན༌ན༌ ཏུས༌པོའི༌ཀ༌ སཱ༌ར༌ གྱུད༌ཏེ༌ ཁྱོ༌རང༌ང༌ སྐྱེ༌ཨིན༌།" 22 དཀོན༌མཆོག༌གི༌ ཨབ༌ར༌ཧམ༌ ཉམ༌པོ༌ ཞལ༌ཏ༌ མོལ༌ ཚར༌ར༌ཅིག༌ ཁོང༌ ཀེན༌ལ༌ སྐྱོདས༌།

23 ཏེན༌ན༌ ཞག༌ག༌ དཀོན༌མཆོག༌གི༌ མོལ༌ཁན༌ ནང༌ཞིན༌ ཨབ༌ར༌ཧམ༌མི༌ བུ༌ཚ༌ ཨིཤ༌མ༌ཨེལ༌, ཁོའེ༌ ཁང༌པའེ༌ ནང༌ང༌ སྐྱེ༌ཁན༌ ཡང༌ ཉོ༌ཁན༌ བུ༌ཚ༌ ཚེ༌ཡོག༌ ཚང༌མ༌ལ༌ སུན༌ནད༌ ཅོས༌། 24 ཨབ༌ར༌ཧམ༌མ༌ སུན༌ནད༌ ཅོ༌ ཟ༌ནེ༌ ཁོའ༌ ལོ༌ 99 ཆའད༌པིན༌, 25 ཡང༌ ཁོའེ༌ བུ༌ཚ༌ ཨིཤ༌མ༌ཨེལ༌ལ༌ ལོ༌ 13 ཆའད༌པིན༌། 26 ཏེན༌ན༌ ཞག༌ག༌ ཁོང༌ ཉིས༌ཀོའ༌ སུན༌ནད༌ ཅོས༌ཏེ༌ ཨིན༌པིན༌, 27 ཡང༌ ཁོའེ༌ ཁང༌པའེ༌ ནང༌ང༌ སྐྱེ༌ཁན༌ དང༌ ཉོ༌ཁན༌ བུ༌ཚ༌ ཚེ༌ཡོག༌ ཚང༌མ༌ལའང༌ སུན༌ནད༌ ཅོས༌།