27
པ༌འུ༌ལུ༌ རོམ༌མ༌ ཁྱེརས༌།
27:1 ནེ༌ 12
1 ང༌ཞ༌གུན༌ གྲུ༌ཟིང༌ངི༌ ནང༌ང༌ ཨི༌ཏྲི༌ལི༌ ཡུལ༌ལ༌ ཀལ༌ཅེས༌ ཐག༌ཅད༌ད༌ཅིག༌, ཀའ༌ལོན༌ནི༌ པ༌འུ༌ལུ༌ དང༌ ཞན༌ ཙོན༌པ༌ ཁ༌ཅིག༌ མག༌མི༌རྒྱའེ༌ སྤོན༌བོ༌ ཡུ༌ལི༌འུས༌ ཟེར༌ཁན༌ནི༌ ལག༌ག༌ སྟདས༌, ཁོ༌ རོམ༌མི༌ གྱལ༌པོའེ༌ མིག༌སལ༌ལི༌ མག༌མིའི༌ ནང༌ནེ༌ ཨིན༌པིན༌། 2 ང༌ཞ༌གུན༌ ཨ༌དྲ༌མི༌དིམ༌ནེ༌ ལེབ༌ཁན༌ནི༌ གྲུ༌ཟིང༌ཞིག༌ག༌ ཞོན༌ཏེ༌ སོང༌པིན༌, ཀ༌བོ༌ ཨ༌སི༌ཨཱའེ༌ ཡུལ༌ཇོངས༌སི༌ ཚོའེ༌ ཐའ༌མའ༌ ཡོད༌ཁན༌ནི༌ ནས༌ས༌གུན༌ གྱུད༌ཏེ༌ ཆ༌ཅེས༌ ཨིན༌པིན༌, ཡང༌ མ༌ཀེ༌དོ༌ནི༌ཡཱ༌ ཡུལ༌ཇོངས༌སི༌ ཐེ༌ས༌ལོ༌ནི༌ཀ༌ གྱལ༌ས༌ནེ༌ ཨིན༌ཁན༌ནི༌ ཨ༌རིས༌ཏར༌ཀུས༌ ང༌ཞའ༌ ཉམ༌པོ༌ ཡོད༌པིན༌།
3 སྟིང༌མ༌ཞག༌པོ༌ སི༌དཱོན༌ གྱལ༌ས༌ ལེབ༌བ༌ཅིག༌, སྒོས༌དོམ༌གུན༌ ཐོབ༌ཅེས༌སི༌ ཕིའ༌ ཡུ༌ལི༌འུས༌སི༌ ཐུག༌རྗེ༌ ཅོས༌ཏེ༌ པ༌འུ༌ལུའ༌ ཁོང༌ངི༌ ཛ༌འོ༌གུན༌ ཉམ༌པོ༌ ཐུག༌ཅེས༌ལ༌ གོངས༌པ༌ ཏངས༌། 4 ཏེ༌ཀ༌ནེ༌ ང༌ཞ༌གུན༌ གྲུ༌ཟིང༌ང༌ ཞོནས༌ ཡང༌ ལུངས༌པོ༌ ང༌ཞའ༌ ཆེན༌ ཡོད༌སའེ༌ གོ༌ལོག༌པོའ༌ ཡོངས༌པ༌, ང༌ཞའ༌ ལུངས༌པོ༌ མེད༌ས༌ ཀིབ༌རུས༌ ཚོ༌ལིང༌, ཡོ༌མ༌ ཆོགས༌ལ༌ བོར༌ཏེ༌ སོང༌པིན༌། 5 ཏེ༌ནེ༌ ང༌ཞ༌གུན༌ ཀཱི༌ལི༌ཀི༌ཡཱ༌ དང༌ པམ༌ཕིལ༌ཡཱའེ༌ ཉེ༌མོའ༌ ཡོད༌ཁན༌ནི༌ གྱ༌ཚོ༌ གྱུད༌ཏེ༌ ལིག༌ཡཱ༌ ཡུལ༌ཇོངས༌སི༌ མི༌ར༌ གྱལ༌ས༌ བབས༌པིན༌། 6 ཏེ༌རུ༌ མག༌མི༌རྒྱའེ༌ སྤོན༌བོའ༌ ཨ༌ལེག༌ཟན༌དེར༌ གྱལ༌ས༌ནེ༌ ཨིན༌ཁན༌ནི༌ གྲུ༌ཟིང༌, ཨི༌ཏྲི༌ལི༌ ཡུལ༌ལ༌ ཆའ༌ཁན༌ཞིག༌ ཐོབ༌པ༌ ང༌ཞ༌གུན༌ ཏེ༌བོའེ༌ ནང༌ང༌ སྐྱོནས༌།
7 ང༌ཞའ༌ ཡོད༌ཁན༌ནི༌ གྲུ༌ཟིང༌, ཞག༌ མང༌པོ༌ ཀུ༌ལེའ༌ མ༌ནེ༌ སྲུལ༌ མ༌ཉན༌, ཡང༌ ཀགས༌པོ༌ ཉམ༌པོ༌ ང༌ཞའ༌ ཀེནེ༌དུས༌ གྱལ༌ས༌ ལེབ༌། ལུང༌རག༌ ཡོད༌ཅེས༌པོའེ༌, ང༌ཞའ༌ ཆེན༌ ཡོད༌ཁན༌ནི༌ ལམ༌མི༌ཀ༌ ཆའ༌ མ༌ཉན༌པ༌, ང༌ཞ༌གུན༌ སལ༌མོ༌ནེ༌ ཆོགས༌ནེ༌ ལུངས༌པོ༌ སྒག༌ཅེས༌ལ༌ ཀེརེ༌ཏ༌ ཚོ༌ལིང༌ ཡས༌པ༌ ཆོགས༌ལ༌ བོར༌ཏེ༌ སོང༌པིན༌། 8 ཡང༌ གྱ༌ཚོའེ༌ ཐའ༌མ༌ ཐའ༌མ༌ནེ༌ མ༌ ཀགས༌པོ༌ ཉམ༌པོ༌ ང༌ཞ༌གུན༌ ཇིགས༌པ༌ མེད༌ ཟེར༌ཁན༌ནི༌ ནས༌ས༌ ལེབ༌, ཀ༌བོ༌ ལ༌སེའ༌ གྱལ༌སའེ༌ ཉེ༌མོའ༌ ཡོད༌པིན༌།
9 ཏེ༌རུ༌ ལེབ༌ཅེས༌ལ༌ མ༌ ཞག༌ མང༌པོ༌ གོར༌, ཡང༌ ནམ༌ཟ༌ རྩོག༌པོ༌ ལུས༌ཤེས༌སི༌ ཏུས༌པོ༌ ལེབ༌པ༌ གྱ༌ཚོའེ༌ ནང༌ང༌ གྲུ༌ཟིང༌ སྲུལ༌ཅེས༌པོ༌ མ༌ ཇིགས༌པ༌ཅན༌ གྱུར༌རད༌པིན༌། པ༌འུ༌ལུའི༌ ཁོང༌གུན༌ལ༌ ཁ༌ད༌ སལ༌ཨིན༌ མོལས༌, 10 "ཕྲོ༌པ༌གུན༌ ངའེ༌ སམ༌བའེ༌ ནང༌ང༌ ང༌དང༌གུན༌ནི༌ བེས༌པོ༌ མ༌ ཇིགས༌ནང༌ཅན༌ གྱུར༌ཅེས༌དུག༌ སམ༌མ༌རག༌, ནོར༌ དང༌ གྲུ༌ཟིང༌ངི༌ ཀོད༌ཀ༌ མ༌ཚད༌ ང༌དང༌གུན༌ནི༌ སྲོག༌གའང༌ སྐྱལ༌ཅེས༌སི༌ ཇིགས༌པ༌ དུག༌།" 11 ཨིན༌ནའང༌ མག༌མི༌རྒྱའེ༌ སྤོན༌བོའེ༌, པ༌འུ༌ལུའི༌ མོལ༌ཁན༌ནི༌ སང༌ གྲུ༌ཟིང༌ སྲུལ༌ཁན༌ནི༌ སྤོན༌བོ༌ དང༌ གྲུ༌ཟིང༌ངི༌ དག༌པོའེ༌ ཟེར༌ཁན༌བོའ༌ ཉན༌ཅེས༌ སམ༌བ༌ཅན༌ ཚོར༌། 12 ཏེ༌ ནས༌ས༌བོ༌ དགུན༌ལ༌ དུག༌ཅེས༌སི༌ ཕིའ༌ གྱལ༌ལ༌ མན༌པ༌, མི༌ མང༌ཆེའ༌བོའེ༌ ཕོ༌ནིགས༌སི༌ གྱལ༌ས༌ ལེབ༌ཅེས༌སི༌ རེ༌ཝ༌ བོར༌ཏེ༌ ཆ༌ཅེས༌ལ༌ ཐག༌ཅདས༌། ཕོ༌ནིགས༌ ཀེརེ༌ཏ༌ ཚོ༌ལིང༌ངི༌ གྲུ༌ཟིང༌ བོར༌སའེ༌ ནས༌ས༌, ཀ༌བོ༌ ལྷོ༌ནུབ༌ དང༌ བྱང༌ནུབ༌ ཅིག༌པོ༌ནེ༌ གྱ༌ཚོའེ༌ ཆོགས༌ལ༌ བེ༌ཏེ༌ ཡོད༌ཅེས༌པོའེ༌ ལུངས༌པོ༌ སྲན༌ཏྲེ༌ ཡོང༌ང༌ མེད༌པིན༌།
གྱ༌ཚོའེ༌ ནང༌ང༌ ལུང༌རག༌ དང༌ ཆུལ༌བག༌།
27:13 ནེ༌ 26
13 ལྷོ༌ ཆོགས༌ནེ༌ ལུངས༌པོ༌ ཇམ༌པོ༌ ཡོང༌ཅེས༌ གོ༌ཟུག༌ ཆའ༌ཅིག༌, གྲུ༌ཟིང༌ སྲུལ༌ཁན༌གུན༌ནི༌ ཕོ༌ནིགས༌ལ༌ ཁམ༌ཟང༌ ལེབ༌ཅེས༌ སོང༌ སམས༌ཏེ༌ ཁོང༌གུན༌ནི༌ གྲུ༌ཟིང༌བོ༌ ཀྲོལ༌ཏེ༌ ཀེརེ༌ཏའེ༌ ཐའ༌མ༌ནེ༌ སྲུལ༌ཏེ༌ ཁྱེརས༌། 14 བིང༌ཏེ༌ ཏུས༌ མང༌པོ༌ཞིག༌ མ༌ཆའ༌ ཀེརེ༌ཏ༌ ཆོགས༌ནེ༌ ལུང༌རག༌ ཀྲག༌པོ༌ ཡོངས༌, ཀ༌བོའ༌ བྱང༌ཤར༌རི༌ ལུངས༌པོ༌ ཟེར༌རད༌པིན༌། 15 ལུང༌རག༌ ཀྲག༌པོའེ༌ ཞས༌ཏེ༌ གྲུ༌ཟིང༌བོ༌ ཕོ༌ནིགས༌སི༌ ཆོགས༌ལ༌ ཁྱེར༌ མ༌ཉན༌པ༌, ཁོང༌གུན༌ནི༌ གྲུ༌ཟིང༌བོ༌ ལུངས༌པོའེ༌ ཁྱེར༌ས༌ ཆོགས༌ལ༌ ཕུད༌ཏངས༌། 16 ཀཱའུ༌ད༌ ཚོ༌ལིང༌ངི༌ ལུངས༌པོ༌ མེད༌ས༌ ཆོགས༌ནེ༌ ང༌ཞ༌གུན༌ ཆའ༌ ཟ༌ནེ༌, སྲོག༌ སྐྱོབ༌བི༌ གྲུ༌ཟིང༌ ཆུ༌ངུན༌བོ༌ ང༌ཞའ༌ མ༌ ཀགས༌པོ༌ ཉམ༌པོ༌ སྐྱོབ༌ཉན༌ཏེ༌ གྲུ༌ཟིང༌ ཆེན༌མོའེ༌ཀ༌ སྟགས༌། 17 ཏེ༌ནེ༌ གྲུ༌ཟིང༌ ཆེན༌མོ༌བོ༌ ཆག༌ཅེས༌ནེ༌ སྐྱོབ༌ཅེས༌ལ༌ ཁོང༌གུན༌ནི༌ སྟག༌ནེ༌ ཡོག༌ ཚག༌པ༌ ཐག༌པ༌ ཉམ༌པོ༌ ལྡམས༌, ཡང༌ གྲུ༌ཟིང༌བོ༌ སིར༌ཏིས༌སི༌ ནས༌སའེ༌ ཁོར༌ལ༌ པེ༌མའེ༌ ནང༌ང༌ ནེར༌ཅེས༌སི༌ ཇིགས༌པ༌ ཡོད༌པ༌ ཁོང༌གུན༌ནི༌ གྲུ༌ཟིང༌ ཀུ༌ལེའ༌ གྲུལ༌ཅུག༌ཁན༌ནི༌ ཡོ༌ལ༌བོ༌ ཆུའི༌ ནང༌ང༌ ཕབས༌, ཡང༌ ལུངས༌པོའེ༌ གྲུ༌ཟིང༌བོ༌ སྲུལ༌ཏེ༌ ཁྱེརས༌།
18 ལུང༌རག༌ དང༌ ཆུལ༌བག༌ སྲན༌ཏྲེ༌ གྲུ༌ཟིང༌བོའ༌ ཕོགས༌པ༌, སྟིང༌མ༌ཞག༌པོ༌ གྲུ༌ཟིང༌ ཡང༌མོ༌ ཅོ༌ཅེས༌ལ༌ ཁོང༌གུན༌ནི༌ ཏེ༌ནང༌ང༌ ཡོད༌ཁན༌ནི༌ ཅ༌ལག༌གུན༌ ཆུའི༌ ནང༌ང༌ ཕང༌ཅེས༌ གོ༌ཟུགས༌། 19 ཞག༌ སུམ༌པའེ༌ ཞག༌ག༌ གྲུ༌ཟིང༌ སྲུལ༌ཁན༌གུན༌ནི༌ གྲུ༌ཟིང༌ སྲུལ༌ཅེས༌སི༌ ལག༌ཆ༌ ཚང༌མའང༌ ཕངས༌། 20 གྱ༌ཚོའེ༌ ནང༌ང༌ ལུང༌རག༌ དང༌ ཆུལ༌བག༌ མ༌ཅད༌ད༌ ཞག༌ མང༌པོ༌ ཉི༌མ༌ ཡ༌ སྐར༌མ༌ མ༌ཐོང༌ པ༌སང༌, ང༌ཞའ༌ ཐར༌ཅེས༌སི༌ རེ༌ཝ༌ མ༌ལུས༌།
21 མི༌གུན༌ནི༌ ཟན༌ མ༌ཟའ༌ ཞག༌ མང༌པོ༌ སོང༌པ༌, པ༌འུ༌ལུ༌ ཁོང༌གུན༌ནི༌ ཕྲོའ༌ ལངས༌ཏེ༌ མོལས༌, "ཕྲོ༌པ༌གུན༌, གལ༌ཏེས༌ ཁྱོ༌ཞ༌གུན༌ནི༌ ངའེ༌ ཟེར༌ཁན༌བོའ༌ ཉན༌ཏེ༌ ཀེརེ༌ཏ༌ནེ༌ མ༌ བིང༌པིན༌ན༌ འི༌ཙོགས༌སི༌ ནོད༌སྐྱལ༌ དང༌ ཀོད༌ཀ༌ སོང༌ཏེ༌ མེད༌གྲོ༌། 22 ཨིན༌ནའང༌ ངའེ༌ ཁྱོ༌ཞ༌གུན༌ལ༌ ཏ༌རུང༌ངའང༌ རེ༌ཝ༌ སྟན༌པོ༌ བོར༌ཅེས༌ལ༌ ཟེར༌རད༌, ཅིའ༌ཟེར༌ན༌ ཁྱོ༌ཞའེ༌ ཕྲོ༌ནེ༌ སུའང༌ མི༌ཤི༌, གྲུ༌ཟིང༌ ཅིག༌པོ༌ ཁྲེས༌སྟོར༌ ཆེན༌། 23 ངའེ༌ ཞབ༌སྟོག༌ ཞུ༌ཁན༌ དཀོན༌མཆོག༌ ཀ༌བོའེ༌ ང༌ ཨིན༌, ཁོང༌ངི༌ ཕོ༌ཉ༌, དའང༌ ཚན༌ལ༌ ང༌ ཡོད༌ས༌ སྐྱོད༌ཏེ༌ 24 མོལས༌, 'པ༌འུ༌ལུ༌ ཇིགས༌ མ༌ཇིགས༌, ཁྱོ༌རང༌ རོམ༌མི༌ གྱལ༌པོའེ༌ དུན༌ལ༌ ཤགས༌ ཅད༌དི༌ ཕིའ༌ ཏན༌ཏན༌ ལེབ༌ཨིན༌, ཡང༌ དཀོན༌མཆོག༌གི༌ ཁྱོ༌རང༌ ཉམ༌པོ༌ གྲུ༌ཟིང༌ངི༌ ནང༌ང༌ ཡོད༌ཁན༌ ཚང༌མའང༌ སྐྱོབ༌ཨིན༌།' 25 ཏེན༌ན༌བོའེ༌ཕིའ༌ ཕྲོ༌པ༌གུན༌ རེ༌ཝ༌ ཐོན༌པོ༌ བོར༌, ངའེ༌ ཨིད༌ཤེས༌ ཅོའད༌ དཀོན༌མཆོག༌གི༌ མོལ༌ཁན༌བོ༌ དྲན༌དྲ༌ གྲུབ༌ཨིན༌། 26 ཨིན༌ནའང༌ ང༌དང༌ངི༌ གྲུ༌ཟིང༌ ཚོ༌ལིང༌ཞིག༌གི༌ ཉེ༌མོའ༌ ཏན༌ཏན༌ ཁད༌ཨིན༌།"
གྲུ༌ཟིང༌ ཆགས༌།
27:27 ནེ༌ 44
27 ཚན༌ 14 ཞག༌ག༌ ང༌ཞ༌གུན༌ ཨ༌དྲི༌ཡཱ༌ གྱ༌ཚོའེ༌ འ༌ངོ༌ ཆོགས༌ལ༌ ལུངས༌པོའེ༌ རིལ༌ཏེ༌ ཁྱེར༌ ཟ༌ནེ༌ ཚན༌ཕེད༌ ཟོད༌ཅིག༌ག༌ གྲུ༌ཟིང༌ སྲུལ༌ཁན༌གུན༌ནི༌ ས༌ཀྱད༌དི༌ ཉེ༌མོའ༌ ལེབ༌ཏིག༌རག༌ ཟེར༌ཨིན༌ ཚོར༌། 28 ཏེ༌ནེ༌ ཁོང༌གུན༌ནི༌ ཆུ༌ ཙམ༌ཤིག༌ ཀོན༌དྲོ༌ དུག༌ ཏབས༌པ༌, མི༌ཀྲར༌ 37 བིང༌, ཡང༌ ཙ༌པིག༌ཞིག༌ སྟིང༌ནེ༌ ཏབས༌པ༌, ཚད༌པོ༌ མི༌ཀྲར༌ 28 བིང༌། 29 གྲུ༌ཟིང༌བོ༌ བྲག༌ག༌ ཕོག༌ཅེས༌སི༌ ཇིགས༌པའེ༌ ནང༌ང༌ ཁོང༌གུན༌ནི༌ གྲུ༌ཟིང༌ སྒག༌ཅེས༌སི༌ ཕིའ༌ གྲུ༌ཟིང༌ངི༌ ཇུག༌ནེ༌ ལྕིན༌ཏྲེ༌ ལྕགས༌ ཏགས༌ཁན༌ནི༌ ཐག༌པ༌ ཞི༌ ཆུའི༌ ནང༌ང༌ ཕབས༌, ཡང༌ ནམ༌ལང༌ཅེས༌སི༌ ཕིའ༌ མོས༌ལམ༌ ཞུས༌།
30 ཏེ༌ནེ༌ གྲུ༌ཟིང༌ སྲུལ༌ཁན༌གུན༌ནི༌ གྲུ༌ཟིང༌ངི༌ གོ༌ནེ༌ ལྕིན༌ཏྲེ༌ ལྕགས༌ ཏགས༌ཁན༌ནི༌ ཐག༌པ༌ ཕབས༌ཟུན༌ ཏངས༌ཏེ༌ ཤོར༌ཅེས༌སི༌ ཕིའ༌ གྲུ༌ཟིང༌ ཆུ༌ངུན༌བོ༌ ཕབས༌། 31 པ༌འུ༌ལུའི༌ མག༌མི༌རྒྱའེ༌ སྤོན༌བོ༌ དང༌ མག༌མི༌ གུན༌ལ༌ མོལས༌, "གལ༌ཏེས༌ འི༌ མི༌གུན༌ གྲུ༌ཟིང༌ངི༌ ནང༌ང༌ མ༌དུག༌ན༌ ཁྱོ༌ཞའེ༌ སྲོག༌ མི༌ཐར༌།" 32 ཏེ༌ནེ༌ མག༌མི༌གུན༌ནི༌ གྲུ༌ཟིང༌ ཆུ༌ངུན༌ ཅིངས༌ཏེ༌ ཡོད༌ཁན༌ནི༌ ཐག༌པ༌ ཅད༌ཏེ༌ གྱ༌ཚོའེ༌ ནང༌ང༌ བུད༌ཅུགས༌།
33 ནམ༌ལངས༌ས༌ཅིག༌ པ༌འུ༌ལུའི༌ མི༌གུན༌ལ༌ ཁར༌ཇི༌ ཟའ༌ཅུག༌ཅེས༌ལ༌ རྩོན༌གྲུས༌ ཅོ༌ཨིན༌ མོལས༌, "ཁྱོ༌ཞའེ༌ ཞག༌ ཅུབ༌ཞི༌ནེ༌ ཕར༌ལ༌ ཇིགས༌པ༌ དང༌ ཐེ༌ཚོམས༌སི༌ ནང༌ང༌ ཁར༌ཇིའ༌ ལག༌པ༌ མ༌རྩེས༌། 34 ཇུ༌ཇུ༌ ངའེ༌ ཁྱོ༌ཞ༌གུན༌ལ༌ སོན༌ཏེའ༌ ལུས༌ཤེས༌སི༌ ཕིའ༌ ཁར༌ཇི༌ ཟའ༌ཅེས༌ལ༌ ཞུ༌ཝ༌ ཕུལ༌ལད༌། ཁྱོ༌ཞའ༌ ཅིག༌གིའང༌ གོའི༌ སྲ༌ཉག༌ ཅིག༌ མི༌ སྟོར༌། 35 ཏེ༌བོ༌ མོལ༌ཏེ༌ སྟིང༌ནེ༌ ཁོང༌ངི༌ ཏ༌གི༌ཞིག༌ ལེན༌ཏེ༌ ཁོང༌ ཚང༌མའེ༌ དུན༌ལ༌ དཀོན༌མཆོག༌ག༌ ཐུག༌རྗེ༌ཆེ༌ ཕུལ༌ཏེ༌ ཅགས༌ཏེ༌ ཟོས༌། 36 ཏེ༌ནེ༌ ཚང༌མ༌ལ༌ ཧམ༌པ༌ སྐྱེས༌ཏེ༌ ཟན༌ ཟོས༌། 37 གྲུ༌ཟིང༌ངི༌ ནང༌ང༌ ཡོད༌ཁན༌གུན༌ནི༌ ཀྲངས༌ཀ༌ 276 ཡོད༌པིན༌། 38 ཁོང༌གུན༌ ཟན༌ ཟོས༌ཏེ༌ གྲངས༌ས༌ཅིག༌, གྲུ༌ཟིང༌ ཡང༌མོ༌ ཆ༌ཅེས༌སི༌ ཕིའ༌ ཁོང༌གུན༌ནི༌ གྲུ༌ཟིང༌ངི༌ ནང༌ང༌ ཡོད༌ཁན༌ནི༌ ཀྲོ༌ནས༌ ཚང༌མ༌ ཆུའི༌ ནང༌ང༌ ཕངས༌།
39 ནམ༌ལངས༌ས༌ཅིག༌ གྱ༌ཚོའེ༌ ཐའ༌མའེ༌ ས༌ཀྱད༌ཞིག༌ ཐོང༌, ཨིན༌ནའང༌ ཀ༌ནས༌ས༌ ཨིན༌ གྱུས༌ མ༌སོང༌། ཉན༌ན༌ གྲུ༌ཟིང༌ ཏེ༌ ས༌ཀྱད༌དི༌ ཉེ༌མོའེ༌ པེ༌མའེ༌ ནང༌ང༌ ཁད༌ཅུག༌ཅེས༌ལ༌ ཁོང༌གུན༌ནི༌ ཐག༌ཅདས༌། 40 ཁོང༌གུན༌ནི༌ ལྕིན༌ཏྲེ༌ ལྕགས༌ ཏགས༌ཁན༌ནི༌ ཐག༌པ༌གུན༌ ཅད༌ཏེ༌ གྱ༌ཚོའེ༌ ནང༌ང༌ ཕངས༌, ཏེན༌ན༌ ཏུས༌ལ༌ གྲུ༌ཟིང༌ ཀྱོག༌ཅེས༌སི༌ ཤིང༌ང༌ ལྡམས༌ཁན༌ནི༌ ཐག༌པ༌གུན༌ ཀྲོལས༌, ཏེ༌ནེ༌ གྲུ༌ཟིང༌ངི༌ དུན༌ནི༌ ཡོ༌ལ༌བོ༌ སྟགས༌ཏེ༌ ལུངས༌པོའ༌ གྲུ༌ཟིང༌བོ༌ ཐའ༌མ༌ ཆོགས༌ལ༌ ཁྱེར༌ཅུགས༌། 41 ཨིན༌ནའང༌ སམ༌ཁན༌ནི༌ སང༌ སྔུན༌ལ༌ གྲུ༌ཟིང༌ངི༌ དུན༌བོ༌ པེ༌མའེ༌ ནང༌ང༌ ཁད༌, ཡང༌ གྱབ༌བོ༌ ཆུལ༌བག༌ ཤེད༌ཅན༌ནི༌ ཞས༌ཏེ༌ ཆག༌ཅེས༌ གོ༌ཟུག༌།
42 ཙོན༌པ༌གུན༌ ཆུའ༌ སྐྱལ༌ཏེ༌ ཤོར༌ཏེ༌ མི༌ཆ༌ཅེས༌སི༌ ཕིའ༌ མག༌མི༌གུན༌ནི༌ ཁོང༌གུན༌ སད༌ཅེས༌སི༌ ཐབས༌ལྡིང༌ངད༌པིན༌། 43 ཨིན༌ནའང༌ མག༌མི༌རྒྱའེ༌ སྤོན༌བོའ༌ པ༌འུ༌ལུ༌ སྐྱོབ༌ཅེས༌སི༌ དོད༌པ༌ ཡོད༌པ༌, ཁོང༌གུན༌ལ༌ ཏེ༌ ཐབས༌ལྡིངས༌ ནང༌ཞིན༌ ཅོ༌ མ༌ཅུགས༌། ཁོའེ༌ བཀའ༌ ཏངས༌, གོ༌མ༌ སྐྱལ༌ཉན༌ཁན༌གུན༌ ས༌ཀྱད༌ ཆོགས༌ལ༌ ཆ༌ཅེས༌ལ༌ ཆུའི༌ ནང༌ང༌ ཆོམས༌, 44 ཡང༌ ལུས༌ཁན༌གུན༌ནི༌ སྤང༌ལེབ༌ དང༌ གྲུ༌ཟིང༌ ཆག༌ཁན༌ནི༌ ཤིང༌གུན༌ནི༌ རོགས༌ ལེནས༌། ཏེ༌ཟུག༌ ཅོས༌ པ༌སང༌ ཚང༌མ༌ ས༌སྐམ༌པོའེ༌ཀ༌ ཁམ༌ཟང༌ བིང༌ཉན༌།