6
1 དཀོན༌མཆོག༌གི༌ ཚན༌ དང༌ ཁོང༌ངི༌ ལབ༌ཞ༌གུན༌ལ༌ ཁྲེལ༌བ༌ མི༌ཁྱོང༌ཅེས༌སི༌ ཕིའ༌, ཏད༌པ༌ཅན༌ ཚེ༌ཡོག༌ ཚང༌མའེ༌ ཁོ༌རང༌གུན༌ནི༌ སྤོན༌བོ༌གུན༌ལ༌ གྱལ༌ལ༌ ཅོས༌ཏེ༌ རྩི༌ཝ༌ ཅོ༌གོ༌ཤེས༌ ཨིན༌ནོག༌། 2 གལ༌ཏེས༌ ཁོང༌གུན༌ནི༌ སྤོན༌བོ༌གུན༌ ཏད༌པ༌ཅན༌ རིག༌ ཨིན༌ན༌, ཏེ༌བོ༌ རྩི༌ཝ༌ ཉུ༌ངུན༌ ཅོ༌ཅེས༌སི༌ རྒྱུ༌ཞིག༌ ཡོང༌ མ༌གོས༌། ཨིན༌ནའང༌ ཏེ༌ ཚེ༌ཡོག༌གུན༌ནི༌ ལས༌ མང༌ང༌ གྱལ༌ལ༌ ཅོ༌གོ༌ཤེས༌ ཨིན༌ནོག༌, ཅིའ༌ཟེར༌ན༌ ཁོང༌གུན༌ནི༌ རྩོན༌གྲུས༌སི༌ ཕན༌ཐོགས༌པོ༌ ཁོ༌རང༌གུན༌ནི༌ ཡ༌ཤ༌ ཅོ༌ཁན༌ ཏད༌པ༌ ཡོད༌ཁན༌གུན༌ལ༌ ཐོབ༌ཏེ༌ ཨིན༌ནོག༌།
ཏི༌མོ༌ཐི༌, ཏད༌པ༌ཅན༌གུན༌ལ༌ ཏེ༌ ལབ༌ཞ༌གུན༌ ལབས༌ཏེ༌ ཁའ༌ ཉན༌ཅེས༌ལ༌ སྤོས༌པ༌ ཏོང༌།
ཟུས༌མའེ༌ ལབ༌ཞ༌ དང༌ དེན༌བའེ༌ གྱུ༌ནོར༌།
6:3 ནེ༌ 10
3 མི༌ ཁ༌ཅིག༌གི༌ ང༌ཏི༌ ལབ༌ཞ༌གུན༌ལ༌ གྱབ༌གལ༌ ཅོ༌སྲིད༌ཅེས༌ ཨིན༌ནོག༌། ཨིན༌ནའང༌ འི༌གུན༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ལབ༌ཞ༌ ཟང༌པོ༌གུན༌ ཨིན༌ནོག༌, ཀ༌བོའེ༌ ང༌དང༌གུན༌ལ༌ དཀོན༌མཆོག༌གི༌ ལམ༌མི༌ ནང༌ང༌ ལྡན༌ ཅུག༌ག༌ནོག༌། 4 ཏེ༌ཙོགས༌སི༌ མི༌གུན༌ ཕོ༌སོ༌ཅན༌ དང༌ ཧ༌མ༌གོ༌ཁན༌ གུན༌ ཨིན༌ནོག༌། ཏེ༌གུན༌ནི༌ ཕན༌མི༌ཐོགས༌སི༌ ལོབས༌པོའེ༌, ཁོང༌གུན༌ནི༌ སྤེ༌རའེ༌ ཏོན༌ཏག༌གི༌ཀ༌ ཛིང༌མོ༌ དང༌ ཕྲབ༌བ༌ནོག༌, ཏེ༌བོའེ༌ ཚིགས༌ཅེས༌, པོ༌བུད༌ཅེས༌, ཞན༌མའེ༌ སྕོད༌པའེ༌ སྐོར༌ལ༌ ངན༌པ༌ ཟེར༌ཅེས༌, ཡང༌ ཞན༌མའེ༌ སྐོར༌ལ༌ སམ༌བ༌ ངན༌པ༌ གུན༌ ལྡན༌ ཅུག༌ག༌ནོག༌། 5 ཏེ༌གུན༌ནི༌ ཏུས༌གྱུན༌ མི༌གུན༌ནི༌ ཕྲོའ༌ ཛིང༌མོ༌ ཆའ༌ ཅུག༌ག༌ནོག༌། ཏེ༌གུན༌ལ༌ དེན༌བ༌ དང༌ ཟུན༌བའེ༌ ཁྱད༌ མ༌ཤེས༌པ༌, དེན༌བ༌ ཆོགས༌ལ༌ རང༌ངི༌ གྱབ༌གྱུར༌ཏེ༌ ཨིན༌ནོག༌། ཏེ༌གུན༌ནི༌ ཁོ༌རང༌གུན༌ ཆུག༌པོ༌ གྱུར༌ཅེས༌སི༌ ཕིའ༌ དཀོན༌མཆོག༌གི༌ ལམ༌མི༌ཀ༌ གྲུལ༌ཟུན༌ ཏང༌ང༌ནོག༌།
6 སེམས༌སི༌ ནང༌ང༌ ཞི༌དེ༌ དང༌ དཀོན༌མཆོག༌གི༌ ལམ༌མི༌ཀ༌ གྲུལ༌ཅེས༌སི༌ དོད༌པ༌ ཡོད༌ཅེས༌པོ༌ ཁོ༌རང༌, ཅིན༌ལབས༌ ཆེན༌མོ༌ཞིག༌ ཨིན༌ནོག༌། 7 ཅིའ༌ཟེར༌ན༌ ང༌དང༌ངི༌ འི༌ ཇིག༌རྟེན༌ནི༌ ནང༌ང༌ ཅའང༌ ཁུར༌ཏེ༌ མ༌ཁྱོངས༌, ཡང༌ འི༌ཀ༌ནེ༌ ཅའང༌ ཁུར༌ཏེ༌ ཆའ༌ མི༌ཉན༌། 8 ཏེ༌བོའེ༌ཕིའ༌ ང༌དང༌གུན༌ལ༌ ཟ༌རྒྱུ༌ དང༌ གོན༌རྒྱུ༌ ཡོད༌ན༌ ཏེན༌ན༌བོའ༌ ཚིམས༌ གོ༌ཤེས༌ ཨིན༌ནོག༌།
9 ཆུག༌པོ༌ གྱུར༌ར༌ ཐད༌ཁན༌གུན༌ ཚོད༌ལྟའེ༌ ནང༌ང༌ གྱེལ༌ཏེ༌, ཏོན༌མེད༌ དང༌ ནོད༌སྐྱལ༌ཁན༌ནི༌ དོད༌པ༌ གུན༌ནི༌ ནང༌ང༌ ཁད༌ད༌ནོག༌, ཀ༌བོའེ༌ ཁོང༌གུན༌ ཞིག༌ཏེ༌ མེད༌ཁན༌ ཆ༌ཅུག༌ག༌ནོག༌། 10 ཅིའ༌ཟེར༌ན༌ ནོར༌རི༌ དོད༌པ༌ ནི༌ ངན༌པའེ༌ རིགས༌ ཚང༌མའེ༌ རྩའ༌བ༌ ཨིན༌ནོག༌། ཡང༌ ནོར༌དོད༌ སྲན༌ཏྲེ༌ ཡོད༌ཁན༌ ཁ༌ཅིག༌ ཏད༌པའེ༌ ཀ༌ནེ༌ མ༌ ཐག༌རིང༌ང༌ ནུར༌ཏེ༌ སོང༌ཏེ༌ ཁོ༌རང༌གུན༌ནི༌ ཕིའ༌ མང༌ང༌ རྡུག༌ངལ༌གུན༌ བྱུངས༌ ཅུགས༌ཏེ༌ ཨིན༌ནོག༌།
པ༌འུ༌ལུའི༌ སྟིང༌ཇུག༌གི༌ ལབ༌ཞ༌གུན༌།
6:11 ནེ༌ 21
11 ཏི༌མོ༌ཐི༌, ཁྱོ༌རང༌ དཀོན༌མཆོག༌ག༌ ཞབ༌སྟོག༌ ཞུ༌ཁན༌ནི༌ མི༌ཞིག༌ ཨིན༌ པ༌སང༌, ཏེ༌ ངན༌པའེ༌ ལས༌ ཚང༌མའེ༌ ཀ༌ནེ༌ ཤོར༌ཏེ༌ སོང༌། ཨིན༌ནའང༌ དྲང༌པོ༌, དཀོན༌མཆོག༌གི༌ ལམ༌མི༌ཀ༌ གྲུལ༌ཅེས༌, ཨིད༌ཤེས༌, ཅེས༌པ༌, ཏད༌པའེ༌ ནང༌ང༌ སྟན༌པོ༌ དུག༌ཅེས༌ དང༌ པས༌མོ༌ མི༌ཚེ༌ཞིག༌གི༌ སྟིང༌རང༌ནེ༌ བང༌ ཏོང༌། 12 རང༌ངི༌ ཏད༌པ༌ སྐྱོབ༌ཅེས༌སི༌ ཕིའ༌ གྱལ༌ལ༌ ཅོས༌ཏེ༌ ནོལ༌། དཀོན༌མཆོག༌གི༌ ཁྱོ༌རང༌ བོད༌ད༌ ཛད༌ཁན༌ནི༌ ཐའ༌མེད༌པའེ༌ མི༌ཚེ༌བོའ༌ སྲན༌ཏྲེ༌ ཐམས༌ཏེ༌ དུག༌, ཀ༌བོ༌ ཁྱོ༌རང༌ངི༌ ཡེ༌ཤུའི༌ ནང༌ང༌ ཨིད༌ཤེས༌ ཅོ༌ཁན༌ནི༌ སྤང༌པོ༌ ཏད༌པ༌ཅན༌ མང༌པོའེ༌ དུན༌ལ༌ ཏངས༌། 13 ཡང༌ ཚང༌མ༌ལ༌ སྲོག༌ སལ༌ཁན༌ནི༌ དཀོན༌མཆོག༌ དང༌ པོན༌ཏིའུ༌ པི༌ལ༌ཏུའི༌ དུན༌ལ༌ སྤང༌པོ༌ ཟང༌པོ༌ སལ༌ཁན༌ནི༌ མ༌ཤི༌ཀ༌ ཡེ༌ཤུ༌ ཉིས༌ཀོའེ༌ སྐུན༌དུན༌ལ༌ ངའེ༌ ཁྱོ༌རང༌ང༌ འི༌ བཀའ༌ཏང༌ངད༌། 14 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབས༌ཕེབས༌ ཚག༌པ༌ ཁྱོ༌རང༌ངི༌ ཁོང༌ངི༌ བཀའ༌ ཐེ༌ཚོམས༌ མེད༌པ༌ སྲུང༌། 15 ཏ༌ ཏེན༌ན༌ ལྡམ༌མ༌ ཛད༌ཁན༌ནི༌ ཏུས༌པོའེ༌ཀ༌ དཀོན༌མཆོག༌, གྱལ༌པོ༌གུན༌ནི༌ གྱལ༌པོ༌ དང༌ གཙོ༌བོ༌གུན༌ནི༌ གཙོ༌བོ༌, ཅིན༌ལབས༌ཅན༌ནི༌ ཀུན༌ཝང༌ ཅིག༌པོའེ༌, མ༌ཤི༌ཀ༌ ནམ༌ཁའ༌ནེ༌ སྔོན༌ ཅུག༌ག༌ ཛད༌ཨིན༌། 16 དཀོན༌མཆོག༌ ཅིག༌པོ༌ ནི༌ མ༌ནེ༌ མི༌ཀྲོངས༌, སུའང༌ ཆ༌ མི༌ཉན༌ཅེས༌སི༌ འོད༌དི༌ ནང༌ང༌ ཁོང༌ ཞུགས༌ཨིན༌, ཁོང༌ སུ༌ཞིག༌གིའང༌ མ༌ནེ༌ མ༌ཇལ༌ཀྱག༌ ཡ༌ ཇལ༌ མི༌ཐུབ༌། ཚང༌མའེ༌ ཁོང༌ང༌ རྩི༌ཝ༌ ཅོ༌ཤིག༌, ཡང༌ ཁོང༌ངི༌ ཝང༌གུན༌ ཏུས༌གྱུན༌ ལུས༌ཤིག༌། ཨ༌མེན༌།
17 འི༌ ཇིག༌རྟེན༌ནི༌ ནང༌ང༌ ཡོད༌ཁན༌ནི༌ ཆུག༌པོ༌གུན༌ལ༌ ཁོ༌རང༌གུན༌ནི༌ ནོར༌གུན༌ནི༌ཀ༌ ཕོ༌སོ༌ དང༌ ཨིད༌ཤེས༌ མ༌ཅོ༌ ཟེར༌ཏེ༌ ལོབ༌, ཀ༌བོ༌ ལ༌མོ༌ ཉམ༌པོ༌ མེད༌ཁན༌ ཆའ༌ ཉན༌ན༌ནོག༌། ང༌དང༌ངི༌ སྐྱིད༌པོའེ༌ ཕིའ༌ སྒོས༌དོམ༌གུན༌ སྙིང༌ ཕེས༌ཏེ༌ སལ༌ལ༌ ཛད༌ཁན༌ནི༌ དཀོན༌མཆོག༌གི༌ ནང༌ང༌ ཁོང༌གུན༌ནི༌ ཨིད༌ཤེས༌ ཡོང༌གོས༌། 18 ཁོང༌གུན༌ནི༌ པེ༌ནེ༌གུན༌ ལས༌ ཟང༌པོའེ༌ ནང༌ང༌ སྐྱག༌ཅེས༌, ལས༌ ཟང༌པོའེ༌ ནང༌ང༌ ཆུག༌པོ༌ གྱུར༌ཅེས༌, སྒོས༌དོམ༌ ཡོད༌ཁན༌གུན༌ནི༌ ཕིའ༌ སྙིང༌ ཕེས༌ཏེ༌ ཏང༌ཅེས༌, ཏུས༌གྱུན༌ ཞན༌མ༌ ཉམ༌པོ༌ བགོ༌ཅེས༌སི༌ ནང༌ང༌ གྲལ༌གྲིག༌ དུག༌ཅེས༌ལ༌ ཟེར༌། 19 ཏེ༌ཟུག༌ ཅོ༌ཅེས༌པོའེ༌, ཁོང༌གུན༌ནི༌ ཡོང༌ཅེས༌ཅན༌ནི༌ ཏུས༌སི༌ ཕིའ༌ ཁོ༌རང༌གུན༌ལ༌ ནམ༌ཁའེ༌ ནང༌ང༌ མག༌ལྡན༌ སྟན༌པོ༌ ཙོགས༌ལ༌ བང༌ཛོད༌ སགས༌ཏེ༌ བོར༌ཨིན༌, ཏེ༌ནེ༌ ཁོང༌གུན༌ནི༌ དེན༌བའེ༌ ངོས༌མའེ༌ མི༌ཚེ༌བོ༌ ཐམས༌ ཐུབ༌ཨིན༌།
20 ཏི༌མོ༌ཐི༌, དཀོན༌མཆོག༌གི༌ ཁྱོ༌རང༌ངི༌ ལག༌ག༌ སྟད༌ད༌ ཛད༌ཁན༌གུན༌ལ༌ གྱལ༌ལ༌ ཅོས༌ཏེ༌ སྲུང༌སྐྱོབ༌ ཅོས༌། ངན༌པའེ༌ སྤེ༌ར༌གུན༌ནི༌ ནང༌ང༌ དྲེས༌ མ༌དྲེས༌, ཀ༌བོའ༌ མི༌ ཁ༌ཅིག༌གི༌ ནོར༌ཏེ༌ ཡོན༌ཏན༌ ཟེར༌རད༌།
21 འི༌ཙོགས༌སི༌ སམ༌བ༌ མེད༌ཁན༌ནི༌ གྲབས༌གུན༌ནི༌ གྱབ༌ནེ༌ གྲུལ༌ཏེ༌ མི༌ ཁ༌ཅིག༌ དེན༌བའེ༌ ཏད༌པའེ༌ ཀ༌ནེ༌ ཐག༌རིང༌ང༌ སོང༌ཏེ༌ ཨིན༌ནོག༌།
དཀོན༌མཆོག༌གི༌ ཐུག༌རྗེ༌ ཁྱོ༌ཞ༌གུན༌ལ༌ སལ༌ལ༌ ཛད༌ཤིག༌།།