1 ཏེ༌བོའེ༌ཕིའ༌ ཨ༌པོ༌ལོས༌ དང༌ ངའ༌, དཀོན༌མཆོག༌གི༌ སང༌ཝའེ༌ ཐབས༌སི༌ སྐོར༌ལ༌, ཧ༌གོ༌ཅུག༌ཅེས༌སི༌ ཁག༌ ཀལ༌ལ༌ ཛད༌ཁན༌ནི༌ མ༌ཤི༌ཀའེ༌ ཡོག༌པོ༌ ཙོགས༌ སམ༌གོས༌ཅེས༌ ཨིན༌ནོག༌། 2 ཏ༌ ཏེ༌ཟུག༌ ཁག༌ཅན༌ ཁག༌ ཀལ༌ཁན༌ནི༌ མི༌བོ༌ ཨིད༌ཤེས༌ཅན༌ཞིག༌ ཡོང༌གོས༌། 3 ཁྲིམས༌པོན༌ ཡ༌ ཁྱོ༌ཞའེ༌ ངའེ༌ ལས༌སི༌ སྐོར༌ལ༌ ཐག༌ཅད༌ ཏང༌ན༌, ངའ༌ ཅའང༌ ཚེར༌ཅེས༌ མེ༌རག༌, ངའེ༌ ང༌རང༌ངེའང༌ ཏེ༌ སྐོར༌ལ༌ ཐག༌ཅད༌ ཏང༌ང༌མེད༌། 4 ངའེ༌ སེམས༌པོ༌ ལག༌མོ༌ ཨིན༌, ཨིན༌ནའང༌ ཏེ༌བོའེ༌ ང༌ ནོངས༌མེད༌ ཨིན༌ཁན༌ ལྟན༌ན༌ མ༌ནོག༌། གཙོ༌བོ༌ ཅིག༌པོའེ༌, ངའ༌ སྟག༌ཅད༌ ཅོའ༌ ཛད༌ཏེ༌ ཐག༌ཅད༌ ཛད༌ཨིན༌།

5 ཏེ༌བོའེ༌ཕིའ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཏུས༌ ཡང༌ན༌ མ༌ཤི༌ཀ༌ ལོགས༌ཏེ༌ ཕེབས༌སི༌ སང༌ སྔུན༌ལ༌, སུ༌ཞིག༌གི༌ སྐོར༌ལའང༌ ཐག༌ཅད༌ མ༌ཏང༌ཤིག༌། ཅིའ༌ཟེར༌ན༌ ཁོང༌ངི༌ ང༌དང༌གུན༌ནི༌ མུན༌ནག༌གི༌ སྦས༌ཏེ༌ ཡོད༌ཁན༌གུན༌ འོད༌དི༌ ནང༌ང༌ ཁྱོང༌ང༌ ཛད༌ཏེ༌ ང༌དང༌ རང༌རང༌ སོ༌སོའེ༌ ལས༌ ཅོ༌ཁན༌ནི༌ གྱུན༌ཚན༌ སྔོན༌ ཅུག༌ག༌ ཛད༌ཨིན༌། ཏེ༌ནེ༌ དཀོན༌མཆོག༌གི༌ མི༌ རེ༌རེའ༌ འོས༌པ༌ ནང༌ཞིན༌ སྟོད༌པ༌ སལ༌ལ༌ ཛད༌ཨིན༌།

6 སྤུན༌གུན༌ ཁྱོ༌ཞའེ༌ ཕན༌ཐོགས༌སི༌ ཕིའ༌ ངའེ༌ ལབ༌ཞ༌ ཏངས༌ཁན༌གུན༌ནི༌ ནང༌ང༌ ཨ༌པོ༌ལོས༌ དང༌ ང༌རང༌ སྤེ༌ ཚུལ༌ལ༌ ཀོལ༌པིན༌། གལ༌ཏེས༌ དམ༌པའེ༌ སུང༌རབས༌སི༌ ནང༌ང༌ "བྲིས༌ཁན༌ནི༌ སང༌ ཐལ༌ཏེ༌ མ༌ཆའ༌" མོལ༌ཁན༌བོའེ༌ཀ༌ སྣང༌ང༌ ཅོའད༌ན༌, ཏེ༌ནེ༌ ཁྱོ༌ཞའ༌ ལོབ༌པོན༌ ཅིག༌, ཞན༌གུན༌ནི༌ སང༌ ཀྲག༌པོ༌ རྩིས༌ཏེ༌ ཁོའེ༌ གྱབ༌ནེ༌ གྲུལ༌ཅེས༌ལ༌ ཕོ༌སོ༌ མི༌ཚོར༌། 7 ཁྱོ༌ཞ༌གུན༌ལ༌ ཏེ༌ཟུག༌ ཐག༌ཅད༌ ཏང༌ཅེས༌སི༌ ཐོབ༌ཏང༌ སུའི༌ ཏངས༌? ཁྱོ༌ཞ༌གུན༌ནི༌ ལག༌ག༌ ཡོད༌ཁན༌ ཚང༌མ༌ དཀོན༌མཆོག༌གི༌ སལ༌ལ༌ ཛད༌ཏེ༌ མ༌ནོག༌ག༌? གལ༌ཏེས༌ དཀོན༌མཆོག༌གི༌ སལ༌ལ༌ ཛད༌ཏེ༌ ཨིན༌ན༌, ཏེ༌ནེ༌ ཁྱོ༌ཞའེ༌ མན༌ཁན༌, དཀོན༌མཆོག༌གི༌ སལ༌ཁན༌ནི༌ ཁྱུད༌གུན༌ནི༌ཀ༌ ཀ༌ཟུག༌གི༌ ཕོ༌སོ༌ ཅོའད༌?

8 ཁྱོ༌ཞ༌གུན༌ནི༌ ལག༌ག༌ སྒོས༌དོམ༌ ཚང༌མ༌ ཡོད༌, ཡང༌ ཆུག༌པོ༌ ཨིན༌ སམ༌མ༌ རག༌ག༌? ཅི༌ ཁྱོ༌ཞ༌གུན༌ནི༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ང༌ཞ༌གུན༌ མེད༌པ༌ ཝང༌སྲུལ༌ཅེས༌ གོ༌ཟུག༌ ཅོ༌ ཚར༌ཏེ༌ ཨིན༌ན༌? ངའེ༌ དོད༌པ༌ ཅོའད༌ དེན༌བའ༌ ཁྱོ༌ཞ༌གུན༌ནི༌ ཝང༌སྲུལ༌ཨིན༌ ཡོད༌ཤིག༌ཕིའང༌, ཏེ༌ནེ༌ ང༌དང༌གུན༌ནི༌ ཉམ༌པོ༌ ཝང༌སྲུལ༌ལད༌གྲོ༌། 9 པར༌པར༌རི༌ག༌ ངའེ༌ སམ༌མ༌རག༌, དཀོན༌མཆོག༌གི༌ ང༌ཞའ༌ མ༌ཤི༌ཀའེ༌ སྐུ༌ཚབས༌གུན༌ ཇིག༌རྟེན༌པ༌ གང༌པོ༌ དང༌ ཕོ༌ཉ༌ གུན༌ནི༌ དུན༌ལ༌ སྟན༌མོ༌ ལྟན༌ན༌ བོར༌ཁན༌ ཙོགས༌ཤིག༌ དུག༌, ཀ༌ཟུག༌གི༌ སད༌ཅེས༌ལ༌ ཁྲིམས༌ཅད༌ ཏང༌ཁན༌ནི༌ མག༌གི༌ ཙོན༌པ༌གུན༌ གྱལ༌ཁའ༌ ཐོབ༌ཁན༌ནི༌ ཁྲོམས༌སྐོར༌རི༌ སྟིང༌ཇུག༌ག༌ བོར༌རད༌།

10 ང༌ཞ༌གུན༌ནི༌ མ༌ཤི༌ཀའེ༌ ཕིའ༌ ཞབ༌སྟོག༌ ཞུ༌ཅེས༌པོའེ༌, ང༌ཞ༌གུན༌ སམ༌མེད༌ ཙོགས༌ཤིག༌ ཐོང༌དུག༌, ཨིན༌ནའང༌ ཁྱོ༌ཞ༌གུན༌ནི༌ མ༌ཤི༌ཀའེ༌ ནང༌ང༌ མངས༌ཏེའང༌ ཁས༌པ༌ རིག༌ ཨིན༌ སམ༌དུག༌། ང༌ཞ༌གུན༌ འུ༌ཐུགས༌ རིག༌, ཁྱོ༌ཞ༌གུན༌ ཤེད༌ཅན༌ རིག༌། ཁྱོ༌ཞ༌གུན༌ལ༌ རྩི༌ཝ༌ དང༌ ང༌ཞ༌གུན༌ནི༌ཀ༌ ཧབ༌གོད༌ ཏངས༌། 11 དག༌སའང༌ ང༌ཞ༌གུན༌ལ༌ སྟོག༌ཤེས༌ དང༌ སྐོམ༌ཤེས༌ ཡོང༌དུག༌, ཡང༌ ང༌ཞ༌གུན༌ ཀོས༌ལག༌ སྙིང༌པ༌ ཅད༌པོ༌ གོན༌ནད༌། ང༌ཞ༌གུན༌ལ༌ རྡུང༌གྱབ༌ ཏངས༌, ཡང༌ དུག༌སའེ༌ ཁང༌པའང༌ མེད༌། 12 མི༌ཚེའེ༌ སྒོས༌དོམ༌གུན༌ རིག༌ཅེས༌སི༌ ཕིའ༌ ང༌ཞ༌གུན༌ནི༌ སྲན༌ཏྲེ༌ ངལ༌ངལ༌ ཚོག༌པ༌ལ༌, ང༌ཞ༌རང༌ངི༌ ལག༌པ༌ནེ༌ ལས༌ ཅོའད༌། ང༌ཞའ༌ ངན༌ ཏབ༌ཁན༌གུན༌ལ༌ ང༌ཞ༌གུན༌ནི༌ ཅིན༌ལབས༌ ཏང༌ངད༌། ནགས༌ ལྟན༌ ཟ༌ནེ༌, ང༌ཞའེ༌ ཟོད༌པ༌ ཉམ༌པོ༌ ཁུར༌རད༌། 13 ང༌ཞའ༌ ངན༌ ཏབ༌ཁན༌གུན༌ལ༌ ང༌ཞ༌གུན༌ནི༌ སྤེ༌ར༌ ཟང༌པོ༌ ཉམ༌པོ༌ ལན༌ཏང༌ངད༌། དག༌སའང༌ ང༌ཞ༌གུན༌ལ༌, ཇིག༌རྟེན༌ གང༌པོའེ༌ ཐུག༌ཤོག༌ རིགས༌ངན༌ མི༌གུན༌ མ༌ཚད༌, ཁྱིམ༌ས༌ ཁམ༌ལོག༌ ཙོགས༌ ཐེ༌རུག༌།

14 ངའེ༌ འི༌ ཟེར༌ཁན༌ ཚང༌མ༌ ཁྱོ༌ཞ༌གུན༌ལ༌ ཁྲེལ༌བ༌ ཅོ༌ཅེས༌སི༌ ཕིའ༌ བྲིའ༌མེད༌, ཨིན༌ནའང༌ ང༌རང༌ངི༌ ཅེས༌པའེ༌ ཕྲུ༌གུ༌གུན༌ ཙོགས༌ལ༌ སྤང༌པུད༌དད༌། 15 ཁྱོ༌ཞ༌གུན༌ལ༌ མ༌ཤི༌ཀའེ༌ སྐོར༌ལ༌ ལབ༌ཁན༌ སྟོང༌ཅུ༌ ཡོད༌ནའང༌, ཁྱོ༌ཞ༌གུན༌ལ༌ སེམས༌ཉིད༌དི༌ ཐོག༌ནེ༌, ཨ༌བ༌ ཅིག༌ ཡོད༌ཏེ༌ ཨིན༌ནོག༌། ཅིའ༌ཟེར༌ན༌ ནམ༌ ངའེ༌ ཁྱོ༌ཞ༌གུན༌ལ༌ གའ༌མོའེ༌ ནས༌ཚུལ༌ ཤདས༌, ང༌ མ༌ཤི༌ཀ༌ ཡེ༌ཤུའི༌ ནང༌ང༌ ཁྱོ༌ཞ༌གུན༌ནི༌ ཨ༌བ༌ གྱུར༌ཏེ༌ ཨིན༌པིན༌།

16 ངའེ༌ ཁྱོ༌ཞ༌གུན༌ལ༌, ང༌ ཙོགས༌སི༌ མི༌ཚེ༌ ཕུད༌ཅེས༌ལ༌ སྙིང༌ནེ༌ ཞུ༌ཝ༌ ཕུལ༌ལད༌། 17 ཏེན༌ན༌བོའེ༌ཕིའ༌ གཙོ༌བོའེ༌ ནང༌ང༌ ངའེ༌ ང༌རང༌ངི༌ ཅེས༌པ༌ དང༌ ཨིད༌ཤེས༌ཅན༌ནི༌ བུ༌ཚ༌ ཏི༌མོ༌ཐི༌ ཁྱོ༌ཞ༌གུན༌ ཡོད༌ས༌ ལམ༌ཅུགས༌པིན༌། མི༌ཚེ༌ ཕུད༌ཅེས༌སི༌ སྐོར༌ལ༌ ཀ༌རུང༌ས༌ ཆོས༌ཚོགས༌ ཚང༌མའེ༌ ནང༌ང༌ ངའེ༌ ལབ༌ཁན༌ ཙོགས༌སི༌ མི༌ཚེ༌, ངའེ༌ མ༌ཤི༌ཀ༌ ཡེ༌ཤུའི༌ གྱབ༌ནེ༌ གྲུལ༌ཨིན༌ ཕུད༌ཁན༌བོའེ༌ སྐོར༌ལ༌ ཏི༌མོ༌ཐིའི༌ ཁྱོ༌ཞ༌གུན༌ལ༌ ཨིད༌ཏུ༌ སྐུལ༌ཨིན༌།

18 ང༌ ཁྱོ༌ཞ༌གུན༌ ཡོད༌ས༌ ཡང༌སྐྱར༌ ཐུག༌ག༌ལ༌ ཡོང༌ང༌ མ༌ནོག༌ སམས༌ཏེ༌, ཁྱོ༌ཞ༌གུན༌ནི༌ ཕྲོ༌ནེ༌ ཁ༌ཅིག༌ ཕོ༌སོ༌ཅན༌ གྱུར༌ཏེ༌ ཡོད༌ཏིག༌རག༌། 19 དཀོན༌མཆོག༌གི༌ ཐུག༌གོངས༌ ཡོད༌ན༌, ང༌ གྱོགས༌པ༌ ཡོང༌ཨིན༌། ཏེ༌ནེ༌ ངའེ༌ ཏེ༌ ཕོ༌སོ༌ཅན༌གུན༌ནི༌ སམ༌བ༌ མེད༌ཁན༌ནི༌ སྤེ༌ར༌ ཡ༌, ཁོང༌གུན༌ནི༌ ནང༌ང༌ དཀོན༌མཆོག༌གི༌ དེན༌བའེ༌ ཝང༌ཆ༌གུན༌ ཡོད༌ཁན༌བོ༌ ལྟ༌ ཐུབ༌ཨིན༌། 20 ཅིའ༌ཟེར༌ན༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ དུག༌ཁན༌གུན༌ནི༌, སྤེ༌ར༌ ཅིག༌པོ༌ མན༌པ༌ དཀོན༌མཆོག༌གི༌ ཝང༌ཆའེ༌ ནང༌ང༌ མི༌ཚེའེ༌ ཕུད༌ད༌ནོག༌། 21 ཁྱོ༌ཞ༌གུན༌ནི༌ ཀ༌བོ༌ ལྡམ༌མད༌? ང༌ ཁྱོ༌ཞ༌གུན༌ ཡོད༌ས༌ བེར༌ཀ༌ ཁུར༌ཏེ༌ ཆད༌པ༌ ཅད༌ད༌ལ༌ ཡོང༌ང༌ ཡ༌, ཅེས༌པ༌ དང༌ སེམས༌ཉིད༌ པས༌མོ༌ ཉམ༌པོ༌ ཡོང༌?