1 Leꞌca esquie liꞌihua bee enduꞌ, uzuꞌcuꞌhua nú rni bee uzanaꞌhua xne scua rialane, equie nú nzeli arquiꞌhua Jesucristo. 2 Nu mandamiento rluti nú rni nú yucu cuendaꞌahua lunú ucuaqui uꞌna Diose luaꞌahua tunu zucuaꞌahua mandamiento nú rni: “Uluꞌcu ulaꞌna lu paꞌlu cuna lu naꞌlu, 3 para nú huañi nzeꞌcalu nu huañixeelu lu iliulabe quieꞌ.”

4 Nu leꞌca esquie liꞌihua bee paa cuna bee naa, la detehua lunú rriꞌinuhua bee enduꞌhua para nú la leebeei equie cuendaꞌ nucuaꞌ, mejora ubiꞌya nzeꞌcahua liꞌibeei, uniꞌhua bezeteꞌ lubeei nu uzeꞌtehua liꞌibeei tucu nú niarquiꞌ Diose.

5 Nu liꞌihua bee enu rriꞌi riñaꞌ bee bene, uzuꞌcuꞌhua nú rni bene enu rriꞌihua riñaꞌlu lu iliulabe quieꞌ, nu diquinuꞌ arquiꞌhua uluꞌcuhua ulaꞌna lubeella, nu uzuꞌcuꞌhua nú rni beella, uriꞌihua xineca nú rriꞌihua riñaꞌ Jesucristo.

6 Uriꞌihua riñaꞌ beella, nu la riꞌihuane chenu riꞌyatsia beella luhua para nú yaꞌna nzeꞌcahua lubeella, sino que uriꞌihua riñaꞌ beella xi neca nú sibiꞌhua lu Jesucristo, equie nú neli rriꞌihua tucu nú niarquiꞌ Diose nú riꞌihua. 7 Uriꞌihua riñaꞌ beella diquinuꞌ arquiꞌhua, uriꞌihuane xi neca nú rriꞌihua riñaꞌ Jesucristo xne la necatsiae riñaꞌ bee bene. 8 Nu liꞌihua nediyaꞌlaꞌhua nú cada bee bene, mase nú necalla mosoꞌ urre lacalla mosoꞌ, pero deteꞌ Jesucristo lulla nú riala nú atiꞌlla equie nú neca nzeꞌca uriꞌilla.

9 Leꞌca esquie liꞌihua bee patrón, aca nzeꞌcahua lubee mosoꞌhua, la riꞌihua nú nehuana zeca beella. Xne liꞌihua nediyaꞌhua nu liꞌinu enu rnibiyaꞌ lubeella nu luhua nzucunu liñibe nu ante lunu iguale neca ye bee bene.

10 Leꞌca nia luhua bee saꞌa enu nzeli arquiaꞌahua Jesucristo nú utsutaꞌ arquiꞌhua lunú neca tucu necatselaꞌahua cuna liꞌinu, lunú chiquiꞌ rnibiyaꞌnu. 11 Ubiꞌyahua liꞌihua cuna elietsaꞌ Diose para nú tsutaꞌ arquiꞌhua, nu para nú la riꞌi bezeꞌlu ana luhua nú zequienui liꞌihua. 12 Xne la liunuaꞌahua bee bene lu iliulabe quieꞌ, sino que rliunuaꞌahua cuna yelu clasiaꞌ bee benechiquiꞌ, sia bee enu rluꞌcu nú rnibiyaꞌ, cuna enu rluꞌcu elu usticia, cuna ye beelá bee espírituꞌ bezeꞌlu nú nuꞌ, nu rnibiyaꞌ lu iliulabe quieꞌ. 13 Enzeꞌe ubiꞌyahua liꞌihua cuna poder nú rliquiꞌ Diose luhua para nú riquiꞌhua lu xitse beenú nehuana nzeꞌta zecahua, nu utsutaꞌ arquiꞌhua mase secahua lunú secahua. 14 Utsutaꞌ arquiꞌhua lunú neli neca nú nediyaꞌlaꞌhua, nu uyanalahua tucu nú riala nú huañihua. 15 Ucuaꞌa tsiñahua para nú ixiuleꞌehua lubee bene bee bedichiaꞌ nzeꞌcaꞌ Jesucristo nú rriꞌi nú nzuxe arquiꞌ bee bene lu Diose. 16 Nu lu yeene la zañiꞌhua lunú nzu tenelí arquiꞌhua, nú neca nú rriꞌi elietsa luhua luye beenú necha neca nú nzeꞌta lu bezeꞌlu. 17 Nu lunú utsilaꞌa Diose liꞌihua nucuaꞌ neca nú recanuꞌ liꞌihua, nu stichiaꞌnu neca xi neca tucu espada nú rliquiꞌ Espíritu Santo luhua. 18 La tsanaꞌhua nú rnacuꞌhua lu Diose. Uzequiehua lunu nu unaꞌcuhua lunu yebichia cuna elietsaꞌ Espíritu Santo. Utsutsiñahua unaꞌcuhua lunu nu la llacaꞌhua, nu unaꞌcuhua lunu equie cuendaꞌ ye bee beneꞌnu. 19 Leꞌca unaꞌcuhua lu Diose lu cuendaa para nú liquiꞌnu bee bedichiaꞌ nú riala nia para nú aca ixiuleꞌene lubee bene sin nú lliquia, nu nia bee bedichiaꞌ nzeꞌcaꞌ Jesucristo nú rni nú xneca tsilaꞌa bee bene. 20 Uxeꞌla Diose liꞌá para nú ixiuleꞌa bee bedichiaꞌ nzeꞌca quieꞌ, enzeꞌe nchiñia niꞌcuꞌ nee. Pero unaꞌcuhua lu Diose para nú la lliquia nia equie cuendaꞌnu tucu nú riala nú nia.

21 Tíquico, enu neca tucu bee saꞌahua enu chiquiꞌ seꞌcaꞌahua enu neli rriꞌi elietsa luaꞌahua lunú sibiaꞌahua lu Jesucristo, liꞌilla ixiuleꞌella luhua lu ye nú xa nzucuaꞌa caꞌa nu xi rriꞌá. 22 Xne para enzeꞌe xeꞌlalla luhua para nú ixiuleꞌella luhua nú xa nelluaꞌaru caꞌa, nu scua duꞌlla ana arquiꞌhua.

23 Nacua lu Diose nú ye bee saꞌahua enu nzeli arquiaꞌahua Jesucristo liquiꞌnu nú nzuxe arquiꞌhua, cuna eluseca, cuna nú chililá arquiꞌhua Paꞌahua Diose nu Jesucristo enu rnibiyaꞌ. 24 Diose riꞌi nú cha nzeꞌca lu cuendaꞌ ye bee bene enu neli seca Jesucristo enu rnibiyaꞌ. Amén.