JOELE
Poropeta akali Joele lenge dokona lao arome pii kuki lama iki silyamano. Baa yuu anjokorape Anatunya yulu pyuo kareyape lao see nalyamano. Buku dake yuu Pesa wambu dupwame iso kareyaminyi dokopa ee kana 400 W.K. pao 500 W.K. dokopa piya ingilyamo. Isaraele wambunya yuu peparae dokona aimbu ama malu mee bii lao epo ee peparae nao oto peyaminyi dokope dee neta rao panyi andake pipala ee dupwa ama rao rakusi reyamo arome pii dolapo pyasi palamo. Joele baame randa andake dolapo eparambi doko kandapala repe repe lamaingi pii ingyuo lamaiya. Suu pyao Anatu baa rolae lengenyili pyuo pii nange wambu dupwa randa mairamo yuu gii doko repeta epeyamo doko siya. Poropeta akali dokome wambu dupwa Anatu rekya lao yaki nyiyami dupwa dee koo dupwa yaki nyuo kapu kyuo epena leya. Dopa pirami dokopa Kamongome nakama pyuo elyape keta pisaro lao lalu lao leyamo doko lamaiya. Pii mende poraiyuo sepenge doko Anatumi banya imambu doko wambu peparae keta peyaro leya doko akali keta enda keta wane keta wanake keta endemo alemope keta peyaro lao lalu lao leya.
Pitame Joelena poropeta pii Imambu epara leyamo doko (2:28-32) Pendekose yuu gii dokopa angi pyaka silyamo lao soo oteya (Aposelena Yulu 2:16-21).
1
1 Dake Kamongona wai pii Petuwelena ikinyingi Joele lenge doko keta maiya.
Ee Nengepe Pyao Kokwa Siyasa Ee Lao Yamaranguyami
2 Selapa, nakama wambu andapae dupwa.
Wambu peparae yuu Juta dokona karaminyi dupwa peparaeme selapapeko.
Yulu dapale mende
emba ando karene yuu gii dokopape panda embena rakane ando kareyamo yuu gii dokopape mende piyase?
3 Dokona lao nakamana wane wanake dupwa lamaipwape.
Dokopa nakamame nakamana wane wanake manjiraminyi dupwa lamairami dokopa
dupwame rengya wai kiso nyeraminyi dupwa lamairami.
4 Aimbu ambo dupwa epo ee jingi dupwana minyarambuyami.
Ambo mendeme neyamo pyarepala peya doko ambo enakaya nao dee dokome neyamo pyarepala peyamo doko mendeme nao piyami.
5 Doko girapo jingi waene enenge wasarami dupwa kokwa sipyamo dokona
nakama ipwa biya nenge dupwa sipurao lenge rapala ee lao yamarangwalapape.
Nakama ipwa waene nenge dupwa ee lalapapeko.
6 Akali rara mendeme yanda pinya nyuo suku pingi dopale ingyuo
aimbu epo malu palyapala namwana ee yuupi nao otami.
Nakama ama malu porai wakasa yaka lao sukusa paa napengele.
Nakamana nenge wanga dupwa mena laenena nenge dopale.
7 Nakamame namwana isa girapo marange dupwa kokwa simi
dee namwana piki isa dupwa nao rango pyanyi nembami.
Dopa pyuo isa yanenge nao rekya lao nembaminyisa
wangya dupwa kuli kewa lasi karaminyi.
8 Dokona nakama wambu dupwa wanake akali nyelana pingi kumulyamopa
ee lao kumanda petenge dopale ingyuo ee lalapape.
9 Waene nengepe tembole anda dokona Anatu mairami mende see nalyamo.
Dokona purisi dupwa Kamongo nenge jingi maingi dupwa ingi rando karaminyi.
10 Nenge witi jingi dupwa kokwa soo nembo
girapo dupwa yanda nao
olipi dupwa kyapuo pipya.
Dokona yuu mee muiyane sipyamo dokona
yuu dokome wambu ingyuo ee lao yamarangyuo silyamo.
11 Witi jingipi bali jingipi dee ee nenge dupwa peparae kokwa siyamo dokona
nakama ee rapu pingi dupwa mona rando ee lao karalapape.
12 Girapo isape piki isape dupwa kumalana kuliya.
Jingi lyuo nenge isa dupwa peparae kumapala yando nao karaminyi.
Dopa pipala wambu dupwana rae maingi renge dupwa inyimungu rali pipya.
13 Nakama purisi dupwa Kamongona kana pyare lasi dokona bange kiso maingi dupwa
kumanda piso komau pingi dupwa pipala
tembole anda dokona papala yuu gii ee lao piso yanganyi retalapape.
Nakamana Anatunya anda dokona nenge waenepe mairami mende see nalyamo dokona dopa pyuo pisipwape.
14 Wambu dupwa nenge wasaka pyuo malu palyuo petena lamaiyalapape.
Akali mupwa dupwape mee Juta wambu dupwape peparae elyambu pipala
nakamana Kamongo Anatu dokona tembole anda dokona kolando papala
Anatu kando ee lao lalapape.
15 Kamongona yuu gii doko repeta epelyamo.
Eparamo dokopa Anatu Porai Wakasa dokome pyao kokwa sinya lao randa andake jera.
Yuu gii dokona paka renge wakasa epara.
16 Namwana lenge angi dokome wambo kandamwanopa nenge jingi dupwa kokwa sinyi nembapya.
Dokopa namwana Anatunya tembole anda dokona rae maingi renge mendepe see nalyamo.
17 Yuu yando dokona ee waingi dupwa kumulyamo.
Dokona nenge jingi nyuo malu palyuo retarami ingya nalyamo.
Dopa piramo dokome nenge jingi retenge anda dupwa mee kwua karo momo nao lalyara.
18 Rambi mena nenge dupwa pali napyasa
mena bulamakao dupwa lopapala kae lao karaminyi.
Mena sipisipi kaparo karaminyi dupwa opetae lopalyaminyiko.
19 Isareme rapala pinginyili pyuo
rambipi isape yando nelyamo.
Dopa pipyasa nambame Kamongo emba keta ee lao piso silyu.
20 Dopako pyuo ipwa guu lengepe rambi andenge pandape dupwa isareme renge dopale ingyuo kyapuo yando nelyamo dokona
mena rae lenge dupwame kamameko emba kando ee letaminyi.