IPURU
Buku Ipuru dake Kurisene wambu dupwa randa wakasa nyuo karo dokopa Kurisene kata doko oo yaki nyuo kaeyalana suu piyamisa pyao maiya. Pepa pyao maiyuo Kurisene yulu doko porainyi pyambuo lasaka pyuo lao dokopa Yesu Koraisa doko Anatumi baa yuu gii lumwa pyuo ingyuo jipyaŋa dee dopale mende jii naraŋa, leya. Dopa pyuo lamaiyuo dokopa renge angi remana lao kyawa palyuo leya. (1) Yesu baa letena renge palenge Anatunya Ikinyingi angingyuo Rakangena pii kamba laa nao randa dupwa baa keta nyuo siyamo dokome Anatupa rape rape lara ingiya. Anatunya Ikinyingi dokome lao poropeta akali wamba lao kareyami dupwape aŋalape Mosesemoo pipya manda manja nao epeya. (2) Anatumi Yesu baa purisi akali wambo kareyami dupwa pipya manda manjarande daaŋa baa purisinya panda nyuo karalu kararaŋa lao lao paneya. (3) Yesu keta Kurisene wambu koo renge paka rengepe wanjo lete kararami, leya. Ipuru wambunya misi yulu dokona mena yakape pyao kiso maiyuo yulu piyami dupwa mee rengya baa eparaŋa lao kongwalu palyuo pyakamyuo kareyamisa piya. Dokona Yesu angi doko epapala dokopa baa range purisi mupwa ingyuo karapala wambu lete wai pyao nyuo karara ingiya.
Rombo 11 dokona pyao dokopa Ipuru akali lapo wamba kareyaminyi kingi minyuo londao karamano dupwame apa pyuo Anatu kapa ingingi lao suu pyao kareyami lao arome pyao lapala enakana yaka larami wambu dupwa dopale ingyuo mondo lao mee pyuo karena lao leya. Rombo 12 dokona yaka larami dupwa pii lakondako pyuo lamaiyuo, Kurisene nakama randa epeya kande dokopa Kurisene yulu yaki nyii napala kare kare soo Yesu lenge wakale rao yaki nyii nao baako suu pyaro soo randa nyuo pipwape, lao piya. Buku dakena repe repe piipi mana pii ingyuo dopa pyuo pipingi dapa pyuo karapenge laope pii dolapome lao kii palyuo pyao oteya.
Buku Dakena Pii Palamo Dusipa
1. Lumwa pyuo dokopa Anatumi Koraisa keta pii leya 1:1-3
2. Koraisame aŋala dupwa pipya wakasale ingyuo karamo 1:4—2:18
3. Koraisa baa Mosese Josuapa pipya manda manja nalyamo 3:1—4:13
4. Koraisa baa purisi wamba kareyami pipya manda manja nalyamo 4:14—7:28
5. Koraisana kana minyuo lalu lao lenge pii enenge dokome wamba kana minyuo lasi pii dokona kamame ketae ingyaro karamo 8:1—9:28
6. Koraisa baa mena yakape kiso maingi dokona panda nyilyamo 10:1-39
7. Yesu kapa ingingi lao suu pingi renge dokome Kurisene yulu peparae renge kuiyaro karamo 11:1—12:29
8. Lao oto doko Kurisene yulu dokona lao porainyi pyambuo leya 13:1-25
1
Anatumi Banya Ikinyingi Keta Pii Leya
1 Wambo dokopa Anatumi namwana akali kyawa dupwa banya poropeta akali dupwa keta pii lamaipa piya. 2 Epapu yuu gii repetale lumwa pira ingyapyamopa banya Ikinyingi keta pii langiya. Anatumi Ikinyingi keta yake yuupi wasapala karo dupwa peparae banyaŋa lapala baa maira ingilyamoko. 3 Ikinyingi doko Anatu peparae isa komba pyapala Rakangena yanga paupau lenge doko neta ranyi peenge. Banya pii porainya renge paleta dokome yuu muu dupwa peparae renge kuiyuo minyaro karenge. Baa isa wambunya koo dupwana pyuo elya pyuo nyepala yake pandana mupwa Anatu dokona kingi rolaerename pao peteya.
Yesunya Kingi Doko Kamame Ketae Ingyuo Palamo
4 Ikinyingi akali doko aŋala dupwa pipya baa ketae ingyuo rombo palyiyamopa banya kingi maiyamo doko dolomana kingi dupwa pipya manda manja naya. 5 Anatumi aŋala anjukusi kando,
Emba nambana ikinyingiŋi
epapu dakepa nambame embena Rakange ingyuo karoŋo,
lamaiyase? Dee Anatumi aŋala dupwana mende kando,
Aŋala dokona namba Rakange ingyuo kararo
baa nambana ikinyingi ingyuo pelyamo,
leyase? 6 Anatu baame banya Ikinyingi mupwa doko isa panda repetale mapanyi peeyalana karo dokopa dopa pyuo leya.
Nambana aŋala peparaeme
banya kingi lao mona kando pisarami.
7 Baa aŋala dupwa suu pyao dopa leya.
Nambana aŋala dupwa porambaiye dopale ingyuo pena lao
kendemande dupwa yulu poo rele lao pinya lao mairu,
leya. 8 Dopa pyuo leyamopape Ikinyingi kando dopa leya.
Emba Anatuŋu, peparae isa karalu karare lyakande
rolaena renge palyuo embena wambu dupwa rolae dokome iso karenge.
9 Emba yulu rolae dupwa rae maipala
koo dupwa epekanda nao karene.
Dopa pyuo pipinyipa embena Anatu baame
emba mamba wele kiso kiŋi inginyi pyambuyamopa
rae maiyuo iso karalu karare.
Doloma embapa manda manja nara.
10 Dee pii mende konda pyuo leya doko,
Kamongo embame kanda soo dokopa
yuu muu dupwa peparae wasii.
Rangena kingi dokome yake doko wasiipya.
11 Wasiinyi dupwa mee ingyuo rali piramopape
emba yapo karalu karare.
Komau wambarae dupwa kwao penge
doko suu pyao bange peparae kwaoko para.
12 Komau kwaelyamo dokopa nembapala enenge nyingi
doko suu pyao yake yuupi
embame alowa pyuo enenge ingyare.
Dopa pyuo pirinyipape
embako ema napala mee karalu karare.
13 Anatumi aŋala anjukusi kando,
Emba epapala nambana kingi rolaerename pisarinyipa
nambame embena nyisu petenge dupwa
Anamasi minyapala emba keta jeronopa
mee kalya naro karare,
lamaiyase? 14 Yulu dokore aŋala dupwa keta mai naya. Nakama Anatunya kendemande imambu karaminyi dokona baame wambu yake panda parami dupwa nyisala pena lao mapanyi peenge.