1 Epapu nambame mawa pii nakama jilyu dupwa rape rape lao kandokondali pyuo minyuo karalapape. Dokona lao Kamongo dokome nakamana rora ambasu dupwa kando yuu jeroŋo lao lalu lao leyamo dokona nakama ama malu soo kaeyo ingyaramopa palyuo kararami. 2 Dokona ee kana akalisa kisima epo peyamo dusipana nakamana Kamongo Anatumi yuu muiyane dokona kata londena lanyuo epeyamo doko suu pyalapape. Baame nakama keta randa wakale wakale dupwa pyuo dee nakamana mona dokona aki mende suu pilyaminyi lao kandope banya mawa pii dupwana warombo soo minyuo karamipi lao nakama makande pyuo yulu piyamo doko suu pyalapape. 3 Doko baame nakama lopanyi nembeya. Dopa pipalape dokopa enakana baame nakama nenge myana lenge doko nalapa lao jiya. Jiyamo nenge doko nakamape nakamana rora ambasu dupwamepe wamba nakanju nao kanda nange. Baame dopa piyamo dokome nakama mana langyuo, Akali borete iki nao lete kara nange. Anatunya kambunya pii epelyamo dupwa soo lete karenge, leya Kamongome. 4 Ee kana doo akalisa kisima dusipana nakamana komau dupwana mendepe kangyuo nyisa paa nao nakamana kimbu dupwa rondo lao pii naya. 5 Dokona rakange dupwame nakamana wane wanakepe dupwa mana lao pyalana pyuo rolenge dopale ingyuo nakamana Kamongo Anatu dokome nakama randa joo sukundi ingyuo kiso rolo mana langingi doko suu pyalapape. 6 Dokona lao nakama Kamongome mana langilyamuli pyuo pyuo karalapape. Dee banya mawa pii dupwana letamuli pyuo minyuo palyuo karo baa mupwaŋa lao suu pyao pako karalapape. 7 Nakamana Kamongo Anatu dokome yuu keyange amenge pingi dokona nakama minyuo epopyamo. Yuu doko ipwa ponape ipwa guu lengepe dee ipwa isa yuunya palu potemo epapala yuu lama lama dupwanape dee yuu kyau dupwanape ranju epo pengepe 8 dee yuu doko nenge witipi balipi isa girapo isa piki isa pomekeranate isa olipi dupwana jingipi amburali ipwangepe singi dokona nakama lanyuo epopyamo. 9 Dokona nakama kamame lopome kumuope panda kapa kararamali lao bange nyelana suu pyaraminyi dupwa yangyarande daa. Dopa piramopa yuu dokona kana dupwana kapa palenge. Dee yuu kyau dupwana kone kana dopale mende apu rao nyerami. 10 Nenge peparae naramili lao nakama keta sera. Yuu amenge pingi nakamana Kamongo Anatu dokome nakama jiyamo dokona ange lao kararami.

11 Nakamana Kamongo Anatu doko nakamame kame sisaramano lao kandokondali pyuo karalapape. Banya mawa pii nambame epapu nakama jilyu dupwana mendepe isa paa nana lao kando rape rape lao karalapape. 12 Nakama nenge naramili dupwa kapa seramo dokopape anda keyange paliraminyi dupwa pyuo otapala dokopape 13 nakamana mena bulamakao sipisipi dupwape nakamana kana kulingi golope dee nakamana bange wakale wakale peparae dupwa malu ingyuo kapa soo piramo dokopa 14 nakama range ketae pyambuo lakandelyaminyi lapala nakamana Kamongo Anatu dokome nakama yuu Isipi karapusi ingyuo kendemande yulu pyuo kareyaminyipa kiiramo nyuo lanyuo epeya doko kame sisarami kando karalapape. 15 Yuu muiyane andake koo singi kau kyalende popokyalyape singi dokona baame nakama suku suku nyuo lanyuo peya. Yuu yando nasi ipwa epa nange dokona nakamana lao baame kana dokona piso ipwa guu lanyi peya. 16 Yuu muiyane dokona nenge rara wakale myana lenge nakamana rora ambasu dupwame nao kanda nange doko nakama nalapa lao jiya. Randa joo lumwa dokona baame bange keyange joo nakama elyape keta pisaroŋo lao baame nakama randa joo makande piya. 17 Dokona lao nakama rangena porai dokome porainyi pyambuo yulu dupwa kamonganyi nembo pyuo karamano lao suu pyaa nalapape. 18 Nakamana Kamongo Anatu dokome porainya renge nakama jiyamosa kamonganyi nembo karamano lao poraiyuo suu pyalapape. Nakamana rora ambasu dupwa keta lao kana minyuo lalu lao leyamo dokona yaki nyii nao minyuo karoŋo lao yulu dake pipyamo pilyamo. 19 Nakamana Kamongo Anatu doko ama kame see napala anatu wakale dupwana yulu pyakamyuo lakando paa nalapape. Doko kaepala nakama dopa pirami ramo Anatumi nakama pyao kokwa soo nembara lao repe pii langilyu. 20 Nakama wambako pao kararaminyuipa Kamongome rara wakale dupwa pyao kokwa soo nembara doko suu pyao nakama Kamongona pii warombo soo kara narami ramo doko baame nakama pyao kokwa soo nembarako.