DUTARONOME
Mawa Pii Dokona Yuu Gii Lapo Pyuo Lamaiyamo Pii Doko
Isaraele wambu dupwa yuu muiyane dokona piso epo yuu Moape dokona karo yaki nyepala yuu Kenane pena pyuo kareyami. Isaro kareyaminyi dokopa Mosese baame mawa pii malu wambu banya elyambu piyaminyi dupwa boo pyao lamaiya lao Buku kingi Dutaronome dakena palamo.
Kingi Dutaronome doko Mawa Pii Dokona Yuu Gii Lapo Pyuo Lamaiyamo Dopale. Rombo 5-26 dasipana Sainai kyau dokona lowa lamaiyamo dokona kambako lamaiyuo dokopa lapo konda pyuo leya.
1. Rombo 1-4 Mosese baame ee kana akalisa kisima wambo wambu dupwa auwa pyuo Anatu lakando kareyaminyi dupwa dee moŋo nyiyaminyi arome pii dupwa boo pyao kareya. Mosese dopa lamaiyuo, Anatumi nakama yuu muiyane oko soo rolae lanyuo peyamo doko kame see napala nakama Anatu mata kando pii laa nao baa laramuli pyuo pelapape, leya Moseseme.
2. Rombo 5-28 Mosese baame mawa pii akalisa dusipa suu pyao wambu dupwa lamaiya. Lamaiyuo dokopa mawa pii mendaki mupwa dokona renge doko poraiyuo boo pyao lamaiya. Anatu yeelyo moko minyuo lakandamanale. Dopa lapala mawa pii wakale wakale dupwa Isaraele wambu dupwa soo nyinya lao Moseseme lamaiya. Isaraele wambu dupwa yuu Anatumi maiyalu maiyuo maiyamo dokona kareyaminyi dokopa wambu dapwame mawa pii dusipa waso kararami lao lamaiya.
3. Rombo 29-30 Anatumi namwana rakange kongwalu dokona lao suu pyao karalapape lao Moseseme lamaiya. Lamaiyamo dokopa Anatunya mawa pii dupwa keta namwa kyaka ingyuo karamanale lao lamaiya.
4. Rombo 31-34 Josua baa Anatumi lamaiyuo banya wambu dupwa iso karena lao rombo palyiya. Palyiyamo dokopa Moseseme Anatumi Isaraele wambu dupwa rape rape lao kareyamo dokona lao kenane mende pyao dee nakama Anatumoo yalya kando karalapape lao pipala dokopa baa kumuya. Yuu Moape dokona ipwa Jotane neta epenge kata dorena Mosese kumuya.
Buku dakena renge reeko mende palamo doko dake. Anatu baame banya wambu rombo pyasi dupwa mona reto kyawa lete nyuo elyape keta pisiya. Dokopa enakana banya wambu dupwa dokona lao suu pyao Anatu leyamuli pyuo mona reto pisirami. Dopa pirami ramo lete wai pyao Anatunya rae maingi doko nyuo kararami.
Buku dakena rombo dusipana liti lyakae dusipa rombo 6 liti 4 lao pao liti 6 dokona palamo pii dasipa, Nakamana monape nakamana imambupi nakmana porainya rengepe dupwa peparaeme Kamongo nakamana Anatu doko mona retalapape. Yesu baame mawa pii wakale mawa pii palamo dake kapa manda manja nara leyapya.
1
Wamba Piyami Pii Doko
1 Neta pyakaenge ipwa Jotane dorena yuu muiyane dokona pao kareyaminyi dokopa Moseseme Isaraele wambu dupwa pii lamaiyamo dupwa buku dakena pyasi palamo. Wambu dupwa ipwa Jotane rapu yuu Supi repeta kareyami. Yuu Parane taone doko pakirena siya. Dee yuu Topele taonepe Lepane taonepe Aserote taonepe Disakape taonepe dupwa pakirena siyamo kanya dokona nakama kareyami. 2 Yuu Sainai kyau dokona piso yuu Itome dokona kyau pyalya pyana pingi dokona kata pao karo yuu gii akalisa ipisu mendaki nembo yuu Katese Paneya dokona pao kando nyingi. 3 Isipi yaki nyuo epeyaminyipa ee kana akalisa kisima epo peyamopa yuu gii mupwa kana akalisa ipisu mendaki dokona Moseseme wambu dupwa Kamongome pii lamainya lao lamaiyamo dupwa peparae lamaiya. 4 Kamongome Amo wambunya kiŋi Saiyone lenge yuu Esepone taone doko isingi dokope dee Basane wambunya kiŋi Oke lenge yuu Asatote Etetipi taone dolapo isingi dokope pyao anamasi minyapala enakana pii dusipa Mosese lamaiya. 5 Yuu Moape dokona ipwa Jotane neta pyakaenge dorena pao kareyaminyi dokopa Moseseme Anatunya Mawa Pii dupwa kanda soo polo mana lamaiya.
Moseseme lamaiyuo lao, 6 Namwa yuu Sainai kyau dokona kareyamano dokopa namwana Kamongo Anatu dokome namwa kando dopa langyuo, Nakama yuu kyau dakena yuu andarele karaminyi, leya. 7 Nakamame nakamana pinji dupwa pyao rapa rapa pipala komau anda dupwa lalyuo minyuo yuu mendasa parami. Yuu kyau pyalya pyana pingi Amote wambu kareyaminyi dokonape dee yuu dokona awali laope ipwa Jotane rapu dokonape yuu kyau pyalya pyana pingipi yuu lama lama dupwanape yuu donarenamepe dee ipwa kota Metitaraniane kipwa kipwa dokonape yuu Kenane dokonape pao yuu Lepanone kyau dokona dumurena ipwa Yuporisa pona andake ama nanesa dokona parami. 8 Yuu dake peparae namba Kamongo dokome nakamana rora ambasu Aporakamemoo Aisakemoo Jekopemoo dee dupwana para pyaraminyi dupwa mairu, lao lalu lao leyo. Yuu dokona pao palyuo karalapape.
1:9—3:29 Isaraele wambu yuu Sainai yaki nyepala yuu muiyane dokona kata peyaminyi dokopa Anatumi nakama keta yulu andake pyakamiyamo dupwana lao suu pyapala Mosese pyao reteya.