2 PITA
Pitana pepa lapo pyuo piya dakeme Kurisene wamba kareyaminyi dupwana andarele maiya. Angi renge mende soo kandapala pepa dake piyamo doko mana pii kyambo lapo leyamisa dokona kepo pingi yulu pyaka siyasa kandapala piya. Anatu Kamongo Yesu Koraisapa soo nyingi renge dokome yulu koo dopale anamasi minyarami ingilyamo. Soo nyuo anamasi minyarami kata doko wambu Yesu Koraisa angi kando banya mana pii leyamo soo kareyami dupwa keta mana nyingi, leya. Pii dake wambu lapome Koraisa baa dee epa nara leyamisa dokona poraiyuo suu pyao reto maiya. Pitame wambu lapome Yesu pande epa nalyamo lao suu piyaminyi dokona baame wambu dupwa mende koo keta paa namili lao mona kapu kyapena lao isaro karapyamo pilyamo, leya.
Buku Dakena Pii Palamo Dusipa
1. Pii kanda soo piya 1:1-2
2. Anatumi Kurisene wambu kee lao sukusa nyiya 1:3-21
3. Kyai pyuo mana lenge akali dupwa 2:1-22
4. Yesu Koraisa dee epo otara doko 3:1-18
1
Yako Lenge Pii Doko
1 Namba Saimone Pita Yesu Koraisana aposele akali dokome banya kendemande yulu pyuo karo. Anatu Lete Wai Pyao Nyingi Yesu Koraisapa rolae pingi dolapome Kurisene suu pingi keyange maiyamo yango dupwa keta pepa dake pyao jilyu.
2 Nakamame Anatu dee namwana Kamongo Yesupa soo nyilyaminyi dokona mona kyuu lao singi rengepe mona keyange palyuo ipingi rengepe nakama jokondali pinya lao leto.
Anatumi Nakama Kee Lao Sukusa Nyiya
3 Yesu baame wakasa keyange neta renge ingyuo karamo dokome role pyao kararami lao ipupwape letamo. Anatumi Yesu keta banya yake pandana porai renge dokome imambunya renge keyange angingyuo nyisarali dupwa jiya. Baame keyange dusipa 4 jeroŋo lao wambo lasaka pilyamo. Ene angi nyerami dokopa isa pandana suu pingi koo wambu kokwa singi dupwa wanjo karapala baa yale ingyuo kararami. 5 Anatunya keyange wakasa dupwa kandalana lao suu pyarami ramo doko Anatu baa kapa ingingi doko iki suu pyao kara nao yulu keyange dupwa pyuoko kararami. 6 Dee doko iki daa. Anatu soo nyepala rangena yulu dokona kame pyuo pyuo karalapape. Banya yulu pyuo kaeya napala Anatunya Imambunya yulu iki suu pyao kararami. 7 Wambu yango dupwa mona retapala Anatu dokona mona maiyuoko karalapape. 8 Yulu rolae dupwana wangu lakao pyuo kararami ramo doko Kamongo Yesu Koraisa soo nyepala banya yulu rolae pyuo kararami ingilyamo. 9 Yulu rolae dusipa pii nange wambu dupwame nakamana koo doko kwuanyi nembakaya kande doko kame sepala nakamana lenge kwaelyamo dokome angingyuo kandapa nalyaminyi.
10 Yangonemoo Anatumi nakama kee lao sukusa nyiyamo dokona rolae pyuo karalapape. Dopa pyuo pirami ramo nakamana Kurisene yulu isa paa nara. 11 Isa paa naramopa namwana Kamongo Lete Wai Pyao Nyingi Yesu Koraisana isingi panda keyange doko nyerami.
12 Dokona lao nakama renge keyange dusipa soo pingi pyapala kareyaminyipape nambame kaeya nao langyuoko kararo. 13 Yulu rolae dusipa pipwape lao kaeya nao laoko karo doko kumarono dokopa lili pira doko keyange lao suu pilyu. 14 Nambana yongo kakapange oo repetale yaki nyerolyamo dokona lao Kamongo Yesu Koraisame pii repa repa pyuo langipya. 15 Dokona ingyuo namba wambo nakamana kata wapwapala enakana kumuo paronopa nambana pii dupwa soo manjo kararami ingilyamo.
Koraisa Neta Renge Ingyuo Kareyamo Doko Kandeyama
16 Namwana Kamongo Yesu Koraisa porai wakasa doko kapu kyuo epara lao karamano doko mee sinju pii ingyuo laa nalyamano. Baa yanga paupau lao kareyamo doko rangena lengeme kandeyama. 17 Rakane Anatu yake panda dokona yanga paupau lao karapala banya kingi ketae nembo lao, Dake nambana Ikinyingi mona retelyo doko, namba banya yulu kyanyi kandelyo leyamo doko soo kareyama. 18 Namwa baapa yuu kyau yapasi dokona role pyao kareyama doko pii yake panda rae epeyamo doko range rolae siyama.
19 Dokona ingyuo poropeta akalimi pii leyami doko kinyi ingyuo pelyamo kandelyamano. Nakamame pii doko lambe ingyuo minyuo panda iminjiyamo dokona yanganyi retenge. Dokona leyami dupwa suu pyale pyale pupwape. Pii doko rao pelyamo dokome yuu yangapala nakamana mona anda dorena yanganyi peeyara. 20 Pii mende kyawa ingyuo leto dake kame see nalapape. Doko pii nolakayaminyi Baepolena pyasi palamo dupwa akali mendeme dokona kandapala range suu pyao kapa polo laa nara ingilyamo. 21 Doko isa wambumi sipurapala lao kareyaminde daa. Imambu Poo Pyasimi wambu maralyiyamopa Anatunya pii doko nolakayamisa piya.