1 Wambu peparaena lao piso singipi ateŋa lengepe kee lengepe sangyu lengepe lao pii dusipa mupwa ingyuo Anatu kando lamaiyalapape lao poraiyuo langilyu. 2 Namwa mona kyuu lao seramopa elya kalo Anatunya Imambunya yulu pyuo yulu rolae dupwa suu pyao karamwali lao Anatumi kiŋipi gapomanepe dupwa nyiso karena lao ateŋa lakamyuo karamana. 3 Yulu keyange dopale dokome namwana Lete Wai Pyao Nyingi Anatu doko rae mainyi pyambungi. 4 Anatumi wambu peparae lete wai pyao nyelana banya pii angi soo nyimili lao suu pyao karamo. 5 Anatu baa mendaki iki karo, dee kanya akali mendaki doko Anatu akalipa nyuo pakao pingi doko Koraisa Yesuko karo pingi. 6 Akali peparae kiiramo nyelana baa range kumuo maiya. Dokome Anatumi akali peparae pyuo nyelana suu piya, yuu gii rolae doko pyaka sera dokopa panara. 7 Renge dokona lao namba Juu daa rara wakale dupwana aposele akali ingyuo nakama mana lao karare lao waili pii angipi Anatu kapa ingingi lao suu pingipi dokona lao Anatumi namba mapanyi nembeya. Doko nambame kyambo letonde daa. Kinyi leto.

8 Anatu iki suu pingi dupwa imbuo apiyanda pyuo lao kara napala yuu muu dupwana peparae ateŋa lao karamili lao suu pilyu.

9 Pii mende doko enda dupwa nakama inyimungu mona palenge ingyuo piso nakama range komau kapa pira dupwa mondo lao wapunya. Dopako pyuo wambu kandamili kandamili lao kyawasi kalya pyuo kupinyi dorena palya dakena palya nalapape. Moŋokyaŋe soo mola wakale wakale dupwame kalya pii nao kana malu penge komaupi wapuo pii napenge. Dee kalya wakale wakale lapo opetae pii kaena. 10 Yulu keyange dupwa nyuo komau ingyuo wapurami. Dopa pirami doko Imambunya kata ingyuo paramisa pira. 11 Misi anda dupwana nakama range inyimungu pii laa nao mee petena. 12 Endame mana pii lao nakamame akali rapu pili lasarami kaena leto. Nakama mee elya kalo petena. 13 Doko Anatumi Atame baa wambo ingyuo wasapala Ipi enakana wasiya. 14 Dee Sataneme akali keta wambo panga soo maralya naya. Enda doko dokona rambu lapala keta panga soo maralyamopa enda dokome Anatunya lowa pii dokona kamba leya. 15 Dopa piyamopape enda dupwa Yesu kapa ingingi lao suu pyao mona nembo Anatunya Imambunya yulu pyuo inyimungu pisarami ramo dokopa wane mandenge yuu gii pyaka sera ramo Yesumi iso karara.