JOPO
Buku dakena akali keyange Jopo lenge dokome randa nyiya. Randa nyuo banya ikinyingi wanengepe dupwa peparae kumuyami dee banya mena pinjipi dupwa peparae kokwa siyami dee banya rangena yanengena yasu neyako. Randa nyiyamo dokopa Jopo banya puu minyingi rema dusipa pipya dokona lao wato lao peteyami. Wato leyaminyi pii doko yaka lapala namwame Jopo banya randa nyepala banya mona dee banya suu pingi apa pyuo paleya dee banya puu minyingi dusipa Jopona randa kandapala aki pii lamaiyaminyi doko serama.
Akali kisimame lao peteyaminyi dokopa pii andake mende dopa lao dokopa Anatumi wambu dupwa keta apa pyuo yulu pingi dokona lao leyami. Lao oteyaminyipa Anatumi Jopo range keta paneya. Jopope banya puu minyingi dusipapena rora ambasu dupwame suu pyao dokopa Anatumi wambu yulu keyange pingi dokopa au pinya pyambusingi dee wambu yulu koo pingi dokopa randa maingi doko rora ambasu dupwame dopa leyami. Jopona puu minyingi dusipame rora ambasunya pii dokona lao sepala Jopo baame yulu koo piyamosa randa nyilyamo lao lamaiyami. Dopa lamaiyaminyipape Jopome namba akali wakale ingyuo yulu keyange pingi lao kando dokona lao akipamo moŋo nyuo karo nambana puu minyingi dupwana pii doko kyambo lenge pii dopa lao siya. Lao soo Jopome namba randa malu dupwa nyipunu dokopa Anatu baa akipamo nyisa nao kareyape dopa lao poraiyuo Anatu piso siya. Jopome Anatu kapa ingingi lao suu pingi doko yaki nyii nayamopape namba akali keyange karo wambu dupwanako yako lao ketae pyambungi pii doko lena Anatu Jopo yulu koo pii nayamo doko lapyali yaka lao suu pyao kareya. Jopo dopa lao suu pyao kareyamopa enako Anatumi range banya porai renge mona palyuo soo nyingi rengepe Jopo lasaka pyuo Jopona imambu yalalena piya.
Jopona piso siyamo dusipa Anatu baame randa nao suu pyao soo nyera lao isingi lamai naya. Dopa pii nayamopape Jopome Anatu yaki nyii nao piyamosa Anatumi Jopo range rekya lao yaki nyii naya. Dokopa Jopome kuki ingyuo inyimungu karo Anatu emba andake wakasa mona palyuo soo nyingi renge ingyuo karalu karenge lao banya mumu lenge pii doko kondo leya. Jopona puu minyingi akali dusipa Jopona randa nyiyamo renge doko soo gisa nayaminyisa Anatumi nakama pii lao nembeya. Nakama dopa piyaminyipape Jopo baame iki Anatu baa wakasa doko soo gisiya. Dokopa Anatumi Jopo pinji menape malu enenge dupwa ikinyingipi wanengepe enenge dupwa wambo manda manja minyuo kamba maiyamo pii doko buku dakeme oto pyasi palamo.
1
Satane baame Jopo makande
pyuo kandeya
pyuo kandeya
1 Yuu Ase dokona akali mende kingi Jopo lenge doko kareya. Karapala baa elyape ingyuo yuu peparae yulu rolae pyuo kareya. Dee akali doko Anatu pakale pakale lao lakando pyuo yulu koo dupwa wanjo kareya. 2 Baame wane yanda ipingi nyepo dee wanake rema manjo pingi. 3 Banya mena sipisipi dupwa taosande yanda ipingi nyepo (7,000) kareyami. Banya mena kamele dupwa taosande rema (3,000) kareyami. Banya mena bulamakao yale kingi okese lenge dupwa taosande mendaki (1,000) kareyami. Banya mena donge andete kingi paki (500) kareyami dee banya kendemande akali soo kaeyoko kareyami. Kareyaminyipa Jopo baa yuu neta pyakaenge dorena kamongo doloma manda manja nayamo kareya.
4 Kareyamo dokopa akali dokona ikinyingi dupwame yuu gii enenge pyaka silyamo dokopa nakamana anda range dupwana nenge malu palyuo napapu pingi. Yuu gii dokopa nakamana pemalenge rema dusipa dae nengepe ipwape nala epena lapapu pingi. 5 Yuu gii dusipana nenge nao otelyaminyi dokopa akali Jopo banya ikinyingi dupwa kee lapala nakama kando ateŋa lakamyuo poo pyasi ingyuo pinya lao lapapu piya. Wamba kukwa sipurapala baaame wane dusipa suu pyao mena mendaki mendaki lao wakale wakale pyapapu pyakamiya. Pyakamipala dokopa dopa lao leya. Nambana ikinyingi dupwa koo mende piyami ramo doko Anatu mata maiyami ramo dokome dopa rapisi lao pilyu.
6 Yuu mende yake panda karenge dupwa Anatupa wato lala epeyaminyi dokopa Satane opetae epo peteya. 7 Epeyamo dokopa Kamongome Satane lamaiyuo, Anja piso ipisi? lamaiya.
Lamaiyamo dokopa Satane isingi lamaiyuo, Yuu muu dokona kata papyuo karo pulyuo pao lupyuo epo paeyalya paeyana pyuo karo ipu, lamaiya.
8 Lamaiyamo dokopa Anatumi Satane piso soo, Embame nambana kendemande akali Jopo doko apyakale karamo lao soo karepe daa? piso siya. Akali mende baa yale kara nalyamo. Baa iki akali elyape ingyuo yuu peparae yulu rolae pyuo karamo. Baame namba Anatu pakale pakale lao lakando pyuo yulu koo dupwa waso karamo kande.
9 Dokopa Satane baame Kamongo isingi lamaiya. Jopo baame emba keta nyiso karulipi nao kararo lao kingi lakandengepe? Doko kinyi daase? 10 Embame baa range banya ree palupi banya bange dupwape peparae nyuo arapunya palyuo minyakamyuo karenge kandale. Embame banya yulu piya doko ando keyange ingyuo pena lao baa rangena mena wai kiso yuu keta pinya lao nyiso karene. 11 Karenepape embame banya bange dupwa minyando randa mairi ramo doko baame Kamongo embena lenge kambunya karo embena kingi kokwa soo lara, Sataneme lamaiya.
12 Lamaiyamo dokopa Kamongo dokome Satane lamaiyuo, Kapa, see. Bange baa ayapya dupwa peparae embena porai dokona silyamo. Sipyamopape banya yongo doko kokwa see napipi, lamaiya. Lamaiyamo dokopa Sataneme Kamongo baa rekya lao peya.
Jopona Mena Wanepe Pyao Uki
Aki Minyiya
Aki Minyiya
13 Yuu gii mendepa Jopo banya ikinyingi porai dokona anda ikinyingi menge dupwa pipya role pyao nengepe ipwa waenepe yalya kando nao peteyami. 14 Peteyaminyi dokopa pii minyuo papingi akali mendeme epo Jopo lamaiya. Mena bulamakao yale kingi okese lenge dupwame ee dokona isa ipyuo nyuo yuu apu rao karamwano dokopa mena donge dupwa isayoko nao mee repeta karami. 15 Karaminyipa Sapeyane akali dupwame waiya lao epo mena dupwa minyarala nyepala kendemande akali dupwa pyao kumami. Pyao kumakamisa namba iki pyakao epo emba langyala epano, lamaiya.
16 Pii doko ene lao wetapa nayamo dokopa kendemande akali mendeko epo lao, Yuu pele yake panda dokona piso Anatumi malyasa epo mena sipisipi kendemande akalipi dupwa nao otalamo. Namba iki pyakao epo emba langyala epano, lamaiya.
17 Lamaiyamopa dee akali dokome lao kareyamo dokopa kendemande akali mendeko epapala lao, Kalitia akali dupwa liti rema ingyuo mokwa soo waiya lao epapala mena kamele dupwa minyarala nyepala kendemande akali dupwape peparae pyao kumakaminyi dokopa namba iki pyakao epo emba langyala epano, lamaiya.
18 Dopa lao kareyamo dokopa akali mendeko epo pii lamaiya. Embena ikinyipi wanenepe dupwa nenge nao ipwa waene naope wane porai dokona anda pisimi. 19 Pisiminyi dokopa porambaiye andake doko yuu muiyane dokona piso minyuo epapala anda kyukyunaya dusipana lalyalamo. Lalyapala pisiminyi dokona boo lao palipala wane wanake dusipa pyao kumalamo. Namba iki pyakao epo emba langilyu, lamaiya.
20 Lamaiyamo dokopa Jopo roya karo banya komau pilyini nembapala yuu dokona mukumbwalo sepala baa randa epeyamo dokona kyawasi angasi pyao Anatu lakandeya. 21 Dee baame leya. Namba anyimi ene doo manjo nyepeyamo dokopa namba komau yambalepe wapuo epa nayo doko suu pyao kumuo paro dokopa dopako piru. Kamongo bange jiyamo dokome range nyuo pwuamo. Pwuamo dokona banya kingi doko lakandapenge, leya.
22 Randa malu epeyamopape Jopo yulu koo pii nao Anatu keta sero suku laa naya.