Published by

THE BIBLE SOCIETY OF PAPUA NEW GUINEA

The Shorter Old Testament

and the

New Testament

in

Kyaka Enga

Papua New Guinea

ISBN 9980 63 012 4

© BSPNG

NT first edition 1973

NT second edition 1980

OT, NT third edition 1987

Buku Wambarae dokona pii peparae pali nalyamo. Akipamo pii lapo kunjepala pali nalyase? Renge doko epapu dakepa wambu dupwa Ole Tesamene pii dupwame nakama Nuu Tesamene renge angi dupwa soo nyerami dupwa yaka lamili lao wambo kapu kyilyamano. Peparae kapu kyuo otamwali ee kana ama malu nembo yulu pimwali. Dokona lao yuu rakyame wambu dupwa Baepole nyimili. Enakana wambu lapome pii peparae kapu kyuo otamwali lao suu pyarami ramo doko kapa pirami.

Ee kana lapo epo paparamopa wambu lapome Baepole renge ama rolae lao pii dae pyasi palamo dupwana pii dupwa kuki alowa pinya suu pyarami ramo doko kapa pirami lao suu pilyamano.

Arome pii lapo buku Matyu Make Luku dusipa peparaena pyasi palamo. Akalimi pii pyao reteyaminyi dupwame sitoripi pii lengepe mendakinya palyuo leyaminyipape kata kuki wakale wakale dusipana leyami. Akalimi Baepole pii pyao dokopa nakama pii peparae pyao reta nayami. Nakamame yulu lapo Yesumi piyamo dupwape pii lapo leyamo dupwape mupwa lao suu piyami dupwa iki yapo nyepala rangena buku dokona pyao reteyami. Baepole piyaminyi akali mendaki mendaki lao dupwame renge mupwa mende nakamana pii dokona lasaka pipuli yaka lao suu pyao pii lapo yapo nyepala pyao reteyami. Yuu gii mendaki iki dokona pyao reteyaminde daa. Nakama ee kana wakale lapona pyao reto dee wambu wakale dupwana lao pyao reteyami. Pii wakale wakale pyao reteyaminyi dupwame namwa nyiso epapu Anatumi namwa keta apa piru lao suu pilyamo dupwa pano lasi palamo. (Jone rombo 21 liti 25 kando yaka lare.)

Liti lapona renge angi doko panapa nalyamo. Wambu lapome pii renge dokona kata mendenya palyuo laminyipa dee lapome mende pyuo letaminyi. Namwa pii kapu kyingi wambu dupwa buku malu mee yaka lao renge rolae doko koto kando karo pii dake pyao retelyamano.

Wamba Baepole kanda soo pyao reteyaminyi dokona pii paleyamo dokona wambu lapome enakana nyepala rangena kingimi pepa wakale mendena pii doko pyao reteyami. Dopa pyuo karo pii lapo alowa pyuo dee lapo isa pao pyuo piya rapisi. Dopa pyuo pepa enakana ingyuo pyao nyiyaminyi dokona wambo piyamo doko kapa kapa pyuo nyepala pyao reta nayami. Dokona lao wambu wakale wakale dupwame renge pii kata wakale wakalena soo nyilyaminyi.

Ingilisi dee Pisini Baepole lapona pepa isarena dokona yaka lenge wambu dupwa nyisarali pii kuki lapo pyasi palamo. Namwa Kyaka pii Baepole dokona pyao reta nalyamo.

Make dopale [|] kame pipala kanya dokona pii lapo pyasi palamo. Pii kanya dokona palamo dokome pii angi dokona lapo dopa piya lao mondo lao langilyamo.

Atame Ipapa yuu gii dokona piso pao Yesu mandeyaminyi dokona pyaka sepala pao dakepa ingyuo dupwa ee kana taosande malu pasi karamo. Ee kana malu doko apa pyuo nyisaramopa yaka lao separamase? Dokona lao kongwalu pii lapona makande pyuo lapala serama.

Doko kauwange mendaki| doko ee kana 25 dopale karengepya lao serama ramo doko ee kana andete mendaki (100) dokona kauwange kisima| ingyuo karapapu kumungipya.

Aporakame karo mandeyamo pao Yesu epeyamo kanya dusipana kauwange 80 ingyuo karo kumuo peyamipya. Yuu gii doo kareyami dusipa ee kana taosande lama (2,000) epo peya.

Yesu mandeyaminyi dokona piso epo namwa karamano dakena liti pyuo doko kauwange 80 ingyuo kumuo pumi. Ee kana dusipa ee kana taosande lama (2,000) oo epo panya pilyamo.

Dokona lao Aporakame kareyamo dokona piso namwa karamano dakena liti pyuo doko peparae ee kana taosande kisima (4,000) epo pelyamo.

Atame kareyamo dokona piso Aporakame kareyamo dokona ee kana malu epo peya. Namba angi doko soo gisapa nalyamano.