BUKU BAEPOLE 2 TIMOTI 1

2 TIMOTI

Pole baa andapae dokome banya role pyao yulu pyuo nyiso pingi akali parange Timoti lenge doko dopa pyuo karare dapa pyuo karare lao nyiso pii lao pepa pase lapo pyao maiya. Renge angi doko Timoti baa maka nao yulu poraiyuo pyuo karena leya. Poleme Timoti mona porainyi pyambuo baa Yesu Koraisana lao pii polo lalana elya nao karena lamaiya. Pii angi Waili Pii Keyange dokonape Buku Baepole Ole Tesamene dokonape pyasi palenge dupwa minyuo karena lamaiya. Wambu dupwame baa pyalana pyuo randa maiyuo kararaminyipape Anatunya pii mana lao kata papyuo misi lao waili pii keyange doko polo lamaiyuo karena lamaiya.

Pii wakale wakale lao yanda pii nana lao Poleme Timoti repe repe pii lamaiya. Pii dopale dokome wambu nyisa napala serami wambu dupwa mee kokwa serasa pingi.

Poleme Timoti kando karo namba pinginyili pyuo pinya lamaiya. Poleme Yesu kapa ingingi lao suu pyao mona reto maka nao kare kare soo yulu poraiyuo pyuo karo wambu randa maiyaminyipa baa randa nao kareyamo doko suu pyao Timoti dopako pinya lamaiya.

Buku Dakena Pii Palamo Dusipa

1. Pii kanda soo leya 1:1-2

2. Timoti kando lakando mona porainyi pyambuo pii leya 1:3—2:13

3. Dopa piri lao repe repe pii lamaiya 2:14—4:15

4. Pole baa apa pyuo karo lao Timoti lamaiya 4:16-18

5. Pii lao oto leya 4:19-22

1 Namba Pole Koraisa Yesunya aposele akali Anatu pipili lao suu piyamuli pyuo mapanyi nembeyamopa Anatumi lete karenge nyerami lalu lao leyamo dokona Koraisa Yesumoo nyuo pakao karamano.

2 Nambana mona retenge wane Timoti emba keta pepa dake pyao jilyu. Rakane Anatu namwana Kamongo Koraisa Yesupana mona keyange palyuo ipingipi sakao nyiso karenge mona kyuu lao singipi emba keta palena lao leto.

Anatu Kando Ange Lao Banya Yulu Dokona Pinya Lao Porainyi
Pyambuo Lenge

3 Nambana rora ambasupimi Anatu lakando mona suu pinginya pyapi pyuo soo lenge dokona namba opetaeko piyaminyili pyuo pipala eŋa pupyamopa Anatu sangyu lao karo. Yuu peparae kukwa korakamape ateŋa lao dokopa embena lao suu pyao Anatu sangyu lao lapa pilyu. 4 Namba embena ee leene dupwa suu pyapala kandapulimi kumulyu dokona epo emba kandapala dokopa raeme kumaro. 5 Namba embame Anatu kapa ingingi lao suu pyao mandeene doko angi ingilyamo lao kame see nalyo. Anatu kapa ingingi lao suu pingi dokore embena apusingi Loisa endakinyi Yunisapame opetae suu pyao peteyambipya. Doko suu pyao embena doko mendare ingyuo pelyamo lao silyu. 6 Dokona lao misi andake dokona nambame emba kingi nyuo rombo palyiyunupa Anatumi banya yulu emba keta jiyamo doko isasa pinyi pyambuo karape lao langilyu. 7 Anatumi Imambu jiyamo dokome pakange renge doko jinginde daa. Pakange renge jilyuŋi lao dokopa porainya rengepe mona retengepe range rapu pyuo karengepe dupwa Imambumi joo simbungi.

8 Namwana Kamongo dokona pii polo lalana elya nao dee namba banya ingyuo karapusi palo dokona lapala elya nyii napipiyoko. Dopa pyuo Anatu emba porainyi pyambwaramopa waili pii keyange dokona lao randa emba keta eparamo epena rao laoko karape. 9 Baame namwa lete wai pyao nyepala banya ingyarami lao kyakale leya. Doko namwame range yulu keyange piyamande daa. Baa rangena suu piyamuli pyuo mona keyange palyuo ipyapala kyakale lao rombo palyiya. Yuu ene wasaroŋo lao karo dokopa Koraisa Yesu keta mona keyange palyuo ipingi doko joo kaeya. 10 Namwana Lete Wai Pyao Nyingi akali Koraisa Yesu baa epo panapala Anatunya mona keyange palyuo ipingi doko baa keta paneya. Koraisame kumunginya rengena porainya renge namwa keta palenge doko nyuo anameya. Anamo waili pii keyange dokome kuma nange renge doko nyuo nolakaya.

11 Anatumi namba aposele yulupi mana lenge yulupi dolapona waili pii keyange polo lare lao rombo palyiya. 12 Renge dokona lao namba keta randa nyilyu. Randa nyipunupape namba dokona lao elya nalyo. Nambame akali kapa ingingi lao suu pyao karo doko range silyu. Yuu gii mupwa ene pyaka sepa naramopa yulu piri lao rombo palyakaya dokona minyuo pyuo kararo dokopa kyawa minyuo karara. 13 Pii langiyunuli pyuo piri lao pii angi langiyu dupwa minyuo karape. Koraisa Yesupa pakaro karaminyi dokona Anatu kapa ingingi lao suu pingipi mona retengepe dolapo poraiyuo minyuo pyuo karalu karare. 14 Imambu Poo Pyasi namwa maralyiyamo dokome emba nyisaramopa renge keyange emba keta palamo doko sakao sakao pyuo minyuo karape.

15 Yuu Esia wambu peparaeme namba yaki nyiyami dokopa Piselasa Emosenisapa opetaemeko yaki nyiyambi doko emba silinyi. 16 Onisimasa namba yuu malu mee rae mainyi pyambuyamo dokona Kamongome banya ree palu sakao pyuo nyinya. Baame namba karapusi kareyo dokona elyapala kaeya naya. 17 Dopa pyuo karo baa yuu Orome epapala dokopa namba kaeya nao karapala kando nyiya. 18 Yuu gii mupwa pyaka seramopa Kamongo dokome Onisimasa baa sakao nyiso karena lao suu pilyu. Embame nambana lao yuu Epesasa dokona Onisimasame yulu andake pyakaya doko ama soo gisasi karene.