2
Yunus sambayang pi Tuhan Allah
1 Waktu Yunus masi ada di ikan pung parú, dia sambayang sang dia pung TUHAN Allah, 2 bilang,
“Waktu beta ada susa deng sangsara,
beta batarea minta tolong sang TUHAN,
ais Dia manyao, ko tolong sang beta.
Waktu beta ada dalam ikan pung parú,
itu sama ke beta ada di orang mati dong pung tampa.
Ais beta pange minta tolong dari situ,
ju Tuhan dengar, ko tolong sang beta.
3 Tuhan lempar buang sang beta pi tenga laut,
sama ke banjer yang sapu bawa sang beta,
ju galombang yang Tuhan kirim dong,
hantam barmaen sang beta.✡ Lagu Puji dong 42:7
4 Ais beta pikir bilang,
‘Tuhan su usir buang sang beta,
ko biar sonde usa lia sang beta lai.
Pasti beta sonde dapa lia,
Tuhan pung ruma sambayang yang barisi lai.’
5 Sadiki lai beta su mati,
te galombang dong hantam barmaen sang beta,
deng aer ada tutu ame sang beta,
ju rumput laut dong feo ame beta pung kapala.
6 Beta turun tarús sampe di gunung pung kaki,
yang ada di laut pung dasar.
Itu sama ke beta turun pi orang mati dong pung tampa,
ju dong konci mati sang beta di sana.
Sonde mungkin beta bisa kaluar lai!
Ma Tuhan ni, beta pung TUHAN Allah!
Tuhan angka ame sang beta dari calaka di bawa,
deng kasi salamat sang beta, ko biar beta jang mati!
7 Waktu beta su rasa mau putus napas,
deng beta pung nyawa mau ilang buang,
beta inga sang TUHAN,
deng beta pung sambayang minta tolong,
sampe di Bapa pung ruma sambayang yang barisi sana.
8 Samua orang yang maen songgo,
sémba sang barang yang sonde ada pung guna dong.
Dong bale balakang deng tola buang sang
Tuhan yang suka kasi tunju hati bae sang dong,
deng suka tolong orang yang bataꞌika deng Dia.
9 Ma beta mau bawa korban sukur ko sémba
deng angka nae lagu puji sang Tuhan!
Apa yang beta su janji tu,
sakarang beta mau bekin ame.
Te TUHAN Allah yang ada pung kuasa,
ko kasi salamat sang beta na!”
10 Ais TUHAN suru itu ikan bésar ko bawa sang Yunus pi tana karíng. Ju itu ikan pi munta buang sang dia di pante.