1 Zaɗka Zezu tḭi saa ɓil *hul ka̰ni Ŋgɛrɛwṵru na, leɗ nduoɓal-ɛ mbḭw munu ɓaa ha̰ ni mii: «Mbay, mu kɔ-kɔ́m mú kɔ bawda tisaw kereri ká ndaɗ ku! Mu kɔ hulri ká i ura ndaɗ key ku!» 2 Lɛɛ, Zezu ɓaa ha̰ ni mii: «Mù kɔ bawda tisaw kereri ká i ǔrake hulri na kḭ zu lɛ? Nam ha̰nɛ lɛ, tisawkeri key na ti tɔ́ŋ mbḭw ká̰y tul kḭ ya. Nzoɓri gá̰y ri riw bele zuɔ siri.»

3 Zezu se a kaw tul kuo ká riŋ-ɛ ɓa Oliviye, ká ɗo maa ɓáy *hul ka̰ni Ŋgɛrɛwṵru. Báyḭi lɛ, Piyɛr, Zak ɓáy Za̰a, rɔɔ Andere nda̰w na, ɓari huo-ri ze i kaw ziŋ ni fi mbḭw í vbi ni ɓay mii: 4 «Mu ɓaa ha̰ ɓuru laa, síe ha̰a nda̰w rɔɔ fe niri key na a vika lɛ? Rɔɓay, fe ḭi nda̰w rɔɔ a kál a kiɛ ɓuru nam ká fe niri riw bele a víke na lɛ?» 5 Báyḭi lɛ, Zezu tii sa̰w ɓáa ɓay ha ri mii: «Ì nzɛ ɓáy sùo-rì ɓay haŋa nzoɓ mbḭw mini kara ka úla rì ya. 6 Nzoɓri ví ŋgḭi ɓamba ɓáy riŋ-i í ɓaa mii: “Ɓa ɓi ze mì ɓa *Krisi, nzoɓ ká Ŋgɛrɛwṵru waa ɓay píe ni ví ya̰a nzoɓri na.” I úla nzoɓri ŋgḭi ɓamba. 7 Zaɗka ì láa soro ɓay ruyri ká nzoɓri ruu kḭ ká lakun-rì, a í laa soro ruyri ká nzoɓri ruu kḭ ɗi ɗi nda̰w na lɛ, ì ha̰ sùo-rì ka tɔ ya, ɓay ḭi lɛ, ndaɗ ɓay haŋa fe niri key na ka tḭi nda̰w rɔ! Roo lɛ, ɓa síe ɔ́rɔ ɓie nam ká tusiri key ya rɔɓay. 8 Nzoɓri ká sa̰w puo ɓari mbḭw, i úru ɓay rúu ziŋ nzoɓri ká sa̰w puo kḭri ɓoɗ. Nzoɓri ká ɓil puoruo mbḭw, ì úru ɓay rúu ziŋ nzoɓ puoruo kḭri. Tusiri a láŋ yik yik ɓáy zaɗ zaɗ nda̰w, kɔn luye a líe ɓáy zaɗri nda̰w pi. Fekeri ku na a ɗoko munu ɓa tiika nduo ká sɛ má̰y nzoɓ ɓay haŋa ni ka mboŋ. 9 Roo lɛ, ɓaarì na, ì kɔ sùo-rì ɓáy kere nda̰w rɔ! Nzoɓri mgbaka rì ɓay pɔŋ rì ɓo nduo nzoɓ kúŋ sal ɓayri, i ndaka rì ɓáy ndoy dɔŋ ká ɓil *hul mbṵ́ kḭ Ziɓri nda̰w. I fá̰a rì ɓay ɗáa rì kaw pol nzoɓ réke tul puori nda̰w, pol mbay luyeri nda̰w ɓay tul-i, a lɛ, ká zaɗɛ ku na ì ɓáa nasi ɓay ká se tul-i na ha ri. 10 Ɗo nun ka-káa Ɓay Kere ha̰ nzoɓri ká sa̰w puo ɓari ɓoɗ ɓoɗ na riw bele ha ri laa pola nda̰w rɔɔ, ɔ́rɔ ɓie nam ká tusiri na ka vi ɓáy. 11 A zaɗka i mgba rì ɓay ɗáa rì kaw pol nzoɓ kúŋ sal ɓayri lɛ, ì ha̰ law-rì ka nzaa rì ɓay tul ɓayri ká i vǎa ɓáa na ku ya. Ká zaɗɛ ku hɔy, ì ɓáa ɓay ká Ŋgɛrɛwṵru ha rì. Ɓayke ku na, ti uru saa luo-rì ya, roo lɛ, ɓa Tem Law Pie ze a ɗáa ɓaykeri na zuɔ nzáa-rì ha rì ɓaa ɓáy. 12 Namke ku na, yṵ kḭri mbika tul kḭ ha ri i ri nda̰w, bǎa leɗri ɗáa munu ziŋ vu ɓari nda̰w, a leɗri kara i úru ziŋ nzoɓ mbóŋ ri rì ha ri ɗaa ɓay huɗ ɓo tul-ri nda̰w. 13 Nzoɓri riw bele i fṵ́y rì ɓay tul-i. Roo lɛ, nzoɓ ká mgba ŋgɔ-ŋgɔŋ kpṵru tḭi gbṵke lɛ, Ŋgɛrɛwṵru a ya̰aŋa ni.»

14 «Namke ku na ì kɔ́kɔ nzoɓ ká i ɗi ni ɓa “Fe Ḭ̌m ká maa ɓáa ya” kaw zaɗ káʼa maa káw ɗi ya. (Nzoɓ ká kḭi mbeɗe key na lɛ, ka laa sa̰wke ta-taŋ!) Zaɗka i kɔ munu na báyḭi lɛ, ɓari ká i kaw kuɗu zaɗ ká Zude na, ndaɗ ɓay haŋa ri ɗúu ɓa tul kuori. 15 Nzoɓ káʼa mgbaka ta̰ram ká tul hul siya na* 13.15 Ziɓri na, zaɗka i ɗaa hul lɛ, i ɗaa tul-e aa raɗ raɗ ɗo ɗi ɓa zaɗ mgbaka ta̰ram ɓari., ka ti ɗí ɓay vǎa mbika fe ká hula ya nda̰w, 16 a nzoɓ káʼa ɗoko wáa na ti yḭ́i se puɔ ɓay mbika maagari ɓe ya nda̰w pi. 17 Namkeri ku na, má̰yri ká i ɗoko ɓil, ɓáy má̰yri ká leɗri á̰w wa̰n ɓari na, i kɔ́kɔ sɛkɛ fe ŋgḭi ɓamba. 18 Ì kóɗ Ŋgɛrɛwṵru ɓay haŋa feri key na, ka tḭi ɓáy few lew teɗ ya! 19 Ká ɓil namkeri ku na, kɔ́kɔ sɛkɛ fe káʼa tḭ́i tul nzoɓri na, a kál tul zaɗ pavbaɗ. Úru saa nam ká Ŋgɛrɛwṵru ɗáake feri riw bele kpṵru tḭi vuri key na, kḭri kɔ́kɔ sɛkɛ fe ká mini na nzoɓ kɔ ya rɔɓay, rɔɔ ɓil namri káʼa vi vuku hɔy kara, nzoɓ ti kɔ́kɔ kḭri sɛkɛ fe ká mini mbǎa mgbaŋ. 20 A zaɗka Ŋgɛrɛmbay mbi nzi-ɛ ɓay yḭ́iŋra namkeri ku na ɓa fal ya lɛ, nzoɓ mbḭw mini kara ti káw ɓáy kumnun ya. Roo lɛ, namkeri ku na ka yḭiŋra ɓa fal ɓay tul nzoɓ ɓeri káʼa nan ri zuɔ ɓoɗ ɓa taa ɓe. 21 Zaɗka nzoɓ ɓaa ha rì mii: “Ì kɔ-kɔ́m í kɔ *Krisi, nzoɓ ká Ŋgɛrɛwṵru waa ɓay píe ni ví ya̰a nzoɓri na, ka ɗo zaɗ ni key” mase “ka ɗo lew,” lɛ, ì ɗaa law-rì ka ɓo ɗi ya, 22 ɓay ḭi lɛ, nzoɓri ká i ɗi sùo-ri ɓa Krisi, ɓáy nzoɓri ká i ɗi sùo-ri ɓa *nzoɓ ya̰aŋa ɓayri saa nzaa Ŋgɛrɛwṵru na, i tḭ́i í ɗaa fe saŋri ɓáy feri ká mba kɔ́kɔ ɓay úlake nzoɓri. Ze faa ɗo ɗi lɛ, nzoɓri ká Ŋgɛrɛwṵru nan ri zuɔ ɓoɗ ɓa taa ɓe na hɔy kara, i úla ri nda̰w. 23 Munu zu lɛ, ɓaarì na, ì nzɛ ɓáy sùo-rì! Mì ɓaa ɓayke riw bele ha rì ro.»

24 «Ká ɓil namkeri ku, ká fal kɔ́kɔ sɛkɛ feke ku na, síe a ɗoko guu nda̰w, few ti híe mbǎa nda̰w, 25 mbaymawri tiika sa̰w gá̰y saa tumbam nda̰w, rɔɔ hṵrusuori ká i ɗo tumbam kara i láŋ yik yik nda̰w pi. 26 Báyḭi lɛ, nzoɓri kɔ́kɔ mì ɓi *Vu Nzoɓ ká mì ví saa nulue ká ɓil síi mbam ɓáy bawda hṵrusuo, ɓáy riŋ ɗika. 27 Ɓi na, mì píe leɗ nzaapeɗ ɓiri ha ri se ɓáy tḭw zaɗri ká niŋ ká tusiri key ɓay mbṵ́ nzoɓri ká mì nan ri zuɔ ɓoɗ ɓa taa ɓi na, saa fi mbḭɛ mgba gbṵ zaɗ ká fi mbini.»

28 «Ì laa máa ɓay ká se tul puu nzum na, a í fére fe ká ɗi! Zaɗka ì kɔ rɔɔ nzaa tɔykeri luo vay a ɗo rék rek lɛ, ì kɔ ta-taŋ mii, nzaa bura mbam ɗo ɗi ya ro zu. 29 Ɗo faa mbḭw munu nda̰w, zaɗka ì kɔ fe niri key na tḭi lɛ, ì kɔ nda̰w mii, ɓi *Vu Nzoɓ na, mì ɗo ɗi ya deɓ ɓay ví; mì ɗo faa hul ro. 30 Mì ɓaa ha rì ta-taŋ ɓa tusuɛ kḭ: nzoɓri ká timbɛɗɛ key na, i ti huka riw bele ya hɔy ze fe niri riw bele key na a tḭ́i. 31 Tumbam ɓáy tusiri na a kál hɔ̰́n bele. A roo lɛ, ɓay ɓiri na ti kál ya mgbaŋ.»

32 «Ɓay ká se tul namke mase sa̰w síeke ká ɓi *Vu Nzoɓ mì yḭ́i ɓay ví na, nzoɓ mbḭw mini kara kɔ ya. Leɗ nzaapeɗ Ŋgɛrɛwṵruri ká nulue ya nda̰w, ɓi Vu Nzoɓ kara ya nda̰w; ɓa Bǎa huo-ɛ hɔy ze kɔ. 33 Munu zu lɛ, ì kɔ sùo-rì ɓáy kere nda̰w rɔ! Ì káw ɓáy nzaa ɓal-rì kekeke, ɓay ḭi lɛ, namke káʼa vika na ì kɔ ya. 34 Ɗo munu ɓa nzoɓ ká ɗo séke ɓa varu káʼa pɔŋ fe ɓeri zuɔ nduo leɗ káw ɓeri. Nzoɓ ha̰a ha̰a lɛ, ka ha̰ ni peɗ ká maa ɓay haŋa ni ka ɗaa. Ka baka nzoɓ kɔ́rɔ faa hul ɓay haŋa ni ka káw ɓáy nzaa ɓal-ɛ. 35 Munu zu lɛ, ì káw ɓáy nzaa ɓal-rì kekeke, ɓay ḭi lɛ, nam ká ŋgɛrɛnzoɓ puo a yḭ́i a vi na, ì kɔ ya. Kɔ ya lɛ, kaʼa vika ɓáy nzaa láw, mase ɓáy nzaa zaɗ buo, mase ɓáy tuo ká ka-káa, mase ɓáy tiɓie kara, ì kɔ ya nda̰w. 36 Zaɗkaʼa tḭi tul-rì mbuɗa lɛ, kɔkɔ káʼa zíŋ rì ká tul nam! 37 Ɓay ká mì ɓaa ha rì key na, mì ɓaa ha̰ nzoɓri riw bele: ì káw ɓáy nzaa ɓal-rì kekeke!»