1 Ɓáy tiika nam dimasi ká fal *nam mgbaka ta̰ram Ziɓri na báyḭi lɛ, Mari ká puo ɓe ɗo Madala ɓáy Mari taa kḭ na, i se í vǎa piyɛŋ tupal na. 2 Báyḭi lɛ, ká zaɗɛ ku na tusiri laŋ yik yik, lɛ, leɗ nzaapeɗ Ŋgɛrɛmbay vi saa nulue a giri bawda maa tisaw ká i rḭ́ike nzaa huo na ɓo fi mbḭw a kaw tul-e. 3 Ka ndṵy ndá̰w ndǎ̰w munu ɓa mbam ká siɛ, a gari ɓeri puu zeɗeɗe munu ká sa̰ri ha̰ 4 nzoɓ yṵmri ká i kɔrɔ tupal ká í kɔ ni na, hḭɛ ɗaa ri í tɔ kpak kpak, í zuɔ siri raɗ munu ɓa nzoɓ huɗeri. 5 Báyḭi lɛ, leɗ nzaapeɗ Ŋgɛrɛwṵru ká nulue na mbi ɓay a ɓaa ha̰ má̰yri na mii: «Ì ɗaa hḭɛ ya, ɓay ḭi lɛ, mì kɔ nda̰w, Zezu ká i ɓer ni ɗo tul puu say huɗ na, ɓe ze ì nzaa ni key. 6 Ka ti zaɗ ni ya; ka tḭi saa luɔ huɗ a kaw ɓáy kumnun munu káʼa ɓaa ɓayke ha rì pola na. Ì vi í kɔ zaɗ ká i ɗaa ni ɓo ɗi na. 7 Ì se ɓa vaa í vǎa ɓaa ha̰ leɗ nduoɓal-ɛri mii: “Zezu na tḭi saa luɔ huɗ. Ka se ɓay vǎa giyaŋ rì ká kuɗu zaɗ ká Galele. Ɓe ze ɓa zaɗ ká ì kɔ́kɔ ni ká ɗi.” Ɓe ze ɓa ɓay ká mì hii ɓay ɓáa ha rì zu.»

8 Báyḭi lɛ, má̰yri na i zɔl saa tupal ku na koɗ hɔy ɓáy nun hḭɛ nda̰w, ɓáy bawda suoriya nda̰w pi. I ɗuu í vǎa ɓaa ɓayke ha̰ leɗ nduoɓal Zezuri na. 9 Lɛɛ, zaɗɛ ku hɔy Zezu suɔ nun-ri a ɓaa mii: «Soko ɓaarì woo!» Lɛɛ, i soro ɓa lakun-ɛ í huku siri í mgba ɓal-ɛ í ruo ni. 10 Báyḭi lɛ, Zezu ɓaa ha ri mii: «Ì ɗaa hḭɛ ya! Ì se í vǎa ɓaa ha̰ yṵ-iri ha ri se kuɗu zaɗ ká Galele. Zaɗɛ ku ze í kɔ́kɔ mì ká ɗi.»

11 Zaɗka má̰yri na i se faa kɔɓ rɔɓay na, nzoɓ yṵm ha̰nɛri ká sakra nzoɓ kɔ́rɔ tupalri na i se ɓil ŋgɛrɛpuo í vǎa kḭi fal feri ká kal na riw bele ha̰ *ŋgɛrɛnzoɓ fe poyri. 12 Zaɗka ŋgɛrɛnzoɓ fe poyri laa munu na báyḭi lɛ, i mbṵ kḭ ɓáy ŋgɛrɛ Ziɓri, a i leke ɓay zuɔ ɓil kḭ riw bele, ro i fa̰a lari wuruk wuruk ha̰ nzoɓ yṵmri na í ɓaa ha ri mii: 13 «Ì ɓaa ha̰ nzoɓri mii: “Suŋɛ ká ɓuru na-nam ɓáy ze, leɗ nduoɓal Zezuri ví rii huɗ ɓe na serere í zɔ̌lke!” 14 A zaɗka nzoɓ réke tul puo laa ɓayke lɛ, ɓuru kḭ ɓuru léke law-ɛ, ɓay náake ɓay ká tul-rì ɓáy.» 15 Zaɗka nzoɓ yṵmri na ya̰a lari na báyḭi lɛ, i ɗaa faa mbḭw munu ká i kǐɛke ri. Ɓe ze ha̰ ɓayke na yǎ̰ake zaɗ kpol kpol ká sakra Ziɓri kpṵru tḭi vuri.

16 Báyḭi lɛ, leɗ nduoɓal-ɛri ká duɔ falɛ mbḭw na, i zɔl í se kuɗu zaɗ ká Galele ká tul mbɔrɔ ká Zezu ɓaa ɓayke pola ha ri. 17 Zaɗka i kɔ ni na báyḭi lɛ, i huku pol-e í ruo ni. Roo lɛ, nzoɓ ha̰nɛri ma̰y ɓay ká tul-e rɔɓay. 18 Báyḭi lɛ, Zezu soro ɓa lakun-ri a ɓaa ha ri mii: «Bǎa Ŋgɛrɛwṵru ha̰ mì hṵrusuo ká tul feri riw bele, ká nulue nda̰w, ká tusiri key nda̰w pi. 19 Munu zu lɛ, ì se ɓáy sa̰w puo nzoɓri ɓoɗ ɓoɗ riw bele, a í ɗaa ha ri vi ɓa leɗ nduoɓal-iri, ɓo í ɗaa tul-ri nduo mbii ɓáy riŋ Bǎa nda̰w, riŋ Leɗ nda̰w, rɔɔ riŋ Tem Law Pie nda̰w, 20 a í fére ri ɗáa vu mbom ɓo tul feri riw bele ká mì fere rì na. A lɛ, ɓi na, mì sáɗ ziŋ rì ɓáy namri riw bele kpṵru maa ɓáy ɔ́rɔ ɓie nam ká tusiri key.»