Mbeɗe sáka kuni fie 1 Timote 1

1 Timote

Titire mbeɗe ká Pol ɗaa ha̰ Timote

Ɓay ká se tul feri ká ɗo ɓil mbeɗe ni key

Ká ɓil mbeɗe key na, Pol ɗaa wa̰ra ɓo ɓil law Timote ɓay haŋa ni ka geɗe tul mbika law ɓe ɓaŋguɔ ɓay gbṵ́ nzaa nzoɓ fe fére bayluri ká ɗaa nzoɓ mbika lawri nduo kḭ. Ka hii ɓay haŋa nzoɓri ká i nán ri ɓa nzoɓ ndáka faa pol nzoɓ mbika lawri, mase nzoɓ sɔkɔ peɗri na, i ɓá nzoɓri ká ɓay mbḭw ti tul-ri ya, a í maa ɗáa peɗke. Ka hii ɓay haŋa má̰y ɓari káʼa sɔ́kɔ ri na, i ɓá má̰yri ká simseɗ ɓari ɗo ɓáy kere. Falɛ lɛ, Pol ɓo Timote faa ká ɓay ɗáake peɗ ɓe ɓa nzoɓ peɗ tusuɛ taa Zezu Krisi.

Máa ɓayri ká ɗo ɓil-e

Baka ɓay se tul nzoɓ fe fére bayluri: 1

Nzaa ɓoko ká se tul nzoɓ peɗ Ŋgɛrɛwṵruri: 2–3

Fe ká Timote a ɗáa: 4–6

Soko ká Pol hii ha̰ Timote

1 Yṵ-i Timote, ɓi Pol ká mì ɓa nzoɓ ndáy nzaapeɗ Zezu *Krisi ɓáy bol nzaa Ŋgɛrɛwṵru Nzoɓ Ya̰aŋa naari, ɓáy Zezu Krisi ká náa ɗáari law naari te tul-e nzokɗo na, mì ɗaa mbeɗe key na 2 ha̰ mù ɓo ká mù ɗo munu ɓa vu ɓil-i taa tusuɛke ɓay law-a ká mù ɗaa ɓo tul Zezu Krisi*. Ndaɗ ɓay haŋa law huoke nda̰w, kɔ́kɔ nun síe nzoɓ nda̰w, ɓáy ɗɛkɛkɛ Bǎa Ŋgɛrɛwṵru ɓáy Ŋgɛrɛmbay Zezu Krisi, ka saɗ ziŋ mù.

Báka ɓay ká se tul nzoɓ fe fére bayluri

3 Munu ká mì ɓaa ha̰ mù pola nda̰w rɔɔ mí zɔl mí se kuɗu zaɗ ká Maseduwa̰n na, mu káw ɓil ŋgɛrɛpuo ká Efɛz, a mú mbi nzaa ha̰ nzoɓ fe fére bayluri na, i ɗaa nzaa fe fére taa gɔɓ gɔɓkeri na ka gbṵ. 4 Mu ɓaa ha ri pɔ́ŋ nzaa nduo kḭiŋa fal ɓayri na nda̰w, kḭiŋa sa̰w ka̰niri ɓáy nzi-ɛ lɛm lɛm na kara, ka gbṵ nda̰w pi. Fekeri ku na mboŋ má̰y ɓay ɓa pola pola gɔr hɔy, a sɔ peɗ ká Ŋgɛrɛwṵru ɗaa zuɔ nduo naari ɓay haŋa nzoɓri ŋgɔ́ŋke ká ɓil mbika law na ya. 5 Má̰ra sa̰w báka ɓay key na, ɗo ɓay haŋa nzoɓ mbika lawri, i hii kḭ ɓáy ɓil law ká *taŋ kaɗ kaɗ, ɓáy kér ɓay kere ká uru saa ɓil wa̰ra law nda̰w, rɔɔ ɓáy law-ri ká i ɗaa ɓo tul Ŋgɛrɛwṵru ɓa tusuɛ nda̰w pi. 6 Nzoɓ ha̰nɛri i pɔŋ faa kere na ku, a í ɗo ɓil má̰y ɓay taa gɔɓ gɔɓkeri. 7 Ɓari na, i mbi sùo-ri ɓa nzoɓ fére nzoɓri *bol kusol Ŋgɛrɛwṵru, roo lɛ, ɓay ká i ɓaa, mase fe ká i fere ɓáy hṵrusuo-ri na, i kɔ sa̰wke mbḭw ya.

8 Náa kɔ́ri nda̰w, bol kusol Ŋgɛrɛwṵru na, zaɗka nzoɓ hḭɛ ɓáy zaɗɛ lɛ, ɓa fe kere. 9 Fe ká náa kɔ́ri ta-taŋ nda̰w ze ɗo key: ɓay tul nzoɓri ká i ɗaa fe ɓáy zaɗɛ nzɛɗɛm na ze, Ŋgɛrɛwṵru ɗáake bol kusol ɓayke ya, roo lɛ, ɓay tul nzoɓ law mgbɔ́rɔri ɓáy nzoɓ tḭɛri nda̰w, ɓay tul nzoɓ túŋ Ŋgɛrɛwṵru ŋgereŋri ɓáy nzoɓ feya̰ari nda̰w, nzoɓ ndɔ́lɔ Ŋgɛrɛwṵru ɓáy nzoɓ ɓíɛ riŋ-ɛri nda̰w, nzoɓ ika bǎa ɓari mase máa ɓari nda̰w, rɔɔ nzoɓ ika nzoɓri nda̰w pi. 10 Ka ɗaa bol kusol na ɗo ɓay tul nzoɓ taka mgbá̰y bapiɓiri, ɓáy wa̰rari ká i fɛrɛ í naa ziŋ kḭ nda̰w, nzoɓ ɗáɓ koyri nda̰w, nzoɓ kúɗ ɓayri ɓáy nzoɓ faa nasi ɓay bayluri nda̰w, rɔɔ ɓay tul nzoɓri ká peɗ ɗáa ka̰aya ɓari ɓoɗ ɓoɗ ká maa ɓáy fe fére taa tusuɛke na ya nda̰w pi. 11 Fe fére taa tusuɛke ku na maa kḭ ɓáy Ɓay Kere ká Ŋgɛrɛwṵru ɗaa zuɔ nduo-i ha̰ mì ka-káake. Ɓayke ku na ɓaa se tul riŋ ɗika Ŋgɛrɛwṵru, bawda nzoɓ ká maa ɓay haŋa nzoɓri pisi ni.

Pol ɗaa taambɔl ha̰ Ŋgɛrɛwṵru ɓay tul law kere ɓe

12 Mì ɗaa taambɔl ha̰ Zezu *Krisi ká ɓa Ŋgɛrɛmbay naari ká ha̰ mì hṵrusuo ha̰ mì ɗáake peɗ ɓe. Ɓe na, ka kɔ mì ɓa nzoɓ ká mì ɗaa fe ɓáy bol nzi-ɛ, a mbi mì ɓa nzoɓ peɗ ɓe. 13 Ze ká pola lew mì ɓa nzoɓ ɓíɛ riŋ-ɛ nda̰w, mí ɗaa nun nzoɓ ɓeri tuɔ síe nda̰w, a mí tḭiri ni nda̰w hɔy kara, ka kɔ nun síe ɓi a ɗaa law kere ziŋ mì, ɓay ḭi lɛ, pola na, mì ɗaa law-i ɓo tul-e ya nda̰w, a feri ká mì ɗaa na kara, mì kɔ ya nda̰w pi. 14 Ɓa tusuɛ kḭ, Ŋgɛrɛmbay naari na ɗaa bawda law kere ziŋ mì, a ha̰ mì ɗáake law-i ɓo tul-e, a ha̰ mì law ini ɓáy faa zúɔ ziŋ Zezu Krisi. 15-16 Ì kɔ, Zezu Krisi na vi tusiri key ɓay ya̰aŋa nzoɓ feya̰ari, a lɛ, ɓi na, mì ɓa mbayke. Law kere káʼa ɗaa ziŋ mì ɓi ká mì ɓa mbay nzoɓ feya̰a na, ka ɗaa munu ɓay kíɛke nzoɓri bawda íki law ɓe na ta-taŋ. Ɓe nda̰w rɔɔ, nzoɓri ká i kɔ́kɔ mì na, i ɗáake law-ri ɓo tul-e, a í kaw ɓáy kumnun ká ɗo ɓaŋguɔ kpaɗara na. Ɓay ká mì ɓaa key na, ɓa tusuɛ ɓay ká maa ɓay haŋa nzoɓri riw bele i ɗaa law-ri ɓo ɗi. 17 Ndaɗ ɓay haŋa nzoɓri riw bele, i ɗaa mbay ka ɓo tul Ŋgɛrɛwṵru ɓe káʼa re mbay ɓaŋguɔ nda̰w, a ɓa nzoɓ káʼa hu-huɗ ya nda̰w, ɓe ká nun nzoɓ kɔ ni ya nda̰w, a ɓa ɓe huo-ɛ kḭ hɔy ze ka ɓa Ŋgɛrɛwṵru. Riŋ ɗika ɓa taa ɓe mbiimbam ɓáy mbiimbam ɓaŋguɔ! Amɛm! Ndaɗ ɓay haŋa ni ka ɗo munu na kḭ.

Pol ɓo Timote

18-19 Timote, ɓo ká mù ɗo munu ɓa vu ɓil-i na, nzaa ɓoko ká *nzoɓ ya̰aŋa ɓayri saa nzaa Ŋgɛrɛwṵru ɓaa se tul-a pola na, ɓayke ɗo faa mbḭw munu ká mì ɓáa ha̰ mù key nda̰w. Zaɗka mù ɗo tul ɓaykeri na ku lɛ, mù zíŋ hṵrusuo ká ɗi. Mu kɔ́rɔ tusuɛ ɓay ká se tul mbika law, a mú ha̰ kér ɓay ká ɓil wa̰ra law-a na kara ka táŋ kaɗ kaɗ nda̰w. Ɓe nda̰w rɔɔ, mù rúke ruy taa tusuɛ na ɓáy. Nzoɓ ha̰nɛri pɔŋ kér ɓay kere ká uru saa ɓil wa̰ra law-ri na, ɓe ze í ɓǐɛke mbika law ɓari. 20 Sakra nzoɓkeri ku na, Imene ɓáy Alezandere i ɗo ɗi nda̰w. Ɓari na, mì pɔŋ ri zuɔ nduo *Satan ɓay haŋa ri ṵ́ɔ tḭ́iri Ŋgɛrɛwṵru na keŋ keŋ†.

*1:2 1.2 Ì kḭi Peɗ 16.1-3.

†1:20 1.20 Fére nzoɓri Ɓay Ŋgɛrɛwṵru ká ɓáy zaɗɛ ya na ɓa tḭ́iri ni. Ɓe ze ha̰ Pol níike nzoɓkeri ku na ká sakra nzoɓ mbika lawri zuɔ kɛlɛ, zaɗ ká ŋgɛrɛtemndaya re mbay ká ɗi na.