Nyubun king junkurrjiman bubungu Babylonia. Nyulu bubungu Judah kadan, Israel-warranji kuniwanka. Jana Israel-warra townbu Jerusalem murumarin. Yinyangkarr towndurr walls jirray gatesmunji. Jana Israel-warrangka gates wubulku nandan, soldier-soldier Babyloniamun kari walanka. Yamba Israel-warrangka God bayjanya, nyulu Babylonia-warra kari kirin jananin buyun-damanka. Juma jana Babylonia-warrangka walls dumbarrin, townbu Jerusalem walan, Israel-warra karrban, kanbal prisoner-bungan, bubungu Babylonia wundin. Nyulu kingangka soldier-warranda yalaman, “Yurra, warru-warru dukul-ngulkurr wangkanyika Israel-warrandamun, bubungu Babylonia wundi. Ngayu jananin binal-bunganka, ngaykundu workmanijinka ngaykuwunbu bayanba jirraymba.” Jana soldier-soldierangka warru-warru wangkanyin, nyubun burri Daniel. Godungku Daniel dukul-ngulkurr-bungan, mala-bijarr-bungan, Danielangka balkanka wanyurrinku bamangka junjuy bijarrin.