1 Karrputjarra Tjatiti miil-miilpa ngarangu. Katji-ya warakparni nyinama tjirntu-ya maa tjarrpatjunu. Tjiingkalpi Mary Matalan kamu Tjalumi kamu Mary Jamesku yipi pakara-ya yanu parnti-parnti palyaminyirri manu miku-ya Tjiitju mirri nyitilkuwa. 2 Tjiinpa ngarringu-ya Tjantingka raakarralpi pakara-ya yanu pirnkikutu. 3 Katji-ya maa yanama wangkama-ya, “Nganalu-lampa pamarrpa tjarlu pirnkitjanu yurntulku?” (Pamarrpamarntu tjarluminyirri.)

4 Tjiintu tutjulu maa nyangu-ya pamarrpa kurralkakili yurnturnu wantijunu ngarama. 5 Katji-ya maa tjarrpangu nyangu-ya karratarringu puntu kulyarri tjarntu tjina-tjinayurrukulu kuru-kurukulu tjungarnikati nyinama.

6 Puntu kulyarri wangkangu-tjananya, “Wiya nyurra ngurlurrimalpa. Milyapunginpa-rnantaya tjiitjalta-ran Tjiitjuku Natjuratjanuku nyanginpa, yangka-ya wartangka waralytjunu. Wiya paluru ngaangka. Paluru mirritjanu kanarringulpi pakara yanu. Nyawa-ya ngaangkatuka-ya ngarritjunu. 7 Marlaku-ya yarra watjala-tjananyaya palurukurnu wanmingka laltungka kamu Piitangka. Tjiitju kurranyurriku Kalalikutu. Tjiingkalpi-ya nyaku-ya. Palurulu kurralkakili wangka watjarnu wantitjunu.”

8 Tjiinpa tutju pirnkitjanu pakara-ya marlaku tarrputjunu karrata tiltirryanama-ya. Tjiitjanulpi wiya-tjananyaya watjarnu. Ngurlu wangkaparni nyinama-ya.

9 Tutju Mary Matalan kurralka kukurrkulu wilkikulu nyinama. Tjiitjulu kukurrpa laltu-tjananya yiyarnu. Ngulampa Tjiitju Tjantingkalpi raakarra mirritjanu pakarnu. Paluru kurranyu yutirringu-lu tutju palurungka. 10 Tutju paluru yanu kutjungkarringu-tjananya palurukurnu wanmi laltungka. Tjuni-ya luyurrminyirri nyinama kamu yulama. 11 Marylu watjarnu-tjananya, “Kulila-rniya! Nyangu-rna Tjiitju mirritjanu pakarnu kanalpi ngarama.” Wiya-luya kulirnu.

12 Tjiitjanu Tjiitju-pulanya puntu kutjupayuru yutirringu wanmi kutjarrangka tjiitja-pula ngurra kutjupakutu maa yanama. 13 Puntu kutjarralu-pula ngulampalpi milyapungu. Marlaku-pula yanu watjarnu-tjananyaya wanmingka kalkinta. Wiya-pulanyaya kulirnu.

14 Ngulampa Tjiitju-tjananya yutirringu palurukurnu wanmingka 11ta nyinama-ya mangarri ngalkunma. Palurulu-tjananya watjarnu kurntatjunu, “Nganaku wiya-tjananyayan kulirnu tjitjalta-ya watjarnu ngayu-rniya nyangu mirritjanu pakarnu-rna?”

15 Palurulu-tjananya watjarnu, “Yarra-ya ngurra kutjupakutu ngurra kutjupakutu kamu tjukurrpa palya ngayukurnu parra-tjananyaya watjanmalpa yarnangu laltungka. 16 Yarnangulu nganalu-rni ngayu mularrtuminyirri kulilku. Tjiitjalta-tjananyaya kalyungka tupurltjunamalpa. Mamalulpi wulu kana kanyilku. Katji yarnangulu nganalu-rni wiya kulilku Mamalulpi warukutu yiyalku. 17 Katji yarnangulu nganalu-rni mularrtu kuliku ngayukurnu maya-rnatjanampa yungku miku-ya ngayukurnu yiningka kukurrpa yarnangungka-tjananyaya yiyalku. Kamu wangka kutjupalpi-ya wangkamalpa. 18 Katji-ya lingka ngurrpalu manku. Wiya-ya mirrirriku tjiitjanu. Katji-ya kalyu kara tjikilku. Wiya-ya mirrirriku tjiitjanu. Katji-tjanayaya marumpulu nyurnu pampulku, tjiitjanulpi-ya yarnangu nyurnutjanu palyarringku.”

19 Tjarlu Tjiitju-tjananya wangkangu wiyarringulpi Mamalu kankarramanu katingulpi yalkirikutu. Kamu paluru Mamangkalpi-lu tjungarnikarti nyinatingu. 20 Tjiitjanu palurukurnu wanmi-ya yanu parra-tjananaya tjukurrpa watjanma. Tjarlu Tjiitjulu-tjananya marrkarrmanu palurukurnu warakpa-ya palyanma. Yarnangu laltulu-ya nyangu kulirnu, “Yuwayi, ngaantu-ya tjungarnilu watjarninpa.”