1 YAWEI, hu gin kaman langa yu Serramoni Pleis?

Hu gin jidan langa yu seikridwan hil?

2 Oni detlot pipul hu oldei duwit langa God en dum wanim rait.

Olabat oldei toktokbat trubalawei.

3 Dei nomo dalimbat laiya blanga najalot pipul.

Dei nomo dum nogudwan ting langa pipul.

Dei nomo tok nogudwan stori blanga olabat.

4 Dei oldei shoum rispek langa detlot pipul hu teiknodis langa YAWEI.

Dei nomo shoum rispek langa detlot pipul hu gibit bekboun langa im.

Wen dei meigim pramis langa sambodi dei dum det ting,

nomeda det ting weya dei garra dum im adwan.

5 Dei nomo gibit mani langa po pipul en dalim olabat,

“Yu garra peiyimbek mi det mani en gibit mi mowa igin.”

En dei nomo gajim mani snikinwei blanga dalim laiya blanga album najalot pipul.

Detlot pipul hu oldei jidan gudwei lagijat,

detlot na garra jidan seifwan.