1 YAWEI, ai garra preisim yu brabliwei insaid langa main hat.

Ai garra dalimbat blanga ola gudwan ebrijing weya yubin dumbat.

2 Gudbinjiwei ai garra sing blanga yu.

Main haibalawan God, ai garra preisim yu garram song.

3 Wen main enamimob luk langa yu,

olabat tenaran en ranawei,

en dei jis binij deya igin.

4 Wen yu jadjim pipul yu feyagowan en trubalawan en yubin dum lagijat na blanga mi.

5 Yubin jadjim ola nogudbala pipul en yubin binijimap olabat.

Nobodi garra sabi blanga olabat enimo.

6 Blanga wi enamimob olabat binij na fogud.

Yubin binijimap blanga olabat ola bigwan taun,

en olabat nomo jidan enimo, najing na.

7 Bat YAWEI im jidan bos olagijawan.

Im jidan redibala blanga jadjim pipul na.

8 Im det trubalawan bos oba langa ola kantri.

Im jadjim pipul langa ola kantri en gibit olabat feyago.

9 Detlot pipul hu abumbat adtaim brom najalot pipul,

YAWEI im jidan jis laik det seifwan haus blanga olabat.

YAWEI na det brabli strongwan haus weya im lukaftum olabat.

10 Detlot pipul hu sabi yu YAWEI, olabat garra trastim yu.

Yu nomo libum en gowei langa enibodi hu kaman langa yu.

11 Singim song blanga preisim YAWEI weya im jidan bos langa Saiyan.

Dalim ola pipul brom ebri kantri wanim imbin dum.

12 God im nomo fogedabat detlot pipul hu oldei ardimbat brom ebrijing.

Im lisin wen dei jingat langa im.

Im panishim detlot hu dum rong ting langa olabat.

13 YAWEI, yu sori langa mi.

Yu luk mi ardimbat brom main enamimob olabat.

YAWEI yu seibum mi, bambai mi dai,

14 wulijim ai gin jandap en dalim ola pipul brom Jerusalem blanga ola brabli gudbala ting yubin dum.

Ai garra densdensbat en sing song dumaji yubin seibum mi.

15 Detlot najalot pipul bin digim hol blanga trepam olabat enamimob,

bat olabat enamimob nomo bin buldan langa det trep.

Olabat bin trepam miselp langa olabat ron trep.

16 YAWEI bin shoum miselp wotkain im,

dumaji im gibit feyago langa ebribodi.

Ola nogudbala pipul faindim miselp langa olabat ronwan trep,

wen dei oldei dumbat nogudbala ting.

17 Ol detlot nogudwan pipul garra ol gobek langa greib garram ol detlot najalot pipul hubin fogedabat langa God.

18 Ola powan pipul kaan oldei jidan rabishwan.

Dei weidabat blanga God blanga album olabat.

God kaan larram olabat blanga jidanbat lagijat enimo.

19 YAWEI, gidap! Nomo larram detlot pipul bosoba langa yu!

Bringimap ola pipul hu nomo sabi yu,

en jadjim olabat!

20 YAWEI, bradinim olabat,

en meigim olabat sabi dei jis oni pipul weya dei gin binijap.