28
Hau blanga gajim gol en silba
1 Wal Job bin kipgon tok, “Wen enibodi wandim gol en silba im garra go en grajim det graun, en afta im garra barnimap det gol en silba langa det faiya blanga meigim im jidan brabli klinbala en brabli shainiwan. 2 En im oldei dum lagijat igin langa det aiyan en kopa. 3 Ola wekinmen oldei garrimap lemp blanga gowin insaid langa det dakbala pleis blanga lukabat blanga detlot ting na. 4 Dei grajim det hol longwei brom weya olabat jidan en olabat taiyimap miselp garram roup en godan langa det brabli dipwan hol. 5 Longwei andanith langa ola fam weya dei growimap ola sid daga, olabat meigim bigbala faiya blanga breigimap ola rok, 6 weya im abum ola purdiwan ston en gol.
7-8 “Detlot wekinmen oldei go longwei andanith langa det graun weya ola igulok kaan luk en weya ola laiyan nomo sabi. 9 Garram olabat ronwan bingga, olabat oldei mubumweibat detlot shapwan rok en dei deigimat ola rok brom brabli bigwan hil. 10 Olabat oldei grajim det graun thru langa ola rokiwan pleis blanga lukabat blanga ola purdiwan ston en najalot gudwan rok. 11 Olabat faindim weya detlot riba bin stadap en langa najalot sigridwan pleis.”
Hau pipul garra faindim det wei blanga God?
12 Wal Job bin kipgon tok, “Hau pipul garra faindim det wei blanga God? Hau pipul garra len en sabi det trubalawei? 13 Nomo enibodi gin faindim det wei. 14 Dei kaan faindim langa brabli dipwan solwoda.
15-16 “Det wei blanga God im mowa gudwan langa detlot silba en brabli gudwan gol en langa detlot purdiwan ston. 17 Nomo enijing iya jidan lebul langa det wei, nomo gol o glas. 18 Det wei blanga God im mobedawan langa ol detlot purdiwan ston gulum koral, jespa en rubi. 19 Det wei im mobedawan langa detlot purdiwan en yelawan ston gulum topes en gol. 20 Bat hau pipul garra faindim det wei blanga God? Hau pipul garra len en sabi det trubalawei? 21 Ola pipul en enimul en bard oldei lukaranbat blanga im, bat dei kaan faindim im, najing. 22 Detlot dedbala pipul langa greibyad nomo sabi weya blanga faindim im. 23 Oni God imselp sabi det wei, 24 dumaji im gin luk ebrijing iya langa dijan graun. 25 Wen God bin kadimat det win en woda, 26 en wen imbin jinggabat blanga jandim rein en laitining, 27 imbin meigim det trubalawei. 28 God bin dalim langa wi, ‘If yu rispek langa mi, wal yu garra sabi main trubalawei en yu garra libum det nogudbalawei.’ ” ✡ Saam 111:10; Prab 1:7; 9:10