1 Wal Job bin tok langa Bilded, 2 “Haulong yumob garra meigimbat mi ardimbat lagijat garram ola nogudbala wed blanga yumob? 3 Detlot wed im naf weya yumob toktokbat en mokimbat langa mi. Wotfo yumob kaan sheim miselp? 4 If aibin dum nogudbala ting, ai nomo bin ardim yumob. Najing. 5 Yumob oldei toktokbat praudbalawei, dumaji yumob reken yumob jidan gudbalawei, en yumob oldei tok, ‘Yu oldei abumbat pein dumaji yu gilti.’ 6 Bat God im giltiwan na. Im oldei faindimbat folt langa mi.

7 “Nomeda mi oldei prei langa im en askimbat im blanga album mi brom dislot trabul, im nomo ensim main preya en im nomo gibit mi feyago. 8 God bin blokim det roud blanga mi, en imbin meigim det wei dakbala. 9 Olabat bin abum loda rispek blanga mi, bat imbin deigidawei ol detlot rispek brom mi. 10 God bin breigim mi, jis laik det tri weya sambodi bin go en pulumat brom graun, en imbin libum mi hafenhaf, en imbin deigimwei ebrijing brom mi. 11 Imbin fait langa mi, dumaji imbin brabli wail langa mi jis laik aibin im enami. 12 Bigismob solja blanga im bin jidan raidaran langa main tent.”

13-14 Wal Job bin kipgon tok langa Bilded, “God bin meigim ol main rileishanmob en frenmob heidim mi na, en olabat nomo sabi mi du. 15 Blanga main wekinmenmob en ol main frenmob hubin oldei kaman langa main kemp, dei reken mi streinja na. 16 En wen mi trai blanga jingat langa ol main wekinmenmob, olabat nomo irrim mi en dei kaan teiknodis langa mi du. 17 Blanga main waif nomo laigim smelimbat det win weya mi oldei blowimbat, en ol main femilimob nomo laigim mi du. 18 Ola yangwan biginini oldei gibit mi bekboun en wen mi oldei wandim go gulijap langa olabat, dei oldei meigimbat fan langa mi. 19 Blanga main ronwan frenmob, en detlot pipul weya ai laigim brabliwei, olabat nomo laigim mi enimo na. Olabat bin ol gibit bekboun langa mi. 20 Nomeda mi stil jidanbat laibala, bat mi jidan brabli bouniwan, dumaji aibin lujim main bodi.

21 “Main frenmob, ai askim yumob na blanga jidan sori langa mi, dumaji God bin meigim mi im enami na. 22 Wotfo yumob oldei meigimbat mi apset? God olredi bin dum tharran langa mi. Yumob reken tharran im naf?

23 “Ai wandim sambodi blanga irrim main wed en raidimdan langa buk, 24 o pudum mak langa detlot rok garram aiyanwan tul. 25 Bat ai sabi main Seibya hu oldei jidan deya langa hebin garra kaman en gibit mi feyago. 26 Blanga main bifpat, maitbi im garra binijap, bat brom dijan bodi ai garra luk langa God na. 27 Yuwai, ai garra luk langa im miselp, en ai kaan weit blanga det taim.

28 “Main fren olabat, yumob oldei jinggabat hau yumob gin bleim langa mi, en hau yumob gin ardim mi nogudbalawei, en yumob oldei tok, ‘Yubin meigim dijan trabul kaman langa yu ronselp.’ 29 Wal yumob lafta wotjim miselp wen God garra jadjim yumob blanga ol dislot. En im garra panishim yumob du.” Lagijat na Job bin tok.