1 Wal aibin kipgon tok, “Wal dijan na det mesij blanga Bebalon. Detlot enamimob blanga Bebalon kaminap wulijim wiliwili brom det deset kantri sauthwei. 2 Aibin luk det brabli nogudwan sain langa main drim.

“Yumob pipul brom Elam en Midiya, yumob majurrumap miselp raidaran langa detlot Bebalon pipul en fait langa olabat, dumaji YAWEI det trubala God bin meigim pramis blanga binijimap ola trabul en adtaim weya detlot Bebalon pipul bin gibit langa ol detlot najalot pipul.

3 “Mi abumbat detmatj pein jis laik det wuman weya im garra abum im beibi. Mi hatjamp en mi garram detmatj pein, ai kaan irrim en luk gudwei, najing. 4 Main hed im spinspinbat en mi bradin en sheiksheikbat. Wen det san im oldei godan, im det taim weya ai laigim detmatj, bat im det nogudwan taim na. 5 Wal langa main drim aibin luk detlot haibala bos blanga Bebalon bin abumbat bigiswan padi. Olabat bin dringgimbat en dagadagatbat, wen sambodi bin jinginat adbala, ‘Ola boswan men, yumob deigim yumob pleis na. Yumob grebum yumob shild.’

6 “Wal YAWEI bin tok langa mi na, ‘Yu jandim wanbala solja hu oldei wotjimbat blanga go en luk blanga faindat wanim hepinbat. 7 Wen im luk detlot solja garram hosis kaminap langa dubala lain, en det najalot solja kaminap garram dongki en kemul, wal yu garra dalim im blanga luk brabli gudwei.’

8 “Wal det solja bin tok na, ‘Bos, ebridei en ebrinait mi oldei jidan deya ontop langa det haibala haus en wotjimbat. 9 Luk na. Sambala men garram hosis kaminap langa dubala lain.’

“En streidawei sambodi bin jingat adbala, ‘Det taun gulum Bebalon bin buldan na. Ol detlot drimin sheip langa Belabon bin buldan en breik langa det graun.’✡ Reb 14:8; 18:2

10 “Wal main pipul olabat, ol yumob Isreil pipul, yumob bin abum brabli adwan taim, bat aibin dalim yumob wanim YAWEI det boswan God blanga Isreil pipul bin tok.”

11 Aibin kipgon tok, “Wal dijan na det mesij blanga Idam. Sambodi brom Idam bin jingat langa mi, ‘Solja, wotaim naitaim garra binij?’

12 “En aibin tok brom det pleis weya aibin oldei wotjimbat ebrijing, ‘Im gulijap ailibala na, bat bambai naitaim garra kaman igin. If yu wandim askim mi igin, wal yu gin kaman en askim mi igin.’ ”

13-14 Wal aibin kipgon tok, “Wal dijan na det mesij blanga Areibiya. Ol yumob pipul brom Dedan, hu jidan langa det deset kantri langa Areibiya. Yumob garra dalim ola trebalamob blanga bringimap woda langa detlot hu jidan thestibala. Ola pipul blanga Tema, yumob garra bringimap daga langa dislot pipul hubin ranawei brom olabat kantri. 15 Olabat bin brabli nokap wen deibin ranawei brom detlot bigwan naif en shapwan spiya, dumaji olabat bin bradin blanga faitbek.

16 “Wal YAWEI bin tok langa mi na, ‘Dregli, langa wanbala yiya, ola gudbala ting blanga Keda garra ol binijap. 17 Detlot men blanga Keda hu oldei yusumbat bo en erro bin jidan brabli strongbala, bat bambai oni lilbit strongwan men garra jidan laibala. Wal dijan na main pramis, dumaji mi na YAWEI det trubala God blanga ola Isreil pipul.’ ”