1 Munsa khunjipu Nnyizinku araka: “Wala yo khanteela okhupalela, na khanteela okisiileza, na anlupa yoori: ‘Nnyizinku khoopuweleleeni!’ ”

2 Nnyizinku khumuuzela Munsa araka: “Eto oriina mmakhono niini?” Ye khuri: “Pakhora.”

3 Aphano khumuuza yoori: “Weeselele vathi!” Ye khweesa khuthatuwa khwiiya nyookha Munsa khutthira. 4 Nnyizinku khumuuza Munsa theenya yoori: “Wookole nkhono awo okhole nkhira aya.” Khookola nkhono awe khukhola, khurutela wiiya pakhora. 5 “Eto ti ya owaakhupalisa yoori oopuweleliye Nnyizinku, Nluku wa amarehemu apapazaya, Nluku wa Eburahiima, Nluku wa Esiyaakha, Nluku wa Yaakhumpa.”

6 Nnyizinku khumuuza theenya yoori: “Otthe nkhono awo vamweyo!” Khutthaavo, alazakavo khwiiyana maaharaja khulakala nkhama liwiku.

7 Nnyizinku khumuuza theenya yoori: “Othuule nkhono awo opheya otthe vamweyo.” Khutthaavo, noolazavo khurutela wiiya sawasawa na mwiili awe wooshi.

8 Nnyizinku nalelo khuvira amuuzaka araka: “Amana yo ahikhupaleli ama ahitakhi, alama yamwanzo, yaphiiri anteela okhupalela. 9 Ila amana nalelo eeya ahinakhupalele alama epo piiri wala khuhuusiilezi, ottekhe maati vattitthiiru a mmuttho Niilu, wiitthele tuulu, antta othatuwa maati aya apo a tuulu eeye taamu.”

10 Aphano Munsa khumuuza Nnyizinku yoori: “Oo, Mbwana, thanku raku miiyo akinwahi ottakhula saana; mpakha nasaapi eti waaziyeevo ottakhulana miiyo, amana kittakhulaka kintta okukuma.”

11 Nnyizinku khunjipu yoori: “Paani amwinkhiyeeyo milomo pinaatamu? Paani amwinkhiyeeyo ottakhula wala paani awuumpiyeeyo apale ohisiili? Wala apale awoona ama apale ohooni? Khahiyo miiyo Nnyizinku? 12 Apho olawe, Miiyo kinttela wiiya vamote na milomo zawo na kinuunozela etthu onttelaaye ottakhula.”

13 Ye khujipu araka: “Oo Mbwanaaka, kinuuvekela yoori onrume ntthu nkina.”

14 Aphano Nnyizinku khumpattha katapu khwa Munsa, khumuuza yoori: “Weeyo khuna ttwiiyo Arawu, nleevi? Miiyo kinjuwa yoori ye onwahi ottakhula saaneene. Nasaapi eti ye ontta ota oteela okutthanana weeyo, ye onttela wiiya woofurahi amana oosikana. 15 Weeyo onttela ottakhulana omuuze mattakhuzi anttelaaye olupa; miiyo kintta owaawunini moowiiri yoori mwittakhule na kiwuuzeni etthu yooretta. 16 Arawu onttela ottakhulana atthu khwa zwaamu yawo, onttela wiiya nlomo awo, weeyo onttela wiiya nkhama Nluku khwa ye. 17 Othuule pakhora eti mmakhono, ti ethiiti onttelaaye orettana alama za minjuza.”

18 Aphano Munsa khurutela wa nkhwewe Yeeturu khumuuza yoori: “Safwatali, kilikheni kilawe Misuri kawoone ajamaazaku nkhama nalelo ari haayi.”

Yeeturu khujipu araka: “Olawe na heeri.”

19 Nnyizinku aamuziye Munsa ari Miitiya yoori: “Orutele Misuri maana ooshi apale aari otakhaaye owuula afwa.” 20 Aphano Munsa khunthuula muukha awe na aanaawe khuwaattha va puuru vawe khusala arutela Misuri. Mmakhono mwawe aathuuliye pakhora ya Nluku.

21 Nnyizinku khumuuza theenya Munsa yoori: “Miiyo kawinkha owahi wooretta minjuza zawaatta. Amana orutelawo Misuri wiiye woojitthenka yoori orette omaasho wa mfwalume wa nti aya opule minjuza zaya epo, ila miiyo kinlawa koomise rooho yawe ahiwaalikhe atthu apo olawa. 22 Omuuze Firawuuna oraka: ‘Nnyizinku alupa toono: Ezirayiilu mwanaka wamwanzo. 23 Miiyo kalupa yoori: “Onlikhe mwanaka alawe akaaputu.” Ila weeyo amana okatthala kintta omuula mwanawo wamwanzo.’ ”

24 Eettaka Misuri vahali aamakiyeevo ntarikhi Nnyizinku khunteela Munsa yoori amuule. 25 Ila Zipoora khuthuula liwe loothokolowa khushija shapala ya soola ya mwanawe khupiyana moolu a Munsa. Khuri: “Weeyo omannaka miiyo khwa taamu.” 26 Zipoora khuri: “Omannaka khwa taamu,” athoonyezaka okhiriya opule. Wakathi otthuupule Nnyizinku khunlikha Munsa.

27 Aphano Nnyizinku khumuuza Arawu yoori: “Olawe n'yaara wakutthanane Munsa.” Ye khulawa khukutthanana va mwaako wa Nluku, khunchelisa. 28 Munsa khunthatelela Arawu zooshi epile Nnyizinku anrumiyeezo omuuza, na khumuuza alama zooshi za minjuza arumiweeyo oretta.

29 Aphano Munsa na Arawu khulawa khuwaakusanya attunkhulu ooshi a meezirayiilu. 30 Arawu khuwooza zooshi Nnyizinku amuziyeeyo Munsa. Nawiisha naye Munsa khuretta alama za minjuza vakatthi wa atthu apale, 31 yo khukhupali. Wakathi ajuwiyeevo yoori Nnyizinku awoopuweliye meezirayiilu na aawoniye nanna aari ohoowaazo yo khwiinama khwaaputu.