20
Ofwalume wa Yinsa na woosa wa Yaahaya
1 Siikhu moote, Yinsa aari owaanozela atthu Nnyupa wa Nnyizinku na awaatafusirelaka hapari zooshapweya. Nttumphule khutamo attunkhulu a mahaakhimu a tiini, anamanozela a kano na anamalokozela a tiini. 2 Yo khusala amuuzela araka: “Vitthu epi onrettana ofwalume-ni, wala ti paani awinkhiyeeyo ofwalume aya opo?”
3 Yinsa khuwaajipu yoori: “Na-miyo kintta owuuzelani etthu moote mwikuuze; 4 woosa wa Yaahaya waari wa pinkuuni ama wa anaatamu?”
5 Yo khusala oozelana atthaaporu araka: “Amana nilupa yoori waari wa pinkuuni, ontta onuuzela yoori: ‘Khi mwaasa aya niini mwihinkhupalelaka?’ 6 Na amana nilupa yoori waari wa anaatamu, atthu ooshi antta onivonya na mawe maana ankhupalela yoori Yaahaya napiyu.”
7 Attaaphale yo khujipu yoori: “Khanijuweeni nlupa amwinkhiyeeyo ofwalume.”
8 Aphano Yinsa khuwooza yoori: “Na-miyo akiniwuuzani ofwalume kinrettanaaye vitthu epi.”
Anamalima oohisuhi
9 Yinsa khulupa nlikaniso awoozaka atthu yoori: “Aarivo mwinyi mmote aazaliyeeyo mmashapa mwawe miitthi za wuuva, khuweekesa atthu yoori asala alimela, ye khulawa safwari yawe khwiikhala siikhu za waatta. 10 N'oofiya wakathi wa wuurula khunruma karumeyaawe mmote yoori alawe enkiwe wuuva, ila anamalima apale khumpiya, khumwiikara woohimwinkhi etthu. 11 Mwennyewe nshapa khunruma nkina, na oto theenya yo khunveyisa, khumpiya khumwiikara woohimwinkhi etthu. 12 Aphano khunruma wattaatthu, anamalima apale khumpiya, khunvulalisa na khumwiikara.
13 Paata ya toole, mwennyewe nshapa khusala oopuwela araka: ‘Kirette-ni? Aa! Kintta onruma mwanaka kinimphetachaaye, n'oomoona khweele khweele antta onhishimu.’
14 Anamalima apale wakathi amooniyeevo mwaana wa mwennyewe nshapa ntthile khulupa yoori: ‘Namarithi nshapa ntthi ti otu. Olawa nimuule, liiye leetthu.’ 15 Khunsukhumela othetekele wa nshapa khumuula.
Mwennyewe nshapa onttela owaarettela niini? 16 Ye ontta ota awoole anamalima apale, nshapa laya ntthile awenkhe atthu akina.”
Atthu apale aariivo n'oosiila mattakhuzi apale khulupa yoori: “Zihirettikhane vitthu epo!”
17 Yinsa khuweekesa khuwoozela yoori: “Maana a mattakhuzi apa aatikhiweeyo anlupa-ni?
‘Liwe ntthile eeseliyeeyo anamajeka nyuupa,
larettiwa wiiya liwe lootafikhana zayita mawe ooshi.’
18 Otule anttelaaye okwela liwe nttho ontta onyenyeya, na otule lininkwelaaye ontta osakeya eeye lifufu.”
Wuuzela monkoni wa lumpuru
19 Attunkhulu a mahaakhimu a tiini na anamanozela a kano khusala eekesa nanna yonkhola wakathi otthuupule, maana yo aajuwiye yoori nlikaniso opule oniwaalupa yo. Ila khuhisala akholeya mwaasa woowoova atthu apale aari attaaphale.
20 Aphano yo khusala anlupattha, khuwaaruma atthu aari ojinkhelelaaye wiiya anashariya onsaya sirini, yoori ansikanane paathuli ankhole anlawane wa mfwalume.
21 Yo khusala amuuzela yoori: “Mwanliimu, fweeyo najuwa yoori onttakhula na onnozela epile ziiyiyeeyo za shariya, ninjuwa yoori khuninthawula ntthu, onnozela haakhi wa nanna Nnyizinku antakhaazo. 22 Nkanuuze, nkhama ti yooshapweya oripha lumpuru la Seezari ama wala?”
23 Yinsa khujuwa olavilavi aya khuwooza yoori: 24 “Nkakitiiseleni nzurukhu apha. Ratarato eti vanzurukhu apha ti yaani?” Atthu khujipu yoori: “Ti ya Seezari!”
25 Khuwooza yoori: “Mwimwinkhe Seezari etile yiiyiye ya Seezari na mwimwinkhe Nnyizinku etile yiiyiye ya Nnyizinku.”
26 Yo khuhisala ansikanana hatha paathuli vakatthi wa atthu apale; khwiiya ootikinisiwa pi mattakhuzi apale aajipwiweeyo ti Yinsa, yo khunyamala.
Wuuzela monkoni woosisimuwa
27 Masatukhi apale ahaari okhupalaaye osisimuwa wa anamfwa, khulawa akina khumwaattama Yinsa. 28 Khusala alupa yoori: “Mwanliimu, Munsa aatikha yoori, nlume amana afwa, muukhaawe ahinvokoleleeni mwaana, ona yooraliwa ti ttwiiye ampatthele aana eeye a marehemu ttwiiye. 29 Aarivo attwi sapa: otu nwulu aya khuloola khufwa, muukhaawe ahimpattheleeni mwaana. 30 Khuraliwa ti ttwiiye, khufwa ahimpattheeni mwaana, 31 khuraliwa ti ttwiiye wattaatthu, khufwa ahimpattheleeni mwaana, ooshi apale sapa khufwa woohimpattheli mwaana. 32 Omwiisho waya muukha otule khufwa. 33 Siikhu yoosisimuwa onttela wiiya muukha waani maana oosaapa anraliye?”
34 Aphano Yinsa khuwaajipu yoori: “Atthu a voolumwenku apha anloola na anraliwa. 35 Ila atthu apale anttelaaye osuhi olawa pinkuuni noosisimuwa muufwa, khanlawa oloola wala oraliwa; 36 maana khamfwa theenya, anttela wiiya nkhama malayikha na aana a Nnyizinku, mwaasa yoori asisimuleliwa muuhaayi. 37 Hatha napiyu Munsa athoonyeza monkoni woosisimuwa wa anamfwa, wakathi moottho opule waari okholelaaye vamutthi nwishi, ye khunkhuwela Mbwana yoori, Nnyizinku wa Eburahiima wa Esiyaakha na wa Yaakhumpa. 38 Eto enthoonyeza yoori Nnyizinku khahiyo wa anamfwa, Nnyizinku wa atthu awoona. Maana khwa Ye atthu ooshi anaaye ohaayi.”
39 Anamanozela akina a kano apale aari attaaphale khumuuza yoori: “Wajipu saana Mwanliimu!” 40 Khuhiivo hatha ntthu kiina wootakha omuuzela theenya.
Al-Masiihu Mbwana wa Daawuuda
41 Elottelanaka Yinsa khuwoozela yoori: “Mwaasa aya niini atthu alupaka yoori Al-Masiihu mwaana wa Daawuuda?
42 Daawuuda alupa nkithaapu ya Zaapuuri yoori:
‘Mbwana Nnyizinku,
amuuza Mbwanaaka yoori:
“Wiikhale nkhono-nlume aka,
43 mpakha miiyo kitthe
moolu awo vatulu wa maatuwi awo.” ’
44 Nkhama Daawuuda onimwiittha Al-Masiihu yoori Mbwana, enrettikhana toovi wiiya mwanawe?”
Yinsa na anamanozela a kano
45 Atthu ooshi khusala ansiileza, Yinsa khuwooza anakhiyoni awe yoori: 46 “Phoole na anamanozela a kano, apale woowaatuvela owala ajapi zoolepisana, ochelisiwa vaparasa na woowaatuvela wiikhala puuro za wiilokozi nnyupa woosifwiwamo Nnyizinku na puuro za wiilokozi vanjampo, 47 aniweeyelaaye anamfweliwa pi amanna zaya vitthu zaya* Aniwaajelaaye anamfweliwa pi amanna zaya khwa luuka ya ekereeku., ajinkhaka oretta lompa zoolepa. Apo aya anlawa apokherele hukhumu khuluyeene.”