1 Wakathi aya opo Yuuda aamwazeyananiye attwiize khusala eekhala wa mwinyi mmote aari wiitthiwaaye Hiira nti wa Atulaamu. 2 Ottuukho Yuuda ansikaniyeewo mwanankha mmote aari mwaana wa nkanaani aari wiitthiwaaye Shuuwa, ye khunrala. 3 Khwiimittha khumpattha mwaana khuntthaja nzina la Eeri. 4 Khwiimittha theenya khumpattha mwaana nkina khuntthaja nzina la Onaani. 5 Khurutela theenya khumpattha mwaana khuntthaja nzina la Shela, ompattikhanaru Yuuda aarettiye ari nti wa Kezipu.

6 Ye khumweekesa muukha aari wiitthiwaaye Tamaara khunlooza mwanawe Eeri. 7 Ila Nnyizinku khuhintuveli thwapiya za Eeri, khufiyelela omuula.

8 Aphano Yuuda khumuuza Onaani yoori: “Onrale muukha wa marehemu ttwiiyo, ompatthele aana yoori ttwiiyo eeyane peewu khwa weyo.” 9 Ila Onaani aajuwiye yoori aana aari weettelaaye opattikhana, khaari weettela wiiya awe. Ti eto, amana arapalelana muukha wa ttwiiye, zina yawe aari wiitthelaka vathi yoori ahiwaapatthe aana eeya a ttwiiye. 10 Nnyizinku khuhisala zintuvela vitthu epile aari orettaazo khufiyelela omuula.

11 Aphano Yuuda khumuuza Tamaara muukha wa mwanawe yoori: “Orutele wa apapazo ori nankhwele onwejaka mwanaka Shela owula.” Ye aalupiye toowo mwaasa woomoovisa mwanawe Shela ofwa. Tamaara khulawa khwiikhala wa papaawe.

12 Ziviriyeevo siikhu za waatta, khufwa muukha wa Yuuda mwaana wa Shuuwa, nawiisha matthaka khulankha na swaahipu awe Hiira wa nti wa Atulaani, khusala alawa owoona atthu apale ari okasaaye ovuzi wa nyama zaya nti wa Tinna.

13 Khuuziwa Tamaara yoori: “Nkhwewo ontta ovira, oneetta Tinna olawa okasisa nyama zawe.” 14 Khuvula kuwo zawe epile aawaliyeezo z'oonankhwele, khujifinikha nshukwi yoori ahijuwiwe, khulawa khwiikhala vanlako wa sitati ya Enayimu waattamana na tarikhi ya Tinna. Ye aarettiye toowo mwaasa woojuwa yoori Shela awula, ila khwiiya ahinalooziwe.

15 Yuuda n'oomoona khumwaakanyerela omalempe, mwaasa yoori aajifinikhaniye nshukwi omaasho wawe.

16 Ye khunkhuwela araka: “Nkatu! Kinuutakha, kuulalane.” Ye ahijuwaka yoori ti nkhwewe muukha wa mwanawe.

Tamaara khumuuzela yoori: “Amana kilalana weeyo onikinkha-ni?”

17 Yuuda khunjipu yoori: “Kintta wuuperekheza puuzi moote ya nliphanko mwaka.”

Tamaara khuri: “Aayo! Kasiila. Ila okilikhele etthu kinwahaaye waamini yoori onlawa wakiperekheze puuzi yaya eto.”

18 Ye khumuuzela araka: “Kuulikhele niini?”

Tamaara khujipu yoori: “Okilikhele peetthe yawo, mfukho awo na pakhora eto oriina mmakhono mwawo.” Yuuda khumwinkha zooshi epile anvekeliyeezo, khunlalana khwiimittha. 19 Nawiisha Tamaara khurutela owawe khuvula nshukwi khuwala kuwo zawe epile z'oonankhwele.

20 Yuuda khuthuula puuzi khumwinkha swaahipu awe Hiira yoori alawane athuule vitthu epile anlikheliyeeyo muukha otule, ila ye khuhinsikani. 21 Hiira khuwoozela atthu a nti aya opule yoori: “Ori vayi malempe otule aniikhalakaaye ntarikhi?”

Yo khujipu araka: “Mmuti mphu khaamo hatha malempe wa wiiya wa nttumphu.”

22 Ye khurutela wa swaahipu awe Yuuda, khumuuza yoori: “Akinsikaneeniwo, atthu a nti aya opule akuuza yoori khaawo hatha malempe wa wiiya wa mmuti nttumphule.”

23 Yuuda khulupa yoori: “Ti asalane epile kimwinkhiyeezo yoori ehikikwele paathuli, miiyo kaaperekhiye puuzi yaya, ila weeyo khuhinsikani ye aya.”

24 N'oovira nyeezi mittatthu, khuuziwa Yuuda yoori: “Nkhwewo Tamaara araruwa, apha eemittha.”

Ye khuri: “Athuuliwe alawe alukuziwe!”

25 Athuuliweevo alawaka olukuziwa, khumperekheza nhupi nkhwewe araka: “Erukulu eti kiriina ti ya mwennyewe vitthu epi.” Khulupa theenya yoori: “Moone pakhora eti, mfukho opu na peetthe eti nkhama mwininjuwa mwennyewe.”

26 Yuuda nawoona vitthu epile khulupa yoori: “Ye ti wa shariya zayita miiyo, maana kamwaahitiye oraliwa ti mwanaka Shela.” Na Yuuda khuhiruteli orapalelana.

27 Ofiiyeevo wakathi woopattha ekumi, mwiirukulu mwawe aarimo aana awiri. 28 Apatthaka ekumi otu mmote aya khusarula nkhono awe mmote, mwaatani khuthuula luuzi lookhuttuwa khumfukela khuri: “Otu ti eeyiye tthakuzi woosaruwa.” 29 Otule aasaruliyeeyo nkhono awe khurutiselamo, khusaruwa otule ahaasaruliyeeyo, mwaatani khuri: “Huu! Wapattha toovi tarikhi yoosaruwa?” Khuntthaja nzina la Pereezi* Nzina nttho la Pereezi maana aya tarikhi yoosaruwa . 30 Aphano, khusaruwa ttwiiye otule aafukeliweeyo luuzi lookhuttuwa nkhono awe, khutthajiwa nzina la Zeera.