1 Eburahiima khunrala muukha nkina aari wiitthiwaaye Khetuura. 2 Ye khunvokolela aana apa: Zimraani, Yokishaani, Medaani, Midiyaani, Ishibaaki na Shuuwa. 3 Yokshaani khunvokola Sheeba na Dedaani, aana a Dedaani aari Waashuuru, Waletushi na Walewumi. 4 Aana a Midiyaani aari Eefa, Eferi, Hanooki, Abiida na Eelida. Ooshi apa aari aana na atuulu a Khetuura.

5 Eburahiima khumwinkha Esiyaakha vitthu zooshi aariinaazo. 6 Ila aanaawe apale aawaavokoleliyeeyo na aakha akina, ari haayi nalelo, khuwenkha vitthu zaya na-yo, khuweekarela phantte ya malawa-juwa yoori ahiikhale vamote na mwanawe Esiyaakha.

7 Eburahiima eekhaliye nyaakha miiya na saapiini na mithaanu. 8 Ye afwa ari wa wuuluvala arina nyaakha za waatta, khulawa khuzikhiwa vamote na ajamaaze apa afwiiyeeyo. 9 Esiyaakha na Esumayila, khunthuula khulawa khunzikha nlikurakuza la Makhipeela kharipu na Manre, nshapa la Eforoni mwaana wa Zohaari nhiiti. 10 Nshapa nttintthile oozanyeziweeyo Eburahiima pi Ahiiti, pi ottuukho azikhiweewo ye na muukhaawe Suhura. 11 Paata ya Eburahiima ofwa, Esiyaakha aari wiikhala nti wa Peeri-Lahayi-Rooyi, Nnyizinku khusala amparikhiya.

12 Eti hatiithi ya peewu ya Esumayila mwaana wa Eburahiima, aavokoliweeyo ti Hajira wa Misuri karumeya wa Suhura.

13 Apa mazina a aana aavokoliweeyo ti Esumayila: Nebayoothi, mwaana wa mwanzo wa Esumayila, Kedaari, Adibeeli, Mibisaamu. 14 Miishima, Duuma na Maasa. 15 Hadaadi, Teema, Yetuuri, Nafiishi na Kedeema. 16 Apa aana Esumayila khumi na awiri, pi atthaapo aari afwalume, wakhula mwaana na lihimo lawe na nhali aari omakaamo. 17 Esumayila eekhaliye nyaakha miiya na talaathiini na sapa. Khufwa khulawa khuzikhiwa vamote na ajamaaze apa afwiiyeeyo. 18 Peewu yawe yeekhaliye waaza Hawila mpakha Shuuri kharipu na Misuri tarikhi yaweetta Ashuuru. Yo aari woohisiilani na ojama nkina wa Eburahiima.

19 Eti hatiithi ya peewu ya Esiyaakha mwaana wa Eburahiima: Eburahiima khunvokola Esiyaakha. 20 Esiyaakha n'oopattha hirimo ya nyaakha arupayiini khunrala Rapekha mwaana wa Betuweeli, nlupuwe Labani. Yo aari Araamu aari wiikhalaaye Paata-Araamu, tuniya ya Mesopotamiya.

21 Mwaasa wa muukhaawe ohiina mavokozi, Esiyaakha khulompa wa shariyavo anvekelaka Nnyizinku. Ye khusiila lompa yawe Rapekha khwiimittha. 22 Aana awiri khusala oomana mwiirukulu mwawe. Ye khushanka khusala ajuuzela yoori: “Niini enrettikhanaaye mwiirukulu mwaka, nkhama pi toono keemitthela-ni?” Aphano ye khumuuzela Nnyizinku.

23 Nnyizinku khunjipu:

24 Zifiiyeevo siikhu zoopattha ekumi, khuwaavokola aana a maphapo. 25 Otu woovokoliwa mwanzo aari wookhuttuwa na wa waatta ovuzi, ti maana yootthajiwa nzina la Ezawu* Nzina nttho la Ezawu khwa luuka ya Meebereewu lina maana la mwiili wa wiitaala ovuzi. . 26 Elottelanaka khuvokoliwa ttwiiye, nkhono awe okholeliye ekwakuno ya Ezawu. Ti maana yootthajiwa nzina la Yaakhumpa† Yaakhumpa khwa luuka ya Meebereewu linlattanana na nttakhuzi liriina maana a ekwakuno na theenya lina maana oottettekha. . Ampattikhanaru aana aya apa, Esiyaakha aarettiye arina nyaakha siithiini.

27 Aana apale khuwula, Ezawu khwiiya namasaya nwulu na aari wontuvela weettetta ntthuttu, ila Yaakhumpa aari ntthu woonyamala wontuvela wiikhala vaje. 28 Esiyaakha aari ompheta Ezawu, mwaasa wontuvela orafuna nyama epile aari osayaazo. Ila Rapekha aari ompheta Yaakhumpa.

29 Siikhu moote, Yaakhumpa khwiipikha sekuseku, wakathi aya opo Ezawu aarettiye eettaka orutiru ntthuttu ari wookholiwa ti jala na wooshokhera. 30 Ye khumuuza Yaakhumpa yoori: “Okinkhe vitthu epo oniipikhaazo zookhuttuwela kije. Kintakha ofwa jala!” Ti eto Ezawu enkhiweeyo nzina la Edomu.

31 Yaakhumpa khumuuza yoori: “Waaze okuuzanyeza lifunku lawo l'oomwaana w'oomwanzo khapula.”

32 Ye khumuuza yoori: “Lina fwayita-ni lifunku laya nttho la wiiya mwaana wa mwanzo, miiyo kitakhaka ofwa jala!”

33 Yaakhumpa khusala ankhanyarela yoori: “Olaphe.” Ye khulapha, khumuuzanyeza Yaakhumpa lifunku lawe l'oomwaana wa mwanzo.

34 Aphano ye khumwinkha Ezawu phaawu na sekuseku y'eepwiri. Khuja khunywela, khusala alawa safwari zawe.

Woohooneli fwayita lifunku l'oomwaana wa mwanzo.