4
Ohirimiziwa wa Timootiyu
1 Rooho Ttakatthiifu enlupa saaneene yoori omwiisho anlawa atthu akina alikhe amini, asiilezaka nafusi zoottettekha na masomi a masheethwani. 2 Masomi aya apo anlankha mmakhono wa manaafikhi na anamahata, ariina rooho zoolukula ahinjuwaaye etthu yootakhala wala yooshapweya. 3 Yo aniwooza atthu yoori oralana mwiikho na vitthu-zoojiwa kinoko zaya haraamu. Vitthu-zoojiwa epile Nnyizinku aphattucha yoori apale animwaaminaaye na anjuwaaye haakhi, aje anshukhurwelaka. 4 W'eekhweele, epile Nnyizinku aphattuchiyeeyo pi zooshapweya zooshi, ehiiyevo hatha moote enthanyiwaaye amana yiiya yoopokhereliwa wonshukhurwelavo Nnyizinku. 5 Vitthu-zoojiwa zaya epo zinhalaalishiwa ti nttakhuzi la Nnyizinku na lompa.
Karumeya woororomeleya wa Yinsa
6 Amana weeyo owaanozela attwiizo mattakhuzi apa, oniiya karumeya wa Yinsa Al-Masiihu wookemaani, ojilipisanaka mattakhuzi a amini na masomi ookhweele apa olottiyeeyo. 7 Masomi oovonyeya na hantisi zoololo ojiwerawerisane. Ojikhomaaze na emaani. 8 Okhomaaza makhonkolo fwayita yaya vattitthiiru, ila emaani ti ye eriina fwayita khwa zooshi, maana entana nroromelo w'oohaayi otthuupo na aahera. 9 Mattakhuzi apa pi awaamineya na ansuhi okhupaleliwa. 10 Ti eto ninjuumanisaaye na okhola khaazi mwaasa yoori nroromelo etthu nattha wa Nnyizinku Woohaayi. Ye Namuusuru wa anaatamu ooshi, haaswa-haaswa khwa apale animwaaminaaye.
11 Mattakhuzi apa ohirimize na osomise. 12 Hatha ntthu mmote ahitarawu oshaapu awo, ila khwa ottakhula wawo, menttezi awo, pheta, amini na wookemaanivo wiiye nthoonyezo wa anamwaamini. 13 Vakatthi wa anamalottela, mpakha miiyo ota, olipane osoma, otafusiri na osomisa Nttakhuzi la Nnyizinku. 14 Wakathi waattheeliweevo makhono pi attunkhulu veeshwa vawo oolompelaka, Nnyizinku nkatthi wa Rooho Ttakatthiifu awinkha tthuvo. Ohisahawu orumeyela.
15 Vitthu epi weettettise saana na ojilipisane etthiipi yoori okhomaala wawo nkatthi wa amini wiiye wa wooniwa pi atthu ooshi. 16 Ojiinanele weeyo na wiiyane phoole na mwentto opu onsomisaaye, vitthu epo ojilipise oretta. Amana okhanyarela oretta etthiipo, ontta ojuusuru weeyo na apale anuusiilaaye.