1 Jã'a i'ka pi'nisirʉmʉ pãire ija'che i'kasi'kʉa'mʉ Jesús, chʉkʉna'te repaʉ neenare ũcuachi'a:

2 —Maire judíopãi che'chonana'me fariseopãi si'arʉmʉ Moisés tocha jo'kasi'e chʉ'vajʉ pa'ime, pãipi asa chẽa cho'ojʉ paapʉ chini. 3 Repana chʉ'vajʉ chʉ̃'ʉñe peore asa jachama'ñe cho'ojʉ pa'ijʉ̃'ʉ. Repana pa'icheta'ni ña chẽa ũcuaja'che pa'imanejʉ̃'ʉ mʉsanʉkona. Ũcuana i'kache cho'oma'ñe chekere cho'onaa'me repana. 4 Jmamakarʉjẽ'e repanare cho'oʉama'ñere chekʉnare rʉa cuajare si'ache chʉ̃'ʉ jo'kanaa'me repana. 5 Aperʉmʉ pa'isina judío ʉmʉpãi Dios chʉ̃'ʉsi'e cho'ojʉ va'i ca'nipi rũhira'vʉrʉã cho'o ũcuara'vʉrʉã sa'navʉãna Dios chʉ'o tochasija'orʉã mañaasome, repana jʉ̃jñare quẽo tʉ̃ñu chini. Jã'ajekʉna repana fariseopãi pãipi ña, “Re'onajejʉ Dios chʉ'o rʉa chiime ina”, chiapʉ chini si'ache cho'ojʉ Dios chʉ'o tocha maña tʉ̃ira'vʉrʉã na'a ʉjavʉã cho'o repana chiapʉãna'me jʉ̃jña quẽo tʉ̃ime repana. Ũcuaja'che pãipi ña, “Diore rʉa cuasanaa'me jã'ana”, chiapʉ chini kãña re'ojakãñapi ʉjacueñoãre ju'ijʉ nʉka ku'ime repana. 6 Ũcuaja'che pãipi repanani ãu ãuñu chini soito mʉa repanare soisi'kʉre kueñe ñu'ineeme repana. Ũcuachi'a mai judíopãi chi'ivʉ'ena mʉa kakani masina ñu'isaivʉãre ñu'ineenaa'me repana. 7 Ũcuachi'a ãu ĩsichejñare ku'ijʉna, pãipi repanani ña chẽa pojojʉ, “Peore masinajejʉ pãi che'chonaa'me ina”, chiito rʉa pojonaa'me repana.

8 ’Mʉsanʉkonata'ni pãire che'choni rupʉ repanapi mʉsanʉkonani, “Peore masinajejʉ pãi che'chonaa'me ina”, chiapʉ chini che'choto cu'amʉ. Mʉsanʉkona chʉ'ʉre cuasajʉ majapãija'ñechi'a pa'inaa'me. Mʉsanʉkonare che'chokʉ peore Masiʉ ũcuate'eʉ'mʉ chʉ'ʉ, Dios Raosi'kʉ. 9 Ũcuachi'a icheja cheja pa'inare te'eʉ'terejẽ'e masinare, “Peore masiʉ'mʉ ikʉ”, chini repaʉ'te, “Ja'kʉ”, chiijʉ pa'imanejʉ̃'ʉ, Cʉnaʉmʉ Pa'ikʉ'te Diorechi'a ũcuate'eʉ'te peore Masiʉ'te Ja'kʉ paanajejʉ. 10 Ũcuachi'a pãi chʉ̃'ʉni rupʉ repanapi mʉsanʉkonani, “Peore masinajejʉ pãi chʉ̃'ʉnaa'me ina”, chiapʉ chini chʉ̃'ʉto cu'amʉ. Mʉsanʉkonare chʉ̃'ʉkʉ peore masiʉ ũcuate'eʉ'mʉ chʉ'ʉ, Dios Raosi'kʉ. 11 Mʉsanʉkonapi te'eʉ chekʉnare pãi chʉ̃'ʉra chini cho'oche cho'okaiva'ʉja'che chekʉnare re'oja'che cho'okaiʉ pa'ijʉ̃'ʉ. 12 Ija'chea'me: Pãi ũcuanapi meñe, “Chekʉnare na'a rʉa masime chʉkʉna”, chiijʉ cuasanare, “Rʉa vesʉnaa'me ina”, chiija'mʉ Dios. Jã'ata'ni repanapi meñe, “Chekʉnare na'a rʉa vesʉnaa'me chʉkʉna”, chiijʉ cuasanare, “Rʉa masinaa'me ina”, chiija'mʉ Dios —chiisi'kʉa'mʉ Jesús.

13 Ũcuarʉmʉ Jesús fariseopãina'me judíopãi che'chonare ija'che i'kasi'kʉa'mʉ:

—Sẽ'sevʉchi'a re'oja'che cho'onajejʉna rʉa cu'ache ti'jñeja'mʉ mʉsanʉkonare judíopãi che'chonana'me fariseopãi. Dios chʉ'o masinata'ni chʉ'ʉni cuhejʉ Dios pa'icheja saimanejanaa'me mʉsanʉkona. Jã'ajekʉna chekʉna ũcuaja'che chʉ'ʉre cuasajʉ jovoñu chiisinata'ni jovoma'me mʉsanʉkona chʉ'ʉre cuheche'te ñani. 14 Ũcuachi'a va'jeva'na paache jorejʉ tʉtesõnaa'me mʉsanʉkona. Jã'aja'ñe cho'onata'ni pãipi ña, “Re'onaa'me ina”, chiapʉ chini Diore sẽni rʉa jeerʉmʉ sẽejʉ pa'inaa'me mʉsanʉkona. Jã'aja'ñe cho'onajejʉna Diopi chʉ̃'ʉʉna rʉa cu'ache ti'jñeja'mʉ mʉsanʉkonare, sẽ'sevʉchi'a re'oja'che cho'onare.

15 ’Sẽ'sevʉchi'a re'oja'che cho'onajejʉna rʉa cu'ache ti'jñeja'mʉ mʉsanʉkonare judíopãi che'chonana'me fariseopãi. Jã'aja'ñe cu'ache pa'inapi si'achejña ku'ijʉ chiaraã chekʉkã'jño jẽni, pãi jainʉkore che'chome mʉsanʉkona, repanapi asa chẽaa'jʉ chini. Mʉsanʉkonapi che'chojʉna asa chẽasina mʉsanʉkonare na'a cajejaiche cu'ache pa'inajejʉ mʉsanʉkona saijatoana vati toana saijanaa'me repana.

16 ’Na'ava'napi ũcuaja'che na'ava'nani juha sacheja'che chekʉnare cu'ache che'chonajejʉna rʉa cu'ache ti'jñeja'mʉ mʉsanʉkonare. Ija'che i'kajʉ che'chonaa'me mʉsanʉkona: “Dios mamire i'kacuhejʉ Repaʉ vʉ'ere roijʉ, ‘Cho'ojanaa'me’, chiisi'ere cho'omaneni cu'ache cho'oma'me. Jã'ata'ni Dios vʉ'e pa'imajñarʉã pachokuri cho'osimajñarʉãre roijʉ, ‘Cho'ojanaa'me’, chiisi'ere cho'omaneni cu'ache cho'ome mʉsanʉkona”, chiinaa'me. 17 ¡Ñakocaã ñamava'naja'ñe rʉa vesʉnaa'me mʉsanʉkona! ¿Keere Dios na'a rʉa chiikʉ? ¿Repaʉ vʉ'e? Jã'apãani, ¿pachokuri repavʉ'equee? Dios rʉa chiimʉ Repaʉ vʉ'e. Repa pachokuri ũcuachi'a repavʉ'e pa'ichejekʉna chiimʉ Repaʉ. 18 Ũcuachi'a ija'che i'kanaa'me mʉsanʉkona: “Mesako'a pãi Diore ĩsisimajñarʉã tʉo ʉoko'are roijʉ, mʉsanʉkona ‘Cho'ojanaa'me’, chiisi'ere cho'omaneni cu'ache cho'oma'me. Jã'ata'ni Diore ĩsisimajñarʉãre roijʉ, ‘Cho'ojanaa'me’, chiisi'ere cho'omaneni cu'ache cho'ome”, chiinaa'me. 19 ¡Ñakocaã ñamava'naja'ñe rʉa vesʉnaa'me mʉsanʉkona! ¿Keere Dios na'a rʉa chiikʉ? ¿Repaʉ'te ĩsimajñarʉã? Jã'apãani, ¿repamajñarʉã ʉoko'a? Dios rʉa chiimʉ repaʉ'te ĩsimajñarʉã. Repako'a ũcuachi'a repaʉ'te ĩsimajñarʉã ʉoko'ajekʉna chiimʉ Repaʉ. 20 Repako'are pãipi roijʉ i'kani repako'a tʉosi'e ũcuachi'a peore roijʉ i'kame. 21 Ũcuaja'che Dios vʉ'ere roijʉ i'kani repavʉ'e Pa'ikʉ'te Diore ũcuachi'a roijʉ i'kame. 22 Ũcuaja'che cʉnaʉmʉre roijʉ i'kani repacheja pa'isaivʉ Dios chʉ̃'ʉkʉ ñu'isaivʉ'te roijʉ ũcuachi'a repasaivʉ ñu'ikʉ'te Diore roijʉ i'kame.

23 ’Dios chʉ̃'ʉ jo'kasi'ere cho'ojʉ ja'orʉã ãu va'isʉche maña kua'koja'orʉãre si'arʉmʉ ĩsijʉ pa'inaa'me mʉsanʉkona, Repaʉ chʉ'ʉre ĩsijʉ̃'ʉ chiisi'e. Chekʉrʉmʉ dierepaja'orʉã jñaani te'eja'orʉ ĩsinaa'me. Chekʉrʉmʉ cienrepaja'orʉã jñaani dierepaja'orʉã ĩsinaa'me. Jã'aja'ñe cho'onata'ni Dioni masi cuasama'ñe pa'ijʉ sẽ'sevʉchi'a re'oja'che cho'onajejʉ Dios chʉ̃'ʉrepache asa jachajʉ cho'omanaa'me mʉsanʉkona: re'oja'che cho'oche, chekʉnare oijʉ pa'iche, chekʉnare ũcuarepa cho'oche. Jã'aja'ñe cho'onajejʉna rʉa cu'ache ti'jñeja'mʉ mʉsanʉkonare fariseopãina'me judíopãi che'chonare. Repa cu'amajñarʉã ũcua ĩsijʉ pa'ijʉ̃'ʉ Diore. Repaʉ chʉ̃'ʉsi'ea'me jã'a. Jã'ata'ni, “Chekʉnare re'oja'che cho'okaiche'te na'a rʉa cho'ojʉ pa'ijʉ̃'ʉ”, chiimʉ Dios. 24 Na'ava'napi chekʉnani juha sacheja'che cho'ome mʉsanʉkona. Ãiñena mi'api tuãni mañaru jmava'ʉreta'ni ña mini sẽjo ãiñeja'ñe Dios rʉarepa chʉ̃'ʉma'ñere si'arʉmʉ cuasajʉ rʉa cho'ome mʉsanʉkona. Ũcuachi'a camelloji tuãni mañaru ʉjaʉ'teta'ni ña mini sẽjoma'ñe ũcuaʉ'te cuasoma'ñe teana rʉ̃osõñeja'ñe Repaʉ chʉ̃'ʉrepacheta'ni cuasamapʉ cho'oma'me mʉsanʉkona.

25 ’Ũcuachi'a cʉnaro'rona'me cʉnare'a sẽ'sevʉãchi'a sosajʉ sa'navʉã sosama'ñeja'ñe mʉsanʉkona rekoñoã cu'ache cuasache jo'kasõmanajejʉ sẽ'sevʉchi'a re'onaja'ñe cho'ojʉ chekʉna nee jorejʉ tʉte paanaa'me mʉsanʉkona. Ũcuachi'a mʉsanʉkonare cho'oʉache ũcuaʉache cho'onaa'me. Jã'aja'ñe pa'ijʉna Diopi chʉ̃'ʉʉna rʉa cu'ache ti'jñeja'mʉ mʉsanʉkonare fariseopãina'me judíopãi che'chonare. 26 Mʉsanʉkona fariseopãi rekoñoã cu'ache cuasanaa'me. Jã'ajekʉna mʉsanʉkona rekoñoã cu'ache cuasache'te jo'kasõjʉ̃'ʉ. Jo'kasõni re'oja'che cho'ojʉ pa'ijanaa'me mʉsanʉkona.

27-28 ’Mʉsanʉkona judíopãi che'chonana'me fariseopãi pãiʉ'te tãsicheja catapʉ poja'che choasi'pʉre nʉkorena re'oja'che ñoñeja'ñe sẽ'sevʉchi'a re'onaja'ñe ñome. Jã'ata'ni mʉsanʉkona rekoñoã jũ'isi'kʉre tãsicoje sa'navʉ jã'jusi'ena'me tara pa'icheja'che cu'ache cuasanata'ni sẽ'sevʉchi'a re'onaja'ñe cho'ojʉna pãi ña, “Re'onaa'me ina”, chiime mʉsanʉkonare. Jã'aja'ñe cho'ojʉna rʉa cu'ache ti'jñeja'mʉ mʉsanʉkonare.

29 ’Sẽ'sevʉchi'a re'oja'che cho'onajejʉna rʉa cu'ache ti'jñeja'mʉ mʉsanʉkonare judíopãi che'chonana'me fariseopãi. Ũcuachi'a aperʉmʉ Dios chʉ'o kʉasiva'nana'me Dioni cuasajʉ re'oja'che pa'isinare mʉsanʉkona aipãipi vanisõsiva'nare tãsichejña sẽ'sevʉãchi'a, re'oja'che ñochejña care'vajʉ pa'ime mʉsanʉkona, pãipi ña, “Dios chʉ'o kʉajʉ chuenisõsiva'nare oime jã'ana”, chiapʉ chini. 30 Jã'aja'ñe cho'ojʉ ija'che i'kanaa'me mʉsanʉkona: “Mai aipãi pa'irʉmʉ chʉkʉnapi ja'me pani Dios chʉ'o kʉasiva'nare vanisõmanera'asinaa'me”, chiinaa'me. 31 Jã'aja'ñe i'kajʉ, “Dios chʉ'o kʉasiva'nare vanisõsina jojocojñosinaa'me chʉkʉna”, chiicheja'che kʉa jñaume mʉsanʉkona. 32 Mʉsanʉkona aipãi cho'osi'eja'che cu'ache cho'ojʉ pañu chiime mʉsanʉkona. Jã'aja'ñe cho'ojʉna rʉa cu'ache ti'jñeja'mʉ mʉsanʉkonare.

33 ’Aña pa'icheja'che rʉa cu'ache pa'inaa'me mʉsanʉkona. Jã'ajekʉna Dios mʉsanʉkonare vati toana saoja'mʉ. 34 Jã'aja'ñe pa'inani chʉ'ʉ mʉsanʉkonare Dios chʉ'o kʉajanana'me Repaʉ chʉ'o che'chojanana'me masinare chẽa raoja'mʉ. Jã'ata'ni mʉsanʉkona repanare cuhejʉ te'enare vanisõjʉ chekʉnare kurususẽ'veroãna jẽ'jo vẽasõjʉ jo'e chekʉnare mai judíopãi chi'ivʉ'ñana mʉva asi vaijanaa'me. Ũcuaja'che repanani cu'ache cho'oñu chini vʉ'ñajoopoã repana saisijoopoã tuha ku'ejanaa'me mʉsanʉkona. 35 Jã'are cuhasõma'ñe cho'ojʉ pani, aperʉmʉ Dioni cuasajʉ re'oja'che pa'inare vanisõsi'e ro'i mʉsanʉkonapi peore ro'ijanaa'me. Chareparo re'oja'che cho'osi'kʉre Abelre vanisõsirʉmʉpi Berequías mamakʉ'te Zacaría'te, Diore ĩsimajñarʉã ʉochejana vanisõrʉmʉjatʉ'ka re'oja'che pa'isinare mʉsanʉkona aipãipi vanisõrena mʉsanʉkonapi ro'ijanaa'me repanare vanisõsi'e ro'i. 36 Ũcuarepaa'me jã'a. Irʉmʉ pa'inapi repana cho'osi'e peore ro'ijanaa'me mʉsanʉkona —chiisi'kʉa'mʉ Jesús repanare.

37 Ũcuarʉmʉ Jesús jo'e i'kasi'kʉa'mʉ.

—Mʉsanʉkona Jerusalén vʉ'ejoopo pa'ina cu'ache cho'oche'te ñakʉ rʉa sʉma'kʉ pa'imʉ chʉ'ʉ. Kurao repao chĩiva'nare kue'chaka vʉ'evʉãna soni paacheja'che re'oja'che cho'okasa chiikʉ'teta'ni cuheme mʉsanʉkona chʉ'ʉre. Mʉsanʉkona Jerusalén vʉ'ejoopo cana Repaʉ chʉ'ore mʉsanʉkonani kʉaa'jʉ chini Dios raosiva'nare cuhejʉ vanisõnaa'me. Ũcuachi'a Repaʉ chʉ'ore chʉ'vaa'jʉ chini Dios raosiva'nare cuhejʉ si'arʉmʉ catapi su'a vẽasõnaa'me mʉsanʉkona. 38 Asarepajʉ̃'ʉ. Ijoopo mʉsanʉkona pa'ijoopo Jerusalén vʉ'ejoopo, pãipi cu'ache cho'oñu chiito ʉ̃semaneja'mʉ Dios. Ʉ̃semaʉna pãi rani peore ñañosõjanaa'me ijoopo. 39 Chekere kʉara. Saipi'ramʉ chʉ'ʉ chura. Sanisõʉna rʉa jeerʉmʉ ñamanejanaa'me mʉsanʉkona chʉ'ʉre. Jã'ata'ni chʉ'ʉpi jo'e chejana cajekʉna ña, “Diopi re'oja'che cho'okaaʉ ikʉre, Repaʉ Raokʉ'te”, chiijanaa'me mʉsanʉkona chʉ'ʉre —chiisi'kʉa'mʉ Jesús.