68
God Nunda Natofo Sonembari Inonori.
1 Arie God, ere fete! Ondi, ninda gitofu sumbu taraghaore!
Evetu genembo ni imboe gamboe eraera ava, ondi bera beraghe, rojedo sumbu taraghaore!
2 Ondi bera beraghe, ne kau imbosi rave ise dadaberaira aminguse,
a kotugo tavaya avaraka dombuda tiveraira avavaga use, ya tefo aore!
Arie God, ari eko embo ninda dombuda ambu tefo aoro dae uju erena.
3 Kotugo nanda uju eni mo, evetu genembo God da sari vanembo eraera aimi,
nunda dombuda fetirise, ivugaghae ivisa kavisa arera.
Aminguse, ne divu fusedo ghuse, ivugaimi fumbu arugarera.
4 God kena yaru divore! Javono numoa gatise, yaru divore!
Nunda emboro rerebevu, nu foroga nunda ghasemodae budo, etoda anumbe furare!
Nunda javo mo Bajari ri. Nunda dombuda fete ivuga aore!
5 God, nunda tafaroro kambo kakara jokáda irise, babate da afa edo, roriri kaifa eraira.
6 Totofo irae a babate ainda kambo nune simbuge muturaira,
a kotugo dibura embo nune unumbeari buvu, dubo jama eraera.
O gogore osogo futo ari kakato baimara a memaghae irarera.
7 Arie God, ninda natofo giti beso uvu bayau irae vasada sefusera da sifo aminda,
8 Israel embo da God, doriri Sinai aminda isagha etiri nunda natofo gosusera,
aimi fusira aindae, enda daradaragiri borija utudaghe ati tino tafusegarigusira.
9 Arie God, nine borija mokogo dirari dae eteso dise,
ninda reighi fanotedo irei ava, jovereghedo fira, ari fatonga ava usira.
10 Ninda natofo Israel embo aminda dighi anumbuseri.
God, ni kavevera use, makasi embokena reju daiva usira ava, nine muteso ruruseri.
11 Bajari aghi aoro dae setiri, evevetu reighida iritirisera aimi, bino budo era siseri,
12 “Kini (King) mane nenda isoro embode namonde sosighi ari fusera, aimi oju sumberi.”
Amingusera amo, Israel embo evevetu natida iritirisera aimi,
roera bagia barise fera oju sufuse goro ghusera, ava soro e bariseri.
13 Ainda jokáda, rika ribo da ove nunda tamo mo, auri siliva (silver) aimi gutuseri,
ghabu mo auri goldi (gold) garigoimi gutuseri.
(Avata ne mendeni meka givu! Ne redae isoro sifoda sifi da karoda jungutusevu?)
14 God fakina kato doriri Salmoni aminda kini mane ondiri, oju sufusera da sifo amo, nune etiri borija dombu eni yaughari beká aimi rururughe vovosusira.
15 Arie, doriri Bashan, ninda mendo digari futo, ninda natofo barago amingori!
16 Arie Bashan embo, ne redae God nunda doriri Saion* Saion mo, ututu ijoghako eini bogu begaya Jerusalem jokáda irira. Avata, David da Yaru buku mave gefusera, kotugo feroveta mane mendeni bogu begaya Jerusalem dae sise, “Saion” gefuseri. Kau daba aminga ava, sifo mendeni, God da Tafaroro Kambo kakara use, “Saion” gefuseri. gategusira ava, tataseguse, dere erejirevu?
Bajari aminda dighi anumbusira,
a kotugo evovodae aminda irarira.
17 Bajari, nunda isoro ghasemo digarigo jo tegari da kaugo irae ainde Sainai ghedo ira,
vasa kakarago aminda teterusira.
18 Nu utuda vitise, evetu genembo mendeni sandi bundisira ava unumbe budo vitisira.
Evetu genembo gogore kakato barago numokena joba muturaera.
Bajari God aminda irá gheraira.
19 Bajari dae sakai saore! Nu sifo inono evia namondeda mema bouvu nune fumburaira.
Namonde nune seari jebugeraera.
20 Namondeda God mo, sari jebugari katori.
Mave seari namonde ambarida vaghodaghe buvuraera amo,
Bajari numori.
21 O ari eko embo numokena osogo eraera, ainda jiro ava nune dari bebejegarira.
22 Bajari aindae eminge sisira,
“Nenda gitofu nane sandido, doriri Bashan ghedo bu fua nenda ungoda fitarena.
A kotugo nenda gitofu mendeni eva kafurudaghe sandi bu fua nenda ungoda fitarena.
23 Fitono, nenda gitofo daovo gitofuda ororoimi gaunghe vitari aminda sive sembiyareva.
Kotugo nenda sino mane aimi gitofu da ororo ava sosofuse mindoro inono arera.”
24 Arie God, nine gitofu sosighi usesa ainda totorugari tomanakogo erera evia,
natofo isambu eregosera.
Arie God, ni giti jijighururaso, natofo ninda amboda ya,
ninda vasa kakarago jokáda teterero eregosera.
25 Yaru divari kakato giti etero, gita† Afige, geka eni gita o uka dae gefusera, tuturo 33:2 duruda tege, garesa! dari kakato ambo gaetero,
a kotugo ade jamena ghasaghasa eredorera aimi, soroda fetedo refera.
26 Arie, Jacob da veka beká Israel embo nemokena resena, eminda totoruge ireva, Bajari
God dae sakai saovo dae resena.
27 Oro veveyako Benjamin ondi giti
Judah ondi nenda giti jigharide
nenda oro oro ava ambo gayoro,
Sebulun ondi nenda giti jigharide fitoro
a kotugo Naphtali ondi nenda giti jigharide ambo gaedo refera.
28-29 Arie Bajari, kini (king) mane ninda fuyo tige,
kambo Jerusalem bu foa gheraera, eminda namane sorise,
ninda fakina nange ijugusesa, kau daba aminga ava sekago ijugaso gaore!
30 Arie Bajari, Egypt embo ava dombuda sase!
Oro oro mendeni burumakava da kandana nenda mamandi da kaugo use,
gogore eraera barago, dombuda saso, oju edo nenda siliva (silver)
nimokena joba mutore! (Evetu genembo isoro uju eraera ava,
soesa ondi bera beraghe taraghaore!)
31 Egypt embo nenda gavana mane mendeni dirigaoro furarera.
Ethiopia embo nenda ungo jighoro erorurari God kena banungarera.
32-33 Enda da oro oro isasambukena eminge resena, God dae yaru divuvu!
Bajari utu etoda, utu anakora etiri sirorusira da etoda,
anumbedo ya gheraera aikena, yaru didivuse sakai sevu!
Nunda beka teriago utuda barara fugeraira aminga ava ningivu!
34 God nu fakina isambu da tofo ava isuri basuri evu! Nu kini (king) ri.
Nunda usasa Israel embokena futuse, kaifa e tavo eraira.
Utuda mo, nunda fakina tomanakogo isagha erira.
35 God nunda vasa kakarada ghe fururari evetu genembo itatamedo,
ghamo kengheraera. God Israel embo tumonde baingheraera aindae resena.
Nunda natofokena nunda fakina tomanakogo ava futurureari, ne fakina eraera.
Ava sedo, God dae sakai sevu!
*68:16: Saion mo, ututu ijoghako eini bogu begaya Jerusalem jokáda irira. Avata, David da Yaru buku mave gefusera, kotugo feroveta mane mendeni bogu begaya Jerusalem dae sise, “Saion” gefuseri. Kau daba aminga ava, sifo mendeni, God da Tafaroro Kambo kakara use, “Saion” gefuseri.
†68:25: Afige, geka eni gita o uka dae gefusera, tuturo 33:2 duruda tege, garesa!