46
Namondeda Sorega Mutari Kato God Numori.
1 God nu namondeda tere jungari vasa fakaragori a fakina ava, nune edo irira.
Nu namonde dabade irise, sifo evia inono, namonde sonembari dae kato eraira.
Dara rea sirorarira amo, nu anakora sumbudo namonde sonembarira.
2 Ava sedo, namonde jo oju ae arera.
Enda daradaragharira,
o doriri gigisedo ya eva jokáda tifugharira,
3 o eva teria eredo, duka didivuse, sumbu viti founada beje foró arira,
o reighi jajovurari aimi, doriri daradaragharira, avata namonde aindae jo oju ae arera.
4 God da reighi aminda, uvu eni eresufira.
Aimi, God Iká Bekáda irira ainda kambo kakara kena dubo jama muturaira.
5 God reighi aminda irá gheraira ava sedo, jo nanjigo aminda daoro bejae arira.
Nu sifo ataeghae eredo, reighi ava sonembarira.
6 Natofo endada irera, oju teria beká use, ungo ata dadaragayeraera.
Frovensi a reighi isambu nenda gavanaghae dabade, ere fetedo ungo ata dadaragayeraera.
God nunda bekaimi barara fugeari, enda munjeraira.
7 Bajari Fakina Kato namondeda jokáda irira,
Jacob da God mo, nu namondeda tere jungari vasa fakaragori.
8 Fuvu, Bajari rea etiri sirorusira ava, fuge gaove!
Nu nange nunda fakina ijuguse, enda da reighi mendeni dorusira, ava kote givu!
9 Evetu genembo endada isoro use irera ava, nune gajedo seari doyeraera.
Nu nenda feva ava jighi joredo, nenda goroba fafaki ava fati jore fugedo, nenda bere ava dungeari aviraira.
10 Aminguse, nu eminge seraira, “Tataya dovu! Durumuguse, sunghe fete evia kasama evu:
Nasuka namoá, na God! Enda jokáda a enda da natofo jokáda, jo eni namongo iraeri.
Na teria bekári. Na giti jighari edo irena.
Ava natofo kasama edo nandae sakai sarera”.
11 Bajari Fakina Kato namondeda jokáda irira,
Jacob da God mo, nu namondeda tere jungari vasa fakaragori.