3
Yesu jer Moses pel pel
1 Nnaabitiib bi bi chain, aan Uwumbɔr yin bi na, ni li dakl lik Yesu aabɔr. Ti dii u ki len binib aanimbil ni ke ti dii u la. Uwumbɔr nan tun ni u, ke u nan li ye utotoorninkpel. 2 U tun lituln mbamɔm tii Uwumbɔr u tii u lituln ngbaan na. Moses mu nan tun Uwumbɔr aatuln mbamɔm Uwumbɔr aamaal aanib aakaasisik ni. 3 Unii u ye mmaal aayaaja na le kani nnyuŋ ki jer mmaal aanii ubaa. Kina le Uwumbɔr len ke Yesu ŋeer nnyuŋ ki jer Moses. 4 Mmaal mɔmɔk kpa yaaja la. Uwumbɔr le nan naan binib mɔmɔk. 5 Ni ye mbamɔn, Moses nan tun Uwumbɔr aatuln mbamɔm, Uwumbɔr aamaal aanib aakaasisik ni. U nan ye Uwumbɔr aatutunn, ki tuk binib Uwumbɔr aah nan ban ke u tuk bi pu na. 6 Kristo ma kan, u ye Uwumbɔr Aajapɔɔn, le ki joo Uwumbɔr aamaal mbamɔm. Timi le ye waamaal ni aanib. Ti yaa kpa lipobil ni mpopiin ki ti saa ndoon kan, ki yaa kaa joo beeni kan, ti ye waamaal yaab la.
Uwumbɔr aanib aafuur
7 Uwumbɔr Aafuur Nyaan nan bui Israel yaab ke,
“Ni yaa ŋun Uwumbɔr aaneel din wee kan,
8 ni taa cha nitafal li pɔɔ
ke niyaajatiib aatafal aah nan pɔɔ pu
buyoonn bi nan yii waamɔb nteersakpiin ni na.
9 Bi nan tɔŋ u ki lik, nteersakpiin ni.
Hali bi nan kan waah tun
lijinjiir aatun pu na ŋibin imonko ilee,
le ki tɔŋ u nima chee.
10 Nima pu le u nan gee liŋuul bi pu,
le ki bui ke baalandak yenni n‑yoonn mɔmɔk la,
baa bee waasan.
11 Nima pu na, u nan gee liŋuul, ki puu tipuukpaan
ke baan koo kitiŋ ki ponn ni u ba ga tii bi lifuur na.”* : Lik Ilahn 95.7-11.
12 Nnaabitiib, ni li nyi man, ni ponn ni ubaa aasui taa li bir aan u li joo beeni ki yii Uwumbɔr u ye limɔfadaan na. 13 Ni li pɔɔk tɔb aataakpab iwiin mɔmɔk, nsan aah laa bi pu buyoonn na, titunwanbir taa ŋmann unii ubaa aan utafal li pɔɔ. 14 Ti yaa beenin tii u naadii ke taah nan tii u naadii njan pu na ki ti saa ndoon kan, ti ga ji waamɔɔn.
15 Uwumbɔr Aagbaŋ len ke,
“Ni yaa ŋun Uwumbɔr aaneel din wee kan,
ni taa cha nitafal li pɔɔ
ke niyaajatiib aatafal aah nan pɔɔ pu
buyoonn bi nan yii waamɔb nteersakpiin ni na.”† : Lik Ilahn 95.7-8.
16 Ŋma ŋun Uwumbɔr aaneel ki yii waamɔb? Naa ye binib bimɔk Moses nan nyan bi Ijipt aatiŋ ni na aa? 17 Uwumbɔr nan gee liŋuul ŋma pu ŋibin imonko ilee? Naa ye binib bi nan tun titunwanbir ki kpo kipɔɔk ni na aa? 18 U nan puu tipuukpaan ke ŋma aan koo kitiŋ ki ponn ni u ba ga tii bi lifuur na? Naa ye binib bi nan yii waamɔb na aa? 19 Nima le ti bee ke baah kaa nan gaa u ki kii na, nima le baa nan ŋmaa kan lifuur ngbaan u chee.