1-3 Yipm ka ntinkirai apulp sank Wulapm Weinkel ka nak apulp wankepm kana ninkem ant moule ka sopilel. Aser ant numpul apulp yipm, ka yipm ninkem wankepm nkamp yakop apulp nia Jisasel. Ant nak na wankepm irpm epeel oko yupul yapmunemp aiyipmel na yer mitimitink, mi rokn. I kapepe ant kitip sank a likekn apulp na antwuye Silvanus nti Pol oko yer Atens, pe ant wankes Timoti mpi amiser yipm. Timoti kil ka mamuntomp Kristenel antilel, pe kil ka moule nioknel Wulapm Weinkel ka nak apulp sank sepmel Kraiselel. Antwuye wankesil mpi apulp na kil yet yipm pmomp na mintenkitneip yapmunemp aiyipmel na yer mintenk yintemp Wulapm Weinkel. 4 Ampueik ant antemp yipm arel, ant ka nakimp yipm na wankepm mitinkel irpm arai ninkem ant Kristen. Eti ka yipm aser amorel, mpuampua kuretel epe ka niminink. 5 Apm ka wunempwaiyimp na Satan ko waker yipm yapmunemp ninkaiel kuap yipm, waker yipm yapmunemp mintenkel tikikn. Kona ntakilelel, niokn antilel kapuko nkupmus kitapm. Eti apm arokn na nkuainkuai yikei yer warpmel, apm wankes Timoti mpi aser yipm, apulp nako apm somp ntinkirai yupulp yipm, ka yipm ar nkis niumumpuel, mi rokn? Yapmunemp yipm ka ar mintenk apulp Krais, mi rokn?

6 Aser Timoti ampu nanketel i kil sukueimp ant ampulp yipm, yapmunemp aiyipmel ka ar mintenk apulp Wulapm Weink, pe nti moule wanto ka yipm akei ntaniupuknel nkrawomp nti akei aripel. Pe kil nakimp ant na aninkanink yipm ka akei yapmunemp niumuaipmel wunempwaiyimp ant, pe yipm ka mpuaimpuai apulp ant, eti puikn aiyipmel ka apulp na ser antel ka suknelip, ka soplikekn nuarep ka ant apulp na ant apulp na ser yipmel. Ant eipm ntakilelel, yapmunemp antilel ka mpuaimpuai yatip apulp yipmel, 7 pe yipm ka akei Krais nkael. Eti sank keielel ka mintenkitneip ant na yet mintenk yirkos wankepm irpm ka ant ninkemel. 8 Ant eipm na yipm ka ar nkis niumumpuelim i pie apul yapmunemp ant mpililim. 9 Ant ka nak naremp Wulapm Weink apulp yipm yatip. Ant kona yet niampepm Wulapm Weinkel yintemp mpuaimpuai suknel yupulp yipm.

10-11 Nomp awun ant aiyimp Wulapm Weink mintenk apulp nako kil krak yayapel nako ant'a mpi ser yipmel, pe yapmunemp mpurel ka yipm antemwunempel, arai ant ampu nikimp yipm yiki yapmunemp nako yapmunemp aiyipmel korokn wankel. 12 Ant aiyimp Sepmel antilel apulp na yapmunemp aiyipmel kana serp sukn nako yipm yikei nta niupuknel nkrawomp yipm aiyipm yintempel nti moule wantoel. I kapepe yipm arai yupul soplikekn nuarep yapmunemp antilel apulp yipmel. 13 Ant aiyimp Sepmel Antilel nako kil mintenkitneip yipm yapmunemp nako yipm yer ntinkirai yer niampepm Wulapm Weinkel, ka Waiek antilelel. Kona Sepmel antilel Jisas ampu na yo yintemp nti moule ntinkiraiel akeiwanto ka ankilelel, yipm'o yer yatewel nako Waiek antilel Wulapm Weink serel.