Epesus
Horok Lirna La'an
Paulus hi'i horok eniyeni lere an minle bui raram ono ainina honowok nodi Lira Wawa'an eni loikaru ri (3:1, 13; 4:1). Lolo kota Epesus, ri nammori ka ramwali ri Yahudi (2:11, 12). Lere Paulus aku horok eni, lo'o nin panaeku manin Epesus lesala nanumene aku laa kota-kota namehin ma aile na'uranrani Epesus.
Lolo horok eni, Paulus konohi nahenia ik kokala rere'e haharu nammori ono ‘Makromod Lalap du'ul kaliyedi ik koro Kristus me'e’ (1:3). Paulus konohi ika Makromod Lalap Nin panaeku heheni: Ha na'akeme, ma aile a'am raram noro idewe ma aile noho wawan, An hi'i lolo yawa Kristus, la Kristus namwali ha onne na'akeme ‘uluwakun’ (1:10).
Lolo horok eni, Paulus nala wanakunu naho'ok ida woro'o. Yesus naho'ok naise uluwakun, la Nin man lernohi enihe naho'ok naise Yesus kemen (1:10, 22-23; 4:4, 15-16; 5:23-32). Yesus naho'ok naise nakar nin kunuku polle, la Nin ri na'akeme naho'ok naise nakar horn arn (2:20-21). Roh Kudus naho'ok naisa tanada lolo ik akin ma na'ono nawinauwedi Makromod Lalap Nin nou maika naisa ri man hi'i horok ida na'ono nawinawedi nin horok onne nanumene ri man kokale nauroin kokkoo inhoi man aku horok onne. Onne namnenehe Roh Kudus lolo ik akin, ono Ai namwali tanada nahenia ik kamwali Makromod Lalap Nin ri (1:13; 4:30). Enla man lernohi Yesus naho'ok naisa ke'urauk ma nodi ilak rae leke rakpali hayakyak (6:10-18).
Horok Ihin
1. Paulus nala wanakunu man hari horok (1:1-2).
2. Paulus konohi Makromod Lalap Nin panaeku maika (1:3-3:21).
a. Ai nala rere'e haharu nammori maika ono du'ul kaliyedi koro Kristus me'e (1:3-23).
b. Ai nala morimori worworu ma'ika, la hi'i ri Yahudi roro ri namehin na'akeme ramwali mahaku (2:1-3:13).
c. Paulus hi'i lir napanak leke ik kauroin nahenia Kristus naramyak ika rehi (3:14-21).
3. Paulus wakunu hini'i wenewhe man wa'an ik Kristen enihe lernohi (4:1-6:9).
a. Ik ida man minwuku wawa'an noro ida, la ida ma na'alapa ida akin (4:1-16).
b. Ik renedi iknik hini'i man ailanna la hi'i ha man wa'an (4:17-5:21).
c. Paulus nala nounaku namehin (5:22-6:9).
4. Naho'ok ri Kristen naisa ke'urauk ma nodi ilak rae (6:10-20).
5. Paulus nala wanakunu man horu (6:21-24).
1
Paulus nala nina hiyene arore manin Epesus
1 I walin ma namwali Makromod Lalap Nin ri mememen lolo Epesus na'ahoruwedi, mi mamkene akin naili'il Yesus Kristus mamani ono more mamwali mahaku.
Ya'u eni, Paulus, man Makromod Lalap raram nodi kikan amwali Yesus Kristus Nin hophopon ma nodi Lirna Wawa'an eni. 2 Ya apanak iknik Ame--Makromod Lalap noro Makromod Yesus Kristus rala rere'e haharu la hi'i mi mori moiliwi mahuwele.
Makromod Lalap nala rere'e haharu nammori maika ono du'ul kaliyedi ik koro Yesus me'e
3 Ka'uli kasa'a Makromod Lalap, Yesus Kristus Aman, ono An du'ul kaliyedi ika koro Kristus me'e, de Ai nodi rere'e haharu man wa'an na'akeme ma aile a'am raram leke namre'e namharu ika. 4 Makromod Lalap ka nakuku noho la ka naleu a'am makun, An niliyedi ika leke du'ul kaliyedi koro Kristus leke kamwali Nina ri ma akin moumou dewdewe la ma na'alehe salida lolo Makromod Lalap leken kalarna. 5 Nano nonolu wake'eni Ai naramyak ika, de raram nodi hi'i kenekrohu nahenia An hi'i ik kamwali Ai ananhe mememen lolo Yesus Kristus Nin hini'i, la Nin kenekrohu onne nahuwa'an Ai akin wake'e. 6 Ende ka'uli kasa'a Makromod Lalap ono Ai nala Nin rere'e haharu man ma'aruru wake'eni ma'ika. Ai nala rere'e haharu onne maika lolo Kristus man Ai naramyaka rehi onne, la ka napanak wanalhan ida. 7 Kristus rarna huri we'eredi ika nano dohohala nin molollo, la na'ohu nahaledi iknik dohohala na'akeme. Ende namlolo kokkoo ik kamwali ri ma nahuriyedi me'e. Lolo kalla eniyeni Makromod Lalap kukuledi Nin rere'e haharu man ma'aruru wake'eni, 8 man Ai naledi penpenu kemkeme ma'ika. An hi'i onne ono Ainin woroin narehi nalewen, la Ai nauroin hi'i inhawa man wa'an leke paku ma'ika. 9 Enla nonolu eni, Nin panaeku onne ri ka nauroin makun, maa lere eniyeni Ai raram nodi nalhari Nin panaeku onne maika lolo Kristus me'e. 10 Ende rakan lere alam Makromod Lalap mehe niliyedi, An hi'i ha wo'ira na'akeme man aile a'am raram noro idewe man aile noho wawan lolo yawa Kristus, leke Ai namwali uluwakun ha onnenihe na'akeme.
11 Makromod Lalap hi'i ha wo'ira na'akeme namwali lernohi Nin raram nodi noro Nin honorok aki aimehi. Nano nonolu wake'eni An hi'iyedi kenekrohu nili ik kamwali Nin ri man du'ul kaliyedi noro Kristus me'e. 12 An nili mayai ma namwali ri Yahudi man dedesne namkene pu'ik heli Kristus mehe, la kikanedi mayai leke nakoko ri namehin ra'uli rasa'a Makromod Lalap man kulu narehi la man lap narehi. 13 Lere mim derne Lira ma namloleni, mi akim naili'iledi Lira Wawa'an onne haenhi, la Makromod huriyedi mi nano minim dohohala nin molollo. Mi moro Kristus madinu'ul makinaliyedi me'e, de Makromod Lalap nala Roh Kudus man Ai nouwedi nonolu eni ki mi leke namwali tanada ma na'ono nawinauwedi Nin nou onne la kukul nahenia mi mamwali Makromod Lalap Nin ri. 14 Makromod Lalap nala Roh Kudus eni leke na'akerhe Nin nou noro ika, leke ik kauroin mouropo nahenia lere man mai Ai nala ha wo'ira na'akeme man An nouwedi maika. Rakan lere onne An huri we'er ika nano noho wawan man ailanneni, la kikan ika laa a'am raram ono ik kamwali Nin ri. Ende mai ka'uli kasa'a Makromod Lalap man kulu narehi la man lap narehi eni.
Paulus hi'i lir napanak leke man lese horok eniyeni kokala woroin ma nano wawan
15 I wal'u na'ahoruwedi! Nano lere ya'u derne nahenia mi akim namkene naili'il Makromod Yesus, la ya'u derne mi mararamyaka Makromod Lalap Nin ri na'akeme, 16 ka'u ren apanak trimkasi minim hini'i onne, la akilere lolo ainu'u lir napanak ya'u wekel mi mamani. 17 Ya apanak ik Makromod Yesus Kristus Nin Makromod Lalap, ik Amad man Oin Naran kukulu lalap, nodi Roh Kudus Nin molollo hari mi honorok akin leke mi mauroin Makromod Lalap namlolo kokkoo. 18 Ya apanak An hari minim honorok panaeku leke mi mauroin ha wo'ira na'akeme man Ai na'akenedi nala ki mi man Ai napoluwedi me'eni. Enla ya apanak mi mauroin Nin rere'e haharu man penpenu kemkeme man Ai nala Nin ri na'akeme. 19 Enla ya apanak leke mi ma akin naili'il Ai mauroin Nin ke'eke'el an'anha ma narehi ma nalewen lolo minim morimori. Ke'eke'el an'anha onne penia namwali Nin molollo man lapa wake'e, 20 man Ai nodi na'amori Kristus wali'ur nano Nin makmaki, la hi'i naikoro lolo Ai herne malanna lolo a'am raram.
21 Ende Kristus nodi molollo man kulu narehi ma nodi molollo lolo a'am noro idewe noho wawan na'akeme. Enla Ai Naran lap narehi ri ma nodi molollo na'akeme. Ai nodi molollo onne lelere a'alam ku eniyeni rakan laa ewi-ewi. 22 Enla Makromod Lalap hi'i Kristus nodi molollo ha wo'ira na'akeme, la kikan Ai namwali uluwakun kerei raramne, 23 la kerei raramne namwali Ai kemen. Ainin morimori, Nin woroin, noro Nin molollo na'akeme howok lolo maika ma namwali Ai kemen eni, la Ai nodi molollo ha wo'ira na'akeme haenhi.