1 Tesalonika
Horok Lirna La'an
Nonolu eni kota Tesalonika namwali kota ma na'ono lolo propinsi Makedonia. Ma nasala molollo propinsi eni min kota onne. Kota ne'en raram na'akeme lo'o riwan rahu woro'o. Manin lolo onne heruwali ri Yahudi, maa ornoho orrai ma ka namwali Yahudi namansa rehi hi. Ornoho orrai onnenihe hoikani aukerhe noro noho makromon ma ka namlolenihe. Paulus, Timotius noro Silas rodi Yesus Lirna Wawa'an eni loikaru hi, penia heruwali akin naili'il Makromod Yesus (HN. 17:1-4). Maa ka nalo'ol, Paulus noro nin kalla wali enihe lari nano Tesalonika ono ri ma akin ka naili'il Yesus hi'i sus hi (HN. 17:5-10). Lere li'ur, Paulus horhorok walin manin Tesalonika, maa leken kaale de kan laa enne. Ende hopon Timotius laa ka'arale, leke nauroin hi ramkene akin naili'il Yesus, ee ka (1Tes. 3:1-2). Timotius laa Tesalonika wali maiyedi mene Paulus hi'i horok eniyeni.
Paulus nin panaeku ida woro'o aile hi'i horok eniyeni. Ai na'ori honorok manin Tesalonika rir hini'i wenewhe lere min wewerre noro hi (2:1-2). Ai na'alap ri man lernala wewerek pananaka akinhe leke ramkene lernohi Yesus (3:3-5), la wakuku hi hini'i wenewhe man wa'an ri man lernohi Yesus hi'ie (4:1-10). An nounaku hi yon raprehen howok (4:11-12). Enla an konohi inhawa lo'o namwali ri man lernohi Yesus lere An wali wali'ur mai noho wawan (4:13-17). Lolo horok enie, aki panakan wekel Makromod Yesus Nin maimai onne haenhi (1:9-10; 2:19-20; 3:13; 4:13-17; 5:1-2, 23-24).
Horok Ihin
1. Paulus nala wanakunu man hari horok eni (1:1).
2. Paulus napanak trimkasi Makromod Lalap, la na'uli manin Tesalonika rira hini'i (1:2-3:13).
3. Paulus nala nounaku ma akin naili'il Yesus leke rauroin honoli wenewhe man wa'an (4:1-12).
4. Paulus wakuku hi inhawa ma namwali lere Makromod Yesus mai wali'ur leke ramkene lernohi Yesus (4:13-5:11).
5. Paulus nounaku hi leke ida man mori wawa'an noro ida (5:12-24).
6. Wanakunu man horu noro tape masi (5:25-28).
1
1 Horok eni nano ai ri wokelu, Paulus,* Paulus namwali man hi'i horok eniyeni, maa wokeluhe lawuku honorok aki loile lolo horok eniyeni. Silas,† ee Silvanus noro Timotius.
Am aku horok eniyeni laa kota Tesalonika nin kerei raramne ma na'uli la ma nasa'a ik Amad Makromod Lalap, noro ik Makromod Yesus Kristus. Ai mapanak na'amoli Makromod Lalap nala Nin rere'e haharu noro wawa'an rara'e ki mi.
Paulus napanak trimkasi Makromod Lalap ono Tesalonika rira morimori man wa'an
2 Ai walin na'ahoru, ai mapanak trimkasi Makromod Lalap mamani ono mi akim naili'il Ai wawa'an. Akilere am wekel mi naram lolo ainim lir napanak. 3 Ai kam hamlinu wekel hi'ihewi ai walinhe howok wawa'an ono mi akim naili'il Yesus, la am horokala hi'ihewi mim paku ri namehin ono mi maramyaka hi, la hi'ihehewi mi mamkene kerhu kenerne danalhanne ono mamkene lapan Makromod Yesus Kristus wali mai noho wawan wali'ur.
4 Ai mauroin Makromod Lalap naramyaka la niliyedi mi mamwali Nina ri me'e. 5 Ai mauroin An niliyedi mi ono lere am loikaru Yesus Lirna Wawa'an eni ki mi, ai ka modi wanakunu lirna ma nadedem mehe, maa Roh Kudus nodi molollo mayai penia mi akim naili'iledi kokkoo Lira Wawa'an onne. Enla ai walinhe mehe derne ainima wanakunu noro po'on ainim morimori lere ai moro mi min wewerre leke paku mi.
6 Lere ai walinhe kokala Lirna Wawa'an eniyeni, mim mori teunohi ainim morimori noro ik Makromod Yesus Nina morimori. Kade rin hi'i sus mi, maa mi akim nahuwa'an lernohi Lira Wawa'an onne ono Roh Kudus nahuwa'anedi mi akim. 7 Enpenia man lernohi Yesus lolo propinsi Makedonia noro Akhaya na'akeme derne rauroinedi hi'ihewi mi mamkene akin naili'il Yesus, de hi raram nodi teunohi mi haenhi. 8-9 Nano mi penia Makromod Lalap Lirna Wawan eni raderre radauledi lolo Makedonia, Akhaya, noro noho-noho namehin man ko'u nano mi. Ende am laa oukida, manin lolo onne kukunohi mayai hi'ihewi mim kokaledi mayai la mi akim naili'iledi Makromod Lalap. Ai kam wakunu haida makun, hir konohi mayai hi'ihehewi ai walinhe sopoledi mormori ma nawauwaur noho momohon, la ma'uli masa'a Makromod Lalap ma namlolo la man mori mamani eni. 10 Hir konohi ri hi'ihehewi mim newek Yesus, Makromod Lalap Anan, wali mai nano a'am raram haenhi. Ai onne, Makromod Lalap na'amoriyedi wali'ur nano Nina makimaki, la Ai onne penia man huri we'er ika nano Makromod Lalap Nina ahane man werek lere alam An hukum ri na'akeme.