1 Korintus
Horok Lirna La'an
Nonolu kota Korintus namwali kote man lap lolo noho Akhaya. Lere manin Korintus ka rauroin Makromod Lalap makun, hir hoikani la ra'uli rasa'a noho makromon nammori la radedem rir hini'i wenewhe ailanna wake'e. Paulus eni ri dedesne man loikaru Lira Wawa'an laa ri Korintus, la nano Paulus nin wanakunu ri Korintus nammori akinhe naili'il Makromod Yesus (HN. 18:1-11). Paulus namharedi Korintus mene ri ida naran Apolos mai (HN. 18:24-19:1). Apolos eniyeni nauroin wakuku la wakunu warei. An min lolo onne leke wakuku manin Korintus enihe (1Kor. 3:6).
Nakawedi wollo wo'ira, ri Kristen man minle Korintus rir na'ukankani aile de hir hi'i horok aku laa Paulus. Ende Paulus walha rir na'ukankani lolo horok eniyeni. Paulus dernedi nahenia hirira hini'i wenewhe nammori ka namlolo haenhi, de an nounaku hi yon hi'i ha man ailanna onne maa hi'i ha ma namlolo wali'ur. An kuku sala hi ono hi ka ramwali mahaku me'e, ono heruwali ra'aheni hir lernohi Apolos, heruwali ra'aheni lernohi ri namehin, la heruwali ra'aheni lernohi ai, penia ida ma ka namkene noro ida me'e (1:10-12; 3:1-6). An nounaku hi panaeku ma na'ono noro ri man ho (pnk. 7), noro panaeku namehin nammori haenhi.
Panaeku ma na'ono lolo Paulus nin nounaku enie: An wakuku hi leke hi rauroin hini'i wenewhe man wa'an la rauroin hi'ihehewi ri ma akin naili'il Makromod Lalap, ida man mori wawa'an noro ida.
Horok Ihin
1. Paulus nala hiyene arore la hi'i lir napanak trimkasi (1:1-9).
2. Paulus kuku sala manin Korintus ono hirira hini'i wenewhe ailanna wake'e, la ida kan mori wawa'an noro ida (1:10-6:20).
3. An wakunu panaeku ma na'ono ri man ho (pnk. 7).
4. An wakunu panaeku ma na'ono hanana'an rodi hoikani noho makromon me lernulu aukerhe (8:1-11:1).
5. Ai nala nounaku ma na'ono noho honolla man wa'an lolo kerei raramne (11:2-16).
6. An wakunu panaeku ma na'ono ra'an romun leke na'ori honorok hi Makromod Yesus Nin makmaki (11:17-34).
7. An wakunu hi'ihehewi Roh Kudus nala woroin ma na'ono ri ma akin naili'il Yesus (pnk. 12-14).
8. An wakunu hi'ihehewi ri Kristen man maki mori wali'ur lere man mai (pnk. 15).
9. An loikaru nin panaeku hir puli kupan leke aku laa ri ma na'alehe haida-haida lolo noho Yudea (16:1-4).
10. Ai nala napanpanak man horu noro tape masi man horu (16:5-24).
1
Paulus nala nin hiyene arore laa manin Korintus
1-3 Konohiyala i walin ma aile kota Korintus na'ahoruwedi! Ya'u eni Paulus, la yo oro ik walin Sostenes aku horok eni ki mi ma namwali Makromod Lalap Nin kerei raramne. Ai napoluwedi mi mamwali Nina ri mememen man moumou dewdewe ono moro Makromod Yesus Kristus mamwali mahaku, noro wewerre ri lolo ewi-ewi ma na'uli nasa'a ik Makromod Yesus Kristus. Ai penia namwali ik na'ahoru Makromod.
Ainu'u molollo aile hi'i horok eni ono Makromod Lalap mehen kikan maya'u amwali hophopon ma nodi Yesus Kristus Lirna Wawa'an eni lernohi Ai honorok akin mehe.
Ya apanak Makromod Lalap, iknik Ame, noro Makromod Yesus Kristus rala rere'e haharu noro wawa'an rara'e ki mi.
Makromod Lalap nala rere'e haharu maika lolo Yesus Kristus
4 I wal'u na'ahoruwedi, ya apanak trimkasi Makromod Lalap mamani ono Ai naledi Nina rere'e haharu ki mi lolo Yesus Kristus me'e. 5 Lolo minim morimori Ai naledi mi ha wo'ira na'akeme leke mim lernala woroin man wa'an la mauroin loikaru mouropo Makromod Lirna Wawan eni, ono mi moro Yesus Kristus mamwaliyedi mahaku me'e. 6 Onne penia ri nauroin mouropo nahenia mi akim namkene naili'il kokkoo Kristus Lirna Wawa'an man am loikaruwedi ki mi me'eni. 7 Ende Makromod Yesus Kristus naledi rere'e haharu penpenu kemkeme ki mi me'e de mim kokaledi woroin kukuku noknokor leke howok Nin honowok wawa'an lelere a'alam mi maham weilapan An wali mai noho wawan wali'ur. 8 Onne kan mehe, maa Makromod Lalap mehe na'aruri mi akim hehen nanumene lere alam man horu, leke rakan lere Makromod Yesus Kristus wali mai wali'ur minim morimori na'alehe yaksala ida. 9 Yon hamlinu nahenia Ai namkene hi'i Nina nou noro maika namwali, la Makromod Lalap napoluwedi mi leke moro Anan, ik Makromod Yesus Kristus, mamwali mahaku.
Kerei raramne rira honorok aki ka namnehe
10 I wal'u na'ahoruwedi! Yo odi ik Makromod Yesus Kristus Oin Naran apanak an'anhedi mi mamwali mahaku. Yono mi ida ma nasesi noro ida, de mi ida man reiha'ar ida, maa ya apanak mi na'ahoru na'amolia honorok mahaku aki mahaku. 11 I wal'uhe, ya'u wakunu heheni ono Kloe nina nakar raram heruwali mai konohiyedi ya'u minim sesi me'e. 12 Hi ra'aheni minim ri heruwali ra'aheni, “Am lernohi Paulus,” heruwali ra'aheni, “Am lernohi Apolos,” heruwali ra'aheni, “Am lernohi Petrus,” la heruwali ra'aheni, “Am lernohi Kristus.”
13 Mi moro Kristus mamwali mahaku, de kan wa'an mahina'ar mamwali muku-muku! Inhoi man wairesnedi lolo au kekiyowok eni? Ya'u? Ka! Enla man ulutada mi lolo oire, kar wekel ya'u naran! 14 Ya apanak trimkasi nammori ono ka'u ulutade ri nammori lolo oir. Ya'u ulutada Krispus noro Gayus mehe. 15 Hawa'ande nano mi ri kaale ma na'aheni, “Paulus mehen ulutada maya'u, de ya'u lernohi ai.” 16 (Eih! Eni nanumene ya'u horokala ya'u ulutadedi Stepanus noro nin nakar raram haenhi. Ka'u ulutada ri namehin.) 17 Kristus kan hopon ya'u laa ulutada ri, maa An hopon laa loikaru Lira Wawa'an eni lolo ewi-ewi. Enla lere ya'u loikaru Yesus Lirna Wawa'an eni, ka odi ri mormori nin woroin wakunu leke ri akin naili'il, maa ya'u wakunu mehe Lira ma na'ono Kristus Nin makmaki lolo au kekiyowok eni leke ri man derne ainu'u wanakunu akin naili'il Ai, ono hi rauroin Yesus Nin makimaki nodi molollo wake'e.
Makromod Lalap kukul Nina molollo noro woroin lolo Yesus Kristus man maki lolo au kekiyowok eni
18 I wal'u na'ahoru, am loikaru Lira ma na'ono Yesus Nin makmaki lolo au kekiyowok. Lere ri man lolo kalla yakan derne Lir onne, hi ra'aheni, “Lira onne na'alehe panaeku ida.” Maa, lere maika man Makromod Lalap huri we'eredi nano dohohala nin molollo enihe derne Lir Wawa'an onne, ik ka'aheni, “Lira onneni penia Makromod Lalap Nin molollo.” 19 Lolo Horok Lape raram Makromod Lalap na'aheni,
“Ri ma na'aheni, ‘Ainu'u woroin lewlewen,’ na'amoli Ya a'amoluwedi rir woroin onne. Enla ri ma na'aheni, ‘Ainu'u panaeku man kukulu lalap,’ na'amoli Ya'u hi'i rira panaeku rahu eni kan min haida.” * Yes. 29:14
20 Ende ri ma nin woroin narehi nalewen, noro meser ma nauroin wakuku agame nina holoor halauk, noro ri ma nauroin rawalha lira wawa'an enihe, Makromod Lalap hi'iyedi rir woroin na'akeme kan min haida wake'e, ono rir woroin onne mai nano noho wawan eni mehe. 21 Kade ri mormori rauroin wake'e, maa onne kan paku hi rauroin Makromod Lalap. Onne namlolo ono Makromod Lalap hi'iyedi kenekrohu nahenia An huri we'eredi ri ma akin naili'il Ai nano dohohala nin molollo lolo Lir Wawa'an man am loloi kakaru eni. Enimaa lere ri man lernohi rir woroin aimehi derne Lir onne, hi ra'aheni Lir onne na'alehe panaeku ida, de ka nala or'ori dardari ri mahaku. 22 Ri Yahudi rapanak po'on tanada man ri kan dodo'onnala makun nanumene akinhe naili'il Lira onne. Enla ri Yunani enihe rapanak orworoin nala wanakuku man lewlewen hi nanumene akinhe naili'il Lira onne. 23 Enimaa ik wakunu Kristus Nin makmaki lolo au kekiyowok mehe. Wanakunu onne namwali au heliyowok lolo Yahudi enihe honorokne, la ma ka namwali Yahudi enihe ra'aheni Lir onne na'alehe panaeku ida. 24 Kade nano hi ri nammori kar kokale, maa Makromod Lalap poluwedi ri Yahudi noro ri Yunani heruwali ramwali Nin ri mememen me'e. Hir dernedi ainim Lir ma na'ono Kristus eni la akin naili'iledi Ai me'e, de hi rauroin mouropo Makromod Lalap Nin molollo noro Nin woroin. 25 Ri aile ma na'aheni Lira am loloi kakaru eni na'alehe panaeku ida, maa Makromod Lalap Nin panaeku eni namwali panaeku man wa'an narehi ri mormori rir panaeku na'akeme. Ri heruwali ra'aheni Makromod Lalap Nin hini'i lolo Yesus Nin makmaki onne na'alehe molollo ida, maa hini'i onne nin molollo narehi nalewen ri mormori nin molollo na'akeme.
26 I wal'u na'ahoru, horokala minim morimori lere Makromod Lalap napolu mi mamwali Nin ri. Nano mi, ri ida woro'o mehe ramwali orworoin, ida woro'o mehe ramwali ma nodi molollo, ida woro'o mehe ramwali marna, 27 maa Makromod Lalap nili ri mormori man noho wawan eni po'on rauroin raploedi leke hi'i wawwawa orworoin enihe. Enla An nili ri man lolo yawa leke hi'i wawwawa ma nodi molollo enihe. 28 Makromod Lalap raram nodi nili ri man lolo yawa, noro ri man noho wawan eni po'on mahalarne, la ra'alehe ha ma na'ono ida. An hi'i onne leke ri na'akeme rauroin mouropo nahenia ha na'akeme man ri lolo noho wawan eni ra'uli, kan min haida. 29 Makromod Lalap hi'i heheni leke yono rin holi kukulu lalapa lolo Ai leken kalarna. 30 Ai mehe du'ul kali ik koro Yesus Kristus. Yesus Kristus hi'i ika kauroin Makromod Lalap Nin woroin. Ai peni hi'i ik kamwali ri molololo Makromod Lalap kalarna, Ai na'amou na'adewe ika leke kamwali Nina ri mememen, la huri we'eredi ika nano ha wo'ira na'akeme man ailanna. 31 Ende hi'i naise horhorok man aiyedi Horok Lap raram ma na'aheni, “Yono ma'uli masa'a minim hini'i wenewhe man wa'an, maa ma'uli masa'a Makromod Lalap Nin hini'i lolo minim morimori leke ri namehin ra'uli rasa'a Ai haenhi.” * Yer. 9:24