53
1 E tomota imapwaisi kawasi,
“Ki, availaga bidubumi da kamatulasi?
E availa bivitusi Guyau nanola metoya baisa? 53.1 Yn 12.38; Rm 10.16
2 Ka, baisa Guyau wala nanola paila la touwata
ibodi bikaitubwa makawala kaitala kai eisususina obidapakala.
Matauna gala kala migalela karaiwaga kaina itubuguyau,
e igagabila bitatovilakaisi matauna.
E gala wala avaka bikau ninadaisi metoya baisa matauna,
e mwada bikivili ninadaisi bitalokaiasi.
3 Yakidasi tapakaisi deli takoulovaisi wala matauna.
E matauna ikau kala mwau deli kala mmayuyu.
E gala availa bitagwala bigisi matauna -
tavigakaisi matauna makawala gala wala avaka. 53.3-4 Md 8.17
4 “Mitaga matauna kaimapudasi ikau kala mwau deli kala mmayuyu
makwaisina ibodi yakidasi bitakauwaisi.
E ka, da nanamsasi mwada kala mwau matauna
baisa kala mipuki Yaubada leisaiki.
5 Mitaga gala! Paila wala da mitugagasi matauna ikatubuyavaisi wowola,
e iwaiyasi matauna paila wala da lamadadasi.
E metoya kala mwau mipuki makwaina, matauna bogwa eikau ivigaki kada katumovasi,
e tabanaisi kada bwainasi metoya supalela kala lewa. 53.5 1 Pt 2.24
6 Ka, yakidasi komwaidodasi makawala sipi minasina bogwa eitamwausi,
e taitala taitala iloula ola keda ituwoli ituwoli.
Mitaga ka, Guyau bogwa eivigaki matauna bikau mipuki makwaina,
mipuki makwaina mwada yakidasila ibodi bitakauwaisi. 53.6 1 Pt 2.25
7 “Ikatugisisaisi matauna, mitaga matauna imanum wala,
e matauna gala ilivala avai biga.
Matauna makawala goli natana lam tuta pikekita wala e bikatumataisi,
kaina makawala goli natana sipi eiyosisi e tuta pikekita wala bikapitunaisi unuunula,
e matauna gala ilivala avai biga. 53.7 YG 5.6 53.7-8 VA 8.32-33
8 E iyosisi matauna, e iyakalaisi deli ilauwaisi paila bikaliga,
mitaga gala taitala imwelaki wowola paila baisa.
Paila wala da mitugagasi, ikatumataisi matauna.
9 E isailisi matauna wa laka deli mina mitugaga,
e ibakwaisi matauna deli toliguguwa bidubadu,
ilagoli matauna gala avai tuta ikoulovi avai karaiwaga
kaina avai tuta isasopa.” 53.9 1 Pt 2.22
10 E Guyau eilivala kawala,
“Ka, baisa nanogu makawala paila matauna ibodi biboda mwau;
e la kaliga matauna ivigaki lula, paila mitugaga kala ligaiwa.
E mapaila matauna bogwa wala bigisi tubula;
e la momova bikatududuli bikaduwonaku,
deli metoya baisa matauna, nanogu bogwa bavigimkulovi.
11 E ka, avai tuta kala mwau komwaidona bogwa biwokuva, matauna bimwasawavau tuvaila;
e bogwa binikoli mwada kala mwau makwaisina eikikau gala ikoumakavi wala.
Ulo touwata tatougu matauna saina iyomwasalaigu,
bogwa wala bikabwaili bidubadu
e yeigu bogwa baligaiwa si mitugaga, paila uula matauna.
12 E mapaila yeigu basaiki matauna kabala deli kala taimamila
oluwalaisi tauwau tovakaveka deli tokwaraiwaga.
Matauna itugwali la momova e ikaliga
makawala tomitugaga ibodi bikaligasi.
Matauna ikaimapu bidubadu mina mitugaga
deli inigada kidamwa biligaiwa si mitugaga.” 53.12 Mk 15.27; Lk 22.37