43
Yaubada ikatotila bikoli la tomota
1 Mina Isireli, ka, Guyau matauna eibubulaimi eilivala kawala,
“Gala bukukokolasi - bogwa bakatumovaimi.
Bogwa ladouwaimi metoya oyagami. E yokomi ulo vavagi.
2 Kidamwa bukusalilisi bukulosi otilibwabwau, yeigu deli wala yokomi.
Kami mwau gala gagabila bivakapusiaimi.
Kidamwa bukuloulasi oluwalela kova, gala wala gagabila bigabwaimi.
E kabowakola kwemomwau bimakaiami, mitaga gala wala biyogagaimi.
3 Paila ka, yeigu goli Guyau mi Yaubada.
Yeigu goli mina Isireli mi Yaubada Tobumaboma, e yeigula lakatumovaimi.
Yeigu bakilavi Itipita paila batanekwaimi,
e bakilavi Sudani deli Seba e kaimapusi yokomi.
4 Yeigu bakilavi boda komwaidona paila goli bakoli mi momova,
paila uula yokomi lavigakaimi ulo veiguwa,
deli uula wala ayebwailimi deli lavigaki availa availa bitemmalaimi.
5 Gala bukukokolasi - yeigu deli yokomi.
“E yeigu bakaimalaimi bamaiyaimi omi valu,
metoya omiloutala opilibomatu deli eilolʹo opilikwaibwaga.
6 Yeigu baluki tolesi opiliyavata kidamwa bikilavaimi bukumaisi,
e tolesi opilibolimila kidamwa gala biyusaimi.
Ibodi yokomi ulo tomota bukukwaimilavausi metoya valu omiloutala
ambaisa ambaisa ovalu watanawa.
7 E yokomi ulo tomota tatougu,
e labubulaimi kidamwa bukuyomitulaisi agu yakaula.”
Mina Isireli matausina Yaubada la tosola
8 Yaubada eilivala kawala,
“Kudouwaisi ulo tomota bimaisi okaboyakala.
Matausina isim mitasi, mitaga mina kau wala!
Matausina isim taigasi, mitaga mina tuli wala!
9 Kudouwaisi boda ituwoli ituwoli bimaisi paila yakala.
Amminana si yaubada ibodi bivitububoti paila avaka tuta igau bima ke?
Amminana minasina yaubada bogwa leivitububoti paila avaka avaka eikikaloubusi tuta baisa ke?
Ibodi minasina yaubada bimaiyaisi si tosola
kidamwa bikamokwitaisi avaka minasina bogwa leivagaisi,
e deli bikamokwitaisi si biga minasina yaubada.
10 “Mina Isireli, yokomi ulo tosola.
Lanagaimi yokomi ulo towotetila,
kidamwa yokomi bukunikolaigusi deli bukudubumaigusi,
e kidamwa bukukwatetasi mokwita mwada yeigu goli agumwaleta Yaubada.
Ka, agumwaleta wala Yaubada,
e gala avai yaubada tuvaila isisu ambaisa -
gala avai tuta omitibogwa, deli gala avai tuta omatadasi.
11 “Ka, yeigu goli agumwaleta Guyau,
e yeigu wala agumwaleta ibodaigu bakatumovaimi.
12 Yeigu avitoubobuta paila avaka bikaloubusi,
e oluvi amiakaimi kami pilasi.
Gala avai yaubada namitawasi ivigaki makawala,
e ka, yokomi bukusilasolasi paila avaka lavigakaimi.
13 Ka, yeigu goli Yaubada e yeigu basivagasi Yaubada goli.
Gala availa ibodi bisakaula metoya ogu peula,
deli gala availa ibodi bivigivau avaka yeigu bogwa lavagi.”
Yaubada bikaimilivau la tomota metoya Babiloni
14 Ka, Guyau matauna mina Isireli mi Yaubada Tobumaboma, matauna goli eikolaimi ikaibiga kawala,
“Ka, bakolaimi baisa makawala - bawitali budotala tokwabilia, e bikabiliasi deli mina Babiloni.
Yeigu bakodidaimi kalapisilela valu,
e mina Babiloni si gova paila tomgwaga bidavila bivigaki si valam.
15 Ka, yeigu wala Guyau, yeigu goli mi Yaubada Tobumaboma.
Mina Isireli, yeigu wala labubulaimi e yeigu goli mi Guyau.”
16 Omitibogwa Guyau ivagi kadatala keda oluwalela bolita.q Tuta makwaina mina Isireli eisakaulasi isilavaisi mapilana Itipita e mina Itipita eidoumsi wala; kugisi Sun 14.1-31.
Makadana isuwalai wala bolita deli kala kaisai pilatala piliyuwela.
17 E matauna ilau budotala budoveka tokabilia e matausina isilagisi e
mabudona isim si waga kaibibiu deli si wosa.
Matausina ikapusisi ilosi e gala avai tuta ikaimilavausi,
matausina makawala kova sopi bikimati.
18 Mitaga Guyau eikaibiga kawala,
“Gala bukululuwaisi avaka uvagila omitibogwa
kaina biiluyelu ninami bukuninamsaisi avaka bogwa eikaloubusisi omitibogwa.
19 Mitaga kugigisaisi paila kwaitala kwaivau vavagir Vavagi makwaina mina Yudia bitaneku metoya okasi katupipi bikaimilavausi osi valu tatousi. yeigu bavagi.
Ka! Bogwa ikikaloubusi, e ibodaimi wala bukugisaisi tuta baisa!
Ka! yeigu bateya kadatala keda olopola ovilouwokuva,
e metoya mapilana basakaimi sopi bititayelu.
20 Avai tuta yeigu bavagi waya bititayelu oviloupakala,
paila basaiki kasi sopi ulo tomota matausina bogwa lanagi.
Mauna nabubolodila bitemmalaigusi,
e ugiwagi deli mluveka biyakawolaigusi.
21 E matausina lavigaki paila ulo tomota tatougu,
e matausina goli biwosisi kagu yakaula.”
Mina Isireli si mitugaga
22 E mitaga Guyau ikaibiga kawala,
“Mina Isireli yokomi bogwa kukwamigwesaigusi,
gala wala kutemmalaigusi.
23 Yokomi gala kumiakaigusi mi lula kwegubugabu metoya sipi,
deli gala wala kutemmalaigusi deli mi semakavi.
Ka! Yeigu gala ayomwauwaimi mwada bakominimanaimi paila magigu lula,
kaina ayogugwesi uwomi paila baninigada magigu lula maiina simasimina.
24 Yokomi gala kugimolaisi mi lula maiina simasimina paila yeigu,
kaina kuyomwasalaigusi metoya mi mauna posasi.
Mitaga kaimapula yokomi kuulitumkwaigusi wala metoya omi mitugaga,
e kuyogugwesaisi wowogu metoya sula makwaisina lokuuvagaisi.
25 Mitaga ka, yeigu wala Yaubada e yeigu goli baligaiwa mi sula,
e lauvagi baisa paila uula yeigu goli Guyau.
E yeigu gala wala baluluwai mi mitugaga tuvaila.
26 “Mitaga ka, kumaisi bitalosi tayakalasi, e avaka mi tabinona kumaiyaisi wala.
Kulivalaisi avaka mi biga otutala yakala, kidamwa bikibuboti yokomi okutotusi okamokwita.
27 Ka, matauna tubumi tomaibogwa imitugaga,
e kami tokugwa imitugagasi baisa yeigu,
28 deli kami tokwaraiwaga iyogwalaisi ulo Bwala Kwebumaboma.
Mapaila yeigu atagwala tilaula bikatudidaimisi mapilana Isireli.
E ulo tomota tatougu atagwala bibanaisi kasi kalawou.”