2
Ratha Inthiang ijuochum
1 Pentecost nikhuo aheitung pha, ka-ngamna ngai rakip in khawa munkhat ah inlei-inchun. Levi 23:15-21; Innidan 16:9-11
2 Halli khawakhan jetlei-theileiya thikaraang kangartak karaang rasa ka-ang inkhat lairalak tiangnga inphut ajuo raangnga, inmani in-ongna innkha pumsip aleisipjei. 3 Halli mei ka-ang malei ngaikhan inmani karra akhoithenna inmani diang aleiminmu. Halli khanna kaom mi rakip diang aleikatook. 4 Halli inmani rakip Ratha Inthiang in asip ah, Ratha khan inmani iminril dungjuiya chongleiilak karil inphutjei.
5 Khat-um nuoipilchung ram rakip ah kaheiwa Pathian ka-ngamna kacheet Jihudi mi-ngai Jerusalemma inleiom. 6 Inmani'n hiwa rasa injetpha, mipui katamtak inhei-inchunna inleingak, ajarchu inmani'n inril chongkha inchong inchongnga inrilla inleijet. 7 In-ngakle inruoiya inmani'n inti, “Enru, hiwa mi ngaihi Galilee mi ngaikha emuwabe! 8 Halli angtho-thoa inmani irilhi eini'n niramchongtak ah eini rakip in nijetme? 9 Einichu Parthia, Media, Elam; Mesopotamia, Judea, Cappadocia; Pontus khat-um Asia makheiya, 10 Phrygia Pamphylia, hanna Egypt khat-um Cyrene koolla kaom Libya; Rome makheiya inphut kahong 11 Jihudi khat-um Zaatlop Jihudi heika ethar ngai, Crete, Arabia, inmani ngai rakip in nichongtak ah Pathian jarra ngak kaom kha inril. 12 Inmani rakip in-ngakle inruoiya thodan jetmuwa, inmani inkhatli inkhat in-inti,” “Hiwahi angmejei?”
13 Lekkhat in in-innuipuili inti, “Hiwa mi-ngaihi juran-inrui in-eii!”
Pentecost nikhuoni Peter chongril
14 Peter in tirton soomleikhatle inruoiya angirra, rasa inringnga mipui diang karil aleiphut: “E, Jihudi mi ngai khat-um Jerusalemma kaom mi rakip, hiwahi nangni'n jetru, kachong hi rangairu halli hiwahi angtiname kei'n nangnidiang narilpi kate.” 15 Ajarchu nangni ingaidon angnga inmani ju-inrui emu; ajarchu ziingtiang phadan kuo alachullim. 16 Takkha hiwahi Pathian chongkachoi Joel ileiril kha eii,
17 Pathian in ati, ahekna nikhuoni hiwa ngaihi kei'n kathosik eii:
Kei'n mi rakip chungnga Karatha kajuobunsik eii.
halli nangni sanu sapa ngai'n kachong inrilsuoksik eii;
nangni khangdoong mi ngai'n mangtalar muna inneisik eii,
halli nangni upa ngai'n ramang inramangsik eii. Jo 2:28-32
18 Han kasuoknu khat-um kasuokpa ngai chungnga,
Kei'n khawa nikhuo ngaikhan Karatha kajuobunsik eii,
halli inmani'n kachong inrilsuoksik eii.
19 Halli kei'n lairalak chungnga chuon-inlak
khat-um nuoipil chung nuoiya chuon-inlak jetnasik;
tichu, thisen, mei, khat-um meikhulom kamasuoksik eii.
20 Akalok khat-um akapoi Pumi Nikhuo ajuomaklai,
kani kha alaziingsik eii,
tha kha thisenna ala-uolsik eii.
21 Halli tu e-innum Pumi raming kakoi rakip ngaikha asan minringsik eii.
22 “E Israel mi ngai, hiwa chong ngaihi rangairu!” Pathian in Nazareth Jisu diang chuon-inlak khat-um ngaksik kaom ngaikha nangni karra imintho khan amahi Pathian izoot mi eii ti nangni ningpumtak innum ningjetjei. 23 Jisu kha Pathian malungnga ingaidon khat-um matiangnga ijet dungjuiya anapeli khan, nangni'n manukaroon mi ngai kut chungnga ama kha cross ah ningmakhaiya ningthatjei.
24 Takkha Pathian in amakha kathiya inphut aminringjei, thina poongraalna ah inphut amasuojei; ajarchu ama thina khan akhum matorsik emak. Matt 28:5,6; Luk 24:5
25 Ajarchu David in ama jarra hin ati,
Kei'n Pumi kha apha rakip ah kama-ah kamuchak;
Ama kha kachangtiang aom, khawa jarra kei iteii poongna neinuning. Minpkla 16:8-11
26 Khawajarra kei kamalung atai,
kachongril karok in asip.
Halli Kei, kathi inmangthei ka-e-innum,
hiwakheella ka-inngamna khan kei soong kamachumsik eii,
27 ajarchu keihi nang in thina nuoipilchung hin namasuonutin;
nang in nasuok malungkaluutpa kha poongna minmunutin.
28 Nang in keidiang ringna lamkha nanaminmu jei,
halli nana-ompuina jarra keihi karok in anaminsipsik eii.
29 “Kasappui ngai, nipu Reng David jarra inthiang tak ah kirilzoot khachu, ama athiya inphuumjei, takkha ama thaankha wini katung eini karra alaom.” 30 Ama Pathian chongkachoi inkhat alei eii, David phung suungnga Reng David ka-ang inkhat Reng kaminchang sik eii tia Pathian in ama diangnga chong-inkhitna ipekha aleijet. 31 David in hiwahi matiang aleimua Messiah hongringna jarra arilsuok jei,
Amahi thina nuoipilchung hin kalekjuonmu;
apumkha thaan suungnga inmangnuni.
32 Jisu hi Pathian in thiya inphut aminringjei, halli hiwa kasuok rakip jarra eini sakhi ni eii. 33 Khawa jarra ama Pathian changtiang kadomsaangnga omjei, halli Apa chong-inkhitnasa Ratha Inthiang kha aralaangjei, nangni'n tuunna ningmu ningjet ngaihi eii ama kutchoipeii kinchungnga inape kha. 34 Ajarchu David marwaan kakal emak; takkha ama'n aleiti,
Pumi khan Kapumi diang aleiti,
kachangtiang hin in-ongro
35 Kei'n ninhalpui ngaikha naketouna nuoiya kada maklaiseng.
36 “Khawa jarra Israel miring rakip in, cross ah ningthat Jisu hi Pathian in Pumi khat-um Christa anamin-epijei tihi inthiangnga jetrasu!”
37 Mi-ngai khan hiwa chong injetpha, inmani malung kha kaseiya insun angjei, halli Peter khat-um aleiilak tirton ngaidiang, “Ule-nai ngai, angme keini'n kithosik?” inheiti.
38 Peter in inmani diang aleiti, “Ningmanu ngaikha ngaidamnasik Jisu Christa ramingnga nangni rakip in ningmalung thuulru halli Baptize thoru. Halli nangni'n Ratha inthiang kutchoi kha ralaang ningte. 39 Ajarchu Pathian chong-inkhitna hi, nangni le ningsa ngaisik khat-um eini Pumi Pathian in alakoisik akalaak ah kaom rakipsik eii.”
40 Peter in chong katamtak arilla inmani diang amasok ah ati, “Hiwa tuunna kathamak khangnga inphut nangni ningtheinuo ah intanru!” 41 Inmani katamtak in achongril kha inngamna ah baptize inthojei, halli khawani khan miring lising inthum daam inmani diang inleiluut. 42 Inmani'n tirton ngai diangnga inphut ininchuna khan inpha inminluut ah, ininchunna, baknale nina khan chan inleinei suomjei.
Kangamna ngai karra ringkhuo
43 Tirton ngaikhan chuon-inlak khat-um ngak kaom katamtak inleitho, halli mi rakip chungnga akachi khan aleisip.
44 Halli kangamna rakip in ininchunna, inphur rakip mipuita inmin-eya inleineiman. Chuon 4:32-35
45 Inmani inneinaak khat-um inphur ngaikha injuorra inraya ah sial kha ama-ama neimanna kahunsik dungjuiya inlei-insem. 46 Inmani'n nisuo rakip Biak-inn khan malung khatbit ah ininchunna, in-inn in-inna karokle malung inthiangnga bubakna inleineisuom, 47 Inmani'n Pathian inminpaak, halli miring rakip diangnga rawaan kha inrokpui, halli Pumi'n ringna kamu ngaikha nisuo ah inmani karra aleiminchunjei.