TIMOTHY
Diang Paul Inni Huuina Chemajia
Chonglamsaat
Hiwa 2 Timothy larik hi Tirton Paul in ama siamruoi Timothy diangnga woini huuina chemajia eii. 2 Timothy hi Paul ringkhuo juohek sik tiangnga imajia eii. Hiwa phatak hin ama kha Rome mikhumna khan aleiom (2 Tim 1:16). Paul Timothy le innaitheiya inlei-inlop halli apha rakip-ah ama kha asapa angnga aleilei (Phil 2:22, 1 Tim 1:2, 1:18).
Hiwahi Paul in koisuok rathuulla miring inkhat diangnga imajia chemajia mili karra inkhat kha eii. Khawa chemajia aleiilak inthum ngai khachu 1 Timothy, Titus, halli Philemon hi eii.
2 Timothy hi amajia pha Rome Reng in Christian ngaikha inleiminpoong. Hiwahin ajar eya Paul hi mikhumna ah ileiom lei-echa halli Timothy diang kapoong-karaal deinasik aleiminchu. 1 Timothy angnga Paul in Timothy diang akatuunmak ocha ngai jarra chong katamtak aleipeii (1 Tim 1:16-18). Halli ama innum Timothy diang nahong-intongpui sik intakthei pha ngaikha alaheiwasik eii tia aleirilpi (3:1).
Asuungnga kaom Chong
1. Paul in Timothy minpaak-ah chemajia phutna anei (1:1-2)
2. Halli ama malung leimasokpi. (1:3-18)
3. Ama'n Timothy diang deiraat nasik amasok. (2:1-13)
4. Ama'n Timothy diang arei ka-e minchuna lekkhat aleipeii. (2:14-26)
5. Ama'n nuktiangnga kasuoksik jar halli katuun lamma masangnasik amadiang chong leipeii. (3:1–4:8)
6. Paul apumtak in Timothy jarra lekkhat arilli aminhek. (4:9-22)
1
1 Pathian lungdou dungjuiya Christa Jisu tirton Paul in Christa Jisu le inruoiya inchunna suungnga eini'n nimu ringna chong-inkhitna kha rilthang nasik,
2 Minriang kaom kasapa Timothy nang nadiang kiheimathuon eii:
Pa Pathian le eini Pumi Christa Jisu khan riangwai, minriang khat-um akadai kha nape rase. Chuon 16:1
Minpaakna le Masokna
3 Kapi kapu ngai'n inleitho angnga, inthiangnga kase katha jetnale inruoiya kei'n asepa kitho Pathian kha kaminpaak. Halli suun li zaanna kei'n Pathian kanina rakip ah nang kanangaidonna ama kha kei'n kaminpaak. 4 Namit rathi suok ka-ngaidonna, kei karokna pui tungtheinasik, nangkha kana-inmupuizoot.
5 Napi Lois li nanu Eunice innum inngamna innei angnga na-inngamna inthiang ka-ngaidonna. Khawa kha nang nadiang-um aom ti kei'n ka-inngamna. Chuon 16:1
6 Hiwa sik-ah nachungnga kei'n kakut kadapha Pathian nape kutchoi kha karingnga nada theinasik kei'n nangkha kanamin-ngaidon eii. 7 Ajarchu Pathian in einidiang akachi Ratha kha napemak; khawa rathuulla ama Ratha khan eini nasip-ah ranak, minriang khat-um nipum-insurtheina kha anapejei.
8 Eini Nipumi jarra sakhi kapesik injak mui; halli Christa sik surra innada keisik um injak maru. Khawa neek-ah Chong Kathasik jarra ranak ngarna Pathian in inape angnga poongna suungkhan tum kha leiru. 9 Eini ngai'n akatha nitho jarra emak. Takkha amatak lungdou khat-um minriangna jarra, ami naminchang nasik-ah, Christa Jisu diang nuoipil inbool makma anakoiya anasanring jei. 10 Takkha tuunchu eini Kanasanring Christa Jisu ajuo jarra einidiang namalarpijei. Ama'n thina ranak aminmangnga, halli chongkahoi jarra akathi kaommak ringkhuo kha amalarjei
11 Chong Katha karil inthangsik, tirton khat-um ocha inkhat angnga Pathian in kei anakadangjei, 1 Tim 2:7
12 hiwa ngaisik jarra kei'n poongraal kidei eii. Takkha hiwa sik-ah kei injakmong, ajarchu ki-ngamna ama kha kei'n kajet; halli ama'n kei diangnga inape nikhuo aheitung maklaiseng ama'n keihi karingnga nada matorte ti kei'n katha tak-ah kajet. 13 Christa Jisu le inruoiya eini ni-inchunna ka-e inngamna khat-um inriangna khan om chak-ah juinasik, nang sik-ah minkhina kei'n kinaminchu akatuun chong ngaikha kacheet ah mahuumro. 14 Nang nadiangnga inapeii akatha ngaikha eini suungnga karingnga kaom Ratha Inthiang ranak jarra indatharo.
15 Phygelus li Hermogenes inchella, Asia ramma kaom mi rakip kei innamathaan jei, tikha nangni'n ningjet. 16 Onesiphorus innsuungnga Pumi riangwai kha omrase, Ajarchu ama'n apha angjet malung hoina anapeya kei mikhumna ah kiom kha ama lei-injakmak, 17 takkha ama Rome heitungli heitungmak anamu maklaiseng anaheiratok. 18 Pumi'n ariangwai kha ama chungnga khawa Nikhuo khan perase! Halli Ephesus ah ama'n keisik angtuk katam ithome tikha nang in katha tak-ah najet.