THESSALONIA
Mi-ngaidiang Paul Inni Huuina Chemajia
Chonglamsaat
2 Thessalonia hi tirton paul in imajia eii (1:1). 1 Thessalonia amajiasuo nuk-ah apha sootlek leiya Paul in 2 Thessalonia hi Jisu Christa inneisuo kum soomra-nga leikhat pheiweiya imajia eii. Hiwa larik amajia phahin Paul hi Corinth khan alaleiom. Hiwa larik hi Paul in woini huuina Pathian chuonkatho (missionary) asina lamma iphun Thessalonica koisuok diang imajia eii (Chuon 17:1-10). Tirton ngai Chuontho larik khan hiwa koisuok hi Jihudi lekkhat li Greek mi katamtak inchunliya inbool koisuok eii tiya aril.
Thessalonia koisuok mi ngai'n aheknasi nikhuo khat-um Christa juokirnasik jarra inthiarra inleijetzoot jarra Paul in 1 Thessalonia khat-um 2 Thessalonia larik hin hiwa jarra katamkhat amajia. 2 Thessalonia larik hin katamkhat chu ahekna nikhuo jarra Paul in tam amajia. Tirton Paul in hiwa larik hin akadool kha emaru takkha mi rakip in inwon sipnasik chuon kathokha eru tia chongthakna um anei (3:6-10).
Asuungnga kaom Chong
1. Paul apumtak khat-um achuon thopui mi ngaikha malarna anei (1:1-2)
2. Hiwa thengli Paul in Thessalonica koisuok ngaikha Pathian diang aminpaak halli Pathian diang nipina anei (1:3-12)
3. Paul in ahekna nikhuo jarra rilna anei (2:1-17)
4. Paul in akadool emaru takkha chuon kangar eru tiya rilna anei (3:1-15)
5. Insuona Chong (3:16-18)
1
1 Paul, Silas khat-um Timothy,
Thessalonica ah kaom nipa Pathian khat-um Pumi Jisu Christa mi ka-eii koisuok ngaidiang: Chuon 17:1
2 Nipa Pathian khat-um Pumi Jisu Christa diangnga inphut nangni chungnga riangwai khat-um kahoi kadai kha omrase.
Christa Juoni Chongtan
3 Ule naingai, eini'n apha rakip-ah nangnisik bit-ah Pathian niminpaaksik eii. Ajarchu hiwahi eini'n thosik-ah rahoi suok, ajarchu nangni ngamna kha hong-insoon halli nangni rakip in inkhatli inkhat ning-inriang kha-um ahonglok. 4 Khawa jarra keini kinpum tak-in Pathian koisuokngai diang nangni jarra in-orna kinnei. Nangni'n ningtongpui poongraalna rakip-ah ningdei khat-um ngamna ningcheet jarra um in-orna kinnei.
5 Hiwa rakip ngai'n Pathian chongtan khachu adik tia amalar, nangni'n ningpoong khan ajar-eya Pathian rengram sik-ah nangni rahoi ning-eii. 6 Pathian chu akadik kha eii: nangni kanaminpoong ngaikha ama'n aminpoongsik eii, 7 halli ama'n keini poongna khat-um nangni poongna kha anakhaipisik eii. Hiwahi ama'n Pumi Jisu kha marwaan makheiya ranak kangar ama marwaan tirton ngaikha mei machuon le inruoiya ajuoni khan, 8 Pathian kajetmak khat-um Pumi Jisu chongkahoi kajuimak mi ngai khachu ama'n mei le inruoiya arachaak sik eii.
9 Inmani khachu Pumi makheiya inlaak khat-um ama lurna lianna ranak makheiya inlaak kumsoot mangna kha inmusik eii, Isa 2:10
10 ama mi rakip diang lurna lianna khat-um ama ka-ngamna rakip diang khoya kaleisik-ah ajuo Nikhuo nikhan, nangni um inmani karra ning-inchelsik eii ajarchu nangnidiang kinril chongpui kha nangni'n ngamna ningneijei.
11 Khawa jarra keini'n nangni sik-ah inchat lekleiya Pathian diang kinni. Pathian nakoina ringkhuo khan nangni'n rahoi ka-eya ningring matornasik keini'n Pathian diang kinnanipi. Nangni i-ngaidon akatha rakip khat-um nangni ngamna kaom chuon ngaikha ama ranak khan huui namintungpi erase. 12 Hinthoa Eini Pumi Jisu raming kha nangni diangnga inphut lurna lianna kha amusik eii, halli eini Pathian khat-um Pumi Jisu Christa riangwai jarra inphut nangni'n lurna lianna kha amadiang makheiya ningmusik eii.