1 Тиверий кесарьа уԓәм ветхŏщйаӈмет тӑԓән, хун Понтий Пилат Иудея мўв ԓŏватән кущайа уԓмаԓән, Ирод ики пӑ Галилея мўвән, ԓўв Филипп йайәԓ Итурея, Трахонитида мўвән, Лисаний ики Авилиней мўвән, ԋӑԓмет мўв щуӈ кущайәта уԓмеԓән,

2 Турма йир верты хŏйатәт ŏх икеӈән Анна пӑ Каиаф уԓәм пŏрайән Иоанна, Захария пŏха, хӑр пӑ таԓ мўвән Турәм айкеԓ йŏхтәс.

3 Щи йўпийән ԓўв Иордан йŏxан ԉэпән уԓты мўв ԓŏватән йӑӈхәс пӑ щи вер эԓты сыйәӈа пŏтәртәс: йиӈка ԓŏӈәԓтыты вер верты урәӈән, кӑрэк эԓты шӑшән керԓәты мосәԓ, щиты Турәмән кӑрэк йŏрэмәԓа.

4 Xŏты Турәм йасәӈ туты ики Исаия йасӈәӈ нэпекән хӑшман уԓԓа:

"Таԓ мўвән такан ўвты xу тўр сый:

Турәм Кущайа йуш ԓэщататы,

йуш хурийэт Ԓўв урӈәԓа тўӈа вераԓән!

5 Кашәӈ мўв лот тэԓәӈа ат йиԓ, кашәӈ кев пай, кашәӈ сӑӈхәм ԓэԓа ат йиԓәт.

Мўвеӈ йушәт тўӈа ат йиԓәт, хŏмалэӈ йушәт пайԓы ат йиԓәт;

6 пӑ кашәӈ хŏйат Турәм ԓыԓ этәԓтәты щир шийаԓәԓ".

7 Иоанн, ԓўв эԓтайәԓ йиӈка ԓŏӈәԓтыты урәӈән йŏхтыԓыйәм ар хŏйата щиты пŏтәртәс: ”Ŏхты вой эԓты тыйәм ŏтәт! Хŏйән нын нŏмәсән мӑсайты, йиты ԉик эԓты хŏнтаты?

8 Кӑрэк эԓты шӑшән керԓәм щирән йӑм верԓәнән аԉаԓән, xŏты йўx йӑм ԓэвпәс энмәԓтԓәԓ. Аԓ тӑйаты тӑмәщ нŏмәс, йастыман: "Мўӈ ащев – Авраам!" Нынана йастәԓәм, Турәм тӑм кев шўкәт эԓты Авраама ԋаврэмәт верты верәтәԓ.

9 Тӑм мўй, йўх ԓэрәт пўӈәԓән ԓайәм пŏнман уԓ, йӑм ԓэвпәс ӑт энмәԓтты йўх иԓ сэвәрԓа пӑ тўта вŏщкәԓа".

10 Мир иԋщәсәс: "Мўй щиӈәԋща мўӈева верты?"

11 Ԓўв щиты йŏхԓы йастәс: "Xŏй кӑт йэрнас тӑйәԓ ки, и йэрнасәԓ ӑт тӑйты хŏйата ат мӑԓԓы, хŏй ԓэтәт тӑйәԓ ки, ищиты ат верәԓ".

12 Налог ӑкәтты йохәт ԓўв хŏщайәԓа йиӈка ԓŏӈәԓтыты урәӈән йŏхәтсәт, ԓўв эԓтэԓ иԋщәссәт: "Утәԓтәты ху, мўӈева мўй верты?"

13 Иоанн ԓывиԓаԓа йастәс: "Xŏйатәт эԓты мŏрт тўмпи ар аԓ вохаты".

14 Соԓтан йох ищи иԋщәссәт: "Мўӈева пӑ мўй верты?" Пӑ ԓывиԓаԓа йастәс: "Нэмәԓты хŏйат ŏх урәӈән аԓ шукататы, ԋаԓәм аԓ вераты, пӑ тыԓәщ ŏхԓәнән тӑрматыйаты".

15 Хун хŏйатәт ԓавԓәсман усәт, пӑ хŏԓыйэ Иоанн эԓты нумәссәт, ԓўв а мўй Христос, -

16 Иоанн ԓывиԓаԓа йастәс: "Ма нынан йиӈка ԓŏӈәԓтыԓԓам, туп ма киԋщайэм Йурәӈ Ŏт йŏxәтәԓ. Мӑнэм хŏԓна Ԓўв кўр ԓумтәм пушәх кеԓәԓ нŏх эхты йэм, ӑт рӑхәԓ; Ԓўв нынан Йэмәӈ Ԓыԓа пӑ тўта ԓŏнәԓтты питԓәԓы.

17 Ԓўв сӑрәԓ йошәԓән уԓ, ԓат сэм ӑктәм тӑxайәԓ сыстапԓәԓы, ԓат сэмәт ампарәԓа ӑкәтԓәԓы, сорәм тŏрнәт пӑ ӑт xурԓәты тўтән нŏх ўщәтԓәԓы".

18 Иоанн Йӑм айкеԓ эԓты пŏтәртмаԓән, ар па хŏрпи щирән хŏйатәт утәԓтәсԓы.

19 Ԓўв Ирод, ԋӑԓмет мўв щуӈ куща ики, йайәԓ ими, Иродиада, нэӈа тўвмаԓ урәӈән пӑ па атәм верәт вермаԓ урәӈән, нўрыты питсәԓы,

20 Ирод ики щиӈәԋща, верәм атәмԓаԓ хŏща и вер па пŏнәс, Иоанн касна хота омәссәԓы.

21 Хун хŏйатәт иса Иоаннән йиӈка ԓŏӈәԓтысайәт, Иисус ищи йиӈка ԓŏӈәԓтыса, йиӈка ԓŏӈәԓтыйәм йўпийән пойәкщәман ус: турәм хӑр пелки лоӈхиԓәс,

22 Йэмәӈ Ԓыԓ, голубь вой хŏрпийән, Ԓўв хŏщайәԓ иԓ эсԓәщәс, пӑ турәм эԓты тўр сый щащәс: "Нӑӈ – Ма Сӑмема Мосты Пŏхем, Ма йӑм кашэм Нӑӈ хŏщайэнән уԓ!"

23 Иисус верәт верты питмаԓән хŏԉмаӈ тӑԓ кема йўвман ус; хŏйатәт нумәссәт Ԓўв Иосиф пŏх, щишән опращԓаԓ - Илий,

24 Матфат, Левий, Мелхий, Ианнай, Иосиф,

25 Маттафий, Амос, Наум, Еслим, Наггей,

26 Мааф, Маттафий, Семеи, Иосиф, Иуда,

27 Иоаннан, Рисай, Зоровавель, Салафиил, Нирий,

28 Мелхий, Аддий, Косам, Елмодам, Ир,

29 Иосий, Елиезер, Иорим, Матфат, Левий,

30 Симеон, Иуда, Иосиф, Ионан, Елиаким,

31 Мелеай, Маинан, Маттафай, Нафан, Давид,

32 Иессей, Овид, Вооз, Салмон, Наассон,

33 Аминадав, Арам, Есром, Фарес, Иуда,

34 Иаков, Исаак, Авраам, Фара, Нахор,

35 Серух, Рагав, Фалек, Евер, Сала,

36 Каинан, Арфаксад, Сим, Ной, Ламех,

37 Мафусал, Енох, Иаред, Малелеил, Каинан,

38 Енос, Сиф, Адам, Турәм.