1 Иосиф пӑ Египта тўвман ус, ԓўвеԓ тўвәм измаил йŏх йош эԓты фараон шавиты йох кущайән, Потифар нэмпи кущайән, Египет мўв хуйән, ԓутса.

2 Турәм Куща Иосиф пиԓән ус: ԓўв верԓаԓ йӑма мӑтсәт пӑ Потифар, Египет мўв ху кущайәԓ хотән ус.

3 Кущайәԓән мŏштәса, Турәм Куща ԓўв пиԓәԓән уԓ, мўй ԓўв ӑт верәԓ, ԓўв верты верԓаԓән Турәм Куща ԋотәԓ.

4 Щиты Иосиф Потифарән ванән тӑйты питса пӑ ԓўв йŏра митхуйәԓа йис. Щӑԓта ԓўвеԓ хотәԓ кущайа пŏтсәԓы пӑ мўй тӑйәс, иса ԓўв йошәԓа мӑсԓы.

5 Хот кущайа ԓўвеԓ пŏнмаԓ ўш эԓты пӑ иса тӑйәм ŏтәԓ ԓўв йошәԓа миймаԓ йўпийән, Иосиф урәӈән Египет мўв ху хот Турәм Куща йӑмән мӑсԓы, щишән, Турәм Куща йӑм ԓўв хотәԓән пӑ мўв хӑрәԓән тӑйәм ŏтәԓ хŏща иса ус.

6 Щишән, ԓўв, мўй тӑйәс, иса Иосиф йоша мӑсԓы, нэмәԓты эԓты ӑт нумәсәс, ԓўвеԓа йŏра ԓэтŏт верты тўмпийән.

Иосиф хŏрасәӈ пӑ ԓŏватәӈ ус.

7 Щишән, кущайәԓ ими Иосиф пеԓа ватты питәс пӑ йастәс: «Ма пиԓэмән уԓа».

8 Ԓўв пӑ ӑт кашащәс пӑ кущайәԓ ими пеԓа йастәс: «Тӑта щи, кущайэм мўй тӑйәԓ, ма йошема мӑсԓы, нэмәԓты эԓты ӑт нумәсәԓ;

9 тӑм хотән ма эԓтэм уншәк ŏт ӑнтом; тӑм хотән нӑӈ тўмпенән мӑнэма ӑт рӑхты вер ӑнтом, нӑӈ ԓўв имеԓ; мўй щирән ма щимәщ атәм вер верԓәм пӑ Турма кӑрэк верԓәм?»

10 Кашәӈ хӑтәԓ кўш нэ щиты Иосифа пŏтәртәс, Иосиф ӑт хуԓәнтәс ԓўв пиԓәԓән уԓты.

11 Имŏԓты хӑтәԓән ԓўв верәԓ сӑхат хота ԓŏӈәс, щита хотәӈ ŏтәт эԓты нэмәԓт хŏйат ӑнтом ус;

12 щи нэ ԓумтәм сŏхәԓ эԓты ԓўвеԓ катәԓсәԓы пӑ йастәс: «Ма пиԓэмән уԓа». Иосиф пӑ, сŏхәԓ ԓўв йошәԓән хӑйман, ким хухәԓмәс.

13 Нэ пӑ, щит кащаԓәмаԓ кемән, хун сŏхәԓ ԓўв йошәԓән хӑщәс пӑ Иосиф ким хухәԓмәс,

14 хотәӈ ŏтԓаԓ ўваԓсәԓы пӑ ԓывиԓаԓа щиты йастәс: «Вантаты, Потифар мўӈев еврей тўвмаԓ пӑ щитэн мўӈ хŏщайэв йŏвәртыйәԓ. Щи еврей ма хŏщайэм йŏхтәс, ма пиԓэмән уԓты ўтщийәс, ма пӑ сыйәӈ тўрән ўваԓтсәм;

15 ԓўв пӑ, хўԓтмәмаԓән, хŏты ма ўваԓтсәм, сŏхәԓ ма хŏщайэм хӑйсәԓы пӑ ким хухәԓмәс».

16 Щиты Потифар йŏхи йŏхәтты унты Иосиф сŏх щи нэ ԓўв хŏщайәԓ хӑйсәԓы.

17 Ԓўвеԓа ищи щи йасӈәт пŏтәртәс, йастәман: «Нӑӈ тўвәм еврей митхуйэн ма хŏщайэм йŏвәртыты йŏхтыԓыйәс;

18 хун ма ўвты питсәм, ԓўв сŏхәԓ ма хŏщайэм хӑйсәԓы пӑ ким хухәԓмәс».

19 Кущайәԓ имеԓ йасӈәт хуԓмаԓ йўпийән, хŏты ԓўв йастәс: «Щиты ма пиԓэмән нӑӈ митхуйэн верәс», ԓўв шек ԉикащәс;

20 щӑԓта кущайәԓән Иосиф касна хота омәсты партса, хŏта хон вера питәм ŏтәт усәт. Щита касна хотән ԓўв опсәс.

21 Турәм Куща Иосиф пиԓән ус, йӑм сэмән вантәс, щишән, касна хот куща ԓўв пеԓайәԓ ищи йӑм ус.

22 Касна хот куща щита опсәм вера питәм ŏтәт хŏԓ Иосиф йоша мӑсԓы, щишән, мўй ԓыв щита ӑт версәт, щи верәт хŏща ԓўв пӑ уна ус.

23 Касна хот куща Иосиф йошән тӑйты верәт эԓты нэмәԓты ӑт ԓэрамтәс, Турәм Куща Иосиф пиԓән ус, щишән мўй ԓўв верәс, Турәм Кущайән щи верәтән иса ԋотса.