1 Авраам пирщамәса пӑ тӑԓԓаԓ арәт усәт. Турәм Кущайән кашәӈ вер хŏща Авраам йӑмән мӑса.

2 Щӑԓта Авраам хотәԓән уԓты, ԓўв тӑйты хŏԓ мŏԓтыԓаԓ ԓэщатты, куща митхуйәԓа йастәс: «Ма пещем иԓпийа йошен пŏныԓыйи

3 пӑ Турәм Кущайән, опәԉ Турәмән пӑ мўв Турәмән, мӑнэма йасәӈ мийа, ханаан йох эвет эԓты, хŏйтат кўтән ма уԓԓәм, нӑӈ ма пŏхема нэ ӑт ўԓән,

4 пӑ ма мўвема, ма энмәм мўвема йӑхԓән пӑ Исаак пŏхема нэ щиԓта ўԓән».

5 Митхуйәԓ ԓўвеԓа йастәс: «Мосәӈ, тӑм мўва щи нэ ма пиԓэмән йиты ӑт кашащәԓ, мосәӈ, нӑӈ мўвена, хŏԓща нӑӈ этсән, пŏхен туты мосәԓ?»

6 Авраам ԓўвеԓа йастәс: «Ма эԓтэм пӑԓԓән ки, пŏхем тŏхи аԓ тўви;

7 Турәм Куща, ŏпәԉ Турәм, Хŏй ащем хот эԓты мӑнэм сэма питәм мўвем эԓты ўсԓы, пӑ Хŏй мӑнэм йасәӈ мӑс, пŏтәртман: ‘Йэԓԓы уԓты ԋаврэмԓана тӑм мўв мӑԓэм’, – Ԓўв ангеләԓ нӑӈ йэԓпенән китԓәԓы, пӑ нӑӈ пŏхема щиԓта нэ ўԓән;

8 нӑӈ пиԓэнән щи нэ йиты ӑт ки кашащәԓ, мӑнэма мийәм тӑм йасӈен эԓты нӑӈ веләк питԓән; туп пŏхем тŏхи аԓ тўви».

9 Авраам кущайәԓ пещ иԓпийа митхуйәԓ йошәԓ пŏтсәԓы пӑ ԓўвеԓа йасәӈ мӑс.

10 Кущайәԓ верблюдәт эԓты митхуйәԓ йаӈ верблюд ўс пӑ мӑнәс. Кущайәԓ эԓты ар сыр тынәӈ мойԓәпсайәт ԓўв пӑтән тӑйәс. Месопотамия мўва, Нахор уԓәм воша, ԓўв мӑнәс.

11 Йӑм хўв мӑнман, ԓўв йэтна пеԓа йик ўты мўв ўс пўӈәԓән, вош кимәԓән, верблюдԓаԓ иԓ ԓойәԓттәсԓы, щи пŏрайән, хун нэӈәт йик аԓтты йŏхтыԓыԓәт,

12 пӑ йастәс: «Турәм Куща, Авраам кущайэм Турәм! Тӑм хӑтәԓ эви ма йэщаԓтэм киты пӑ Авраам кущайэма щи ԓŏват йӑм этәԓта;

13 тӑта щи ма, йик ўты тӑхайән ԓойԓәм, пӑ вошәӈ хŏйатәт эвет йик ӑмәртты йŏхтыԓыԓәт;

14 и эви, хŏйа ма йастәԓәм: ‘Сŏхта пўтэн иԓшәк эсԓыйи, ма йик йищԓәм’, хŏй пӑ мӑнэма йастәԓ: ‘Йиԋща, ма нӑӈ верблюдԓана па йищты мӑԓәм’, – щи эви щи Нӑӈ Исаак митхуйэна Нӑӈ ԓэщатсэн; щиты ма мŏштәԓэм, Нӑӈ ма Авраам кущайэма щи ԓŏват йӑм этәԓтәсэн».

15 Ԓўв хŏԓна пойәкщәты ӑт йэтшәс, тӑта щи, сŏхта пўт ԓӑкра пŏнман Ревекка этәс, хŏй Вафуил эԓты сэма питәс, Вафуил щит Нахор пӑ Милка пŏх, Нахор пӑ Авраам апщи ус;

16 эви хŏрасәӈ ус, ху сайән ӑт уԓәм айԓат нэ. Ԓўв йик аԓтты тӑхайа ŏхԓәс, сŏхта пўтәԓ тэкәптәсԓы пӑ нŏхԓы шушәс.

17 Митху ԓўв йэщаԓтәԓ хухәԓмәс пӑ йастәс: «Сŏхта пўтэн эԓты мӑнэм йик йищты йэша мийа».

18 Ԓўв йастәс: «Йиԋща, кущайэм». Ищи мŏхты сŏхта пўтәԓ йоша иԓ эсәԓсәԓы пӑ ԓўвеԓ йищәԓтәсԓы.

19 Ԓўвеԓ йищәԓтәмаԓ йўпийән йастәс: «Верблюдԓан урәӈән йик ӑмәртты ищи верәтԓәм, мŏрта йищтэԓ унты».

20 Ищи мŏхты йиӈкәԓ сŏхта пўтәԓ эԓты хўрыйа шошәпсәԓы, щӑԓта пӑ йик ўты мўв ўс хŏща йик ӑмәртты хухәԓмәс, щиты хŏԓ ԓўв верблюдԓаԓ урәӈән йик ӑмәртәс.

21 Щи хŏйат мӑшйайән ԓўв пеԓайәԓ вантәс, шек такан нумәсәс, йӑна мўй Турәм Кущайән йŏхтәм йушәԓ йӑмән мӑса.

22 Хун верблюдәт йищты йэтшәсәт, щи хŏйат ԋŏԓән тӑйты сорԋэӈ ԓуйәт ўс, и сикль шуп ԓавәрт арат, пӑ кӑт сорԋэӈ йош сур кўсы, кашәӈ ŏт йаӈ сикль ԓавәрт арат, пӑ эвийа щитәт мӑсԓы;

23 пӑ йастәс: «Нӑӈ хŏй эви? Мӑнэм йаста, нӑӈ ащен хотән мўӈев хоԓты тӑха уԓ мўй?»

24 Ԓўв йастәс: «Ма Вафуил эви, ԓўв Нахор пӑ Милка пŏх».

25 Щӑԓта хŏԓна ԓўвеԓа йастәс: «Мўӈ хŏщайэв сорәм тŏрән пӑ вой ԓапәтты ԓат уԓ, хоԓты тӑха ищи уԓ».

26 Щи хŏйат, ŏх пŏнман, иԓ ԋўрәс пӑ Турәм Куща ишәксәԓы,

27 пӑ йастәс: «Турәм Кущайа ун ишәк йасәӈ, Авраам кущайэм Турма, Хŏй ма кущайэм Ԓўв йӑм верәԓән пӑ Ԓўв вещкатәԓән ӑт хӑйсәԓы! Турәм Куща тўӈ йушән кущайэм апщеԓ хота мӑнэм тусԓы».

28 Эви хухәԓмәс пӑ щит эԓты аԋԏэԓ хотән пŏтәртәс.

29 Ревекка Лаван нэмпи йай тӑйәс. Лаван йик ўты тӑхайа щи хŏйат хŏща хухәԓмәс.

30 Хун ԓўв ԋŏԓән тӑйты сорԋэӈ ԓуйәт пӑ йош сурән тӑйты кўсэт ԓўв апщеԓ хŏща кащаԓәс, пӑ Ревекка апщеԓ йасӈәт хуԓәс: «Щиты ма пиԓэмән тӑм хŏйат пŏтәртәс», ԓўв щи хŏйат хŏща йŏхтәс, пӑ тӑта щи, ԓўв верблюдәт пўӈәԓән йик ўты тӑхайән ԓойәԓ;

31 Лаван йастәс: «Турәм Кущайән йӑмән мийәм хŏйат, мўйа кӑмән ԓойԓән? Йŏхи ԓŏӈа, хот пӑ верблюдԓан ŏԓты тӑха ма ԓэщатсәм».

32 Щи хŏйат хота ԓоӈәс. Лаван верблюдәт эсәԓсәԓы пӑ сорәм тŏрәнән пӑ ԓатән мӑсԓы, пӑ щӑԓта, ԓўвеԓа пӑ ԓўв пиԓәԓән йŏхтәм хŏйатԓаԓа, кўрԓаԓ ԉŏхәтты йик тус;

33 пӑ пӑсан верса, туп ԓўв йастәс: «Верэм пŏтәрттэм унты ԓэты ӑт питԓәм». Пӑ йастәсәт: «Пŏтәрта».

34 Ԓўв йастәс: «Ма Авраам митху;

35 Турәм Куща ма кущайэм ар йӑмән мӑсԓы, пӑ ԓўв тащәӈа йис: ошәт пӑ хор мисәт, щел ŏх пӑ сорԋи, митйохәт пӑ митнэӈәт, верблюдәт пӑ осёл войәт Авраама Ԓўв мӑс;

36 кущайэм Сарра имеԓ, пирща йўвмаԓ йўпийән, кущайэма пŏх сэма пайтәс, пӑ Авраам кущайэм мўй тӑйәс, иса ԓўвеԓа мӑсԓы;

37 кущайэм ма эԓтэм йасәӈ ўс, йастәман: ‘Ханаан йох эвет эԓты, хŏйтат кўтән ма уԓԓәм, нӑӈ ма пŏхема нэ аԓ ўйа,

38 пӑ ащем хота пӑ рутԓам хŏща йӑӈха, пӑ пŏхема нэ щиԓта ўԓән’.

39 Кущайэма ма йастәсәм: ‘Мосәӈ, ма пиԓэмән нэ ӑт мӑнәԓ’.

40 Ԓўв мӑнэма йастәс: ‘Турәм Куща, Хŏй йэԓпийән ма уԓԓәм, Ԓўв ангеләԓ нӑӈ пиԓэнән китԓәԓы пӑ йушен йӑмән пӑртԓәԓы, пӑ рутԓам эԓты ащем хŏт эԓты пŏхема нэ ўԓән;

41 мӑнэма мийәм йасӈен эԓты нӑӈ веләк питԓән, хун рутԓам хŏща йӑхԓән; ԓыв нӑӈена нэ ӑт ки мӑԓәт, мийәм йасӈен эԓты веләк питԓән’.

42 Щӑԓта йик ўты тӑхайа ма тӑм хӑтәԓ йŏхәтсәм пӑ йастәсәм: ‘Турәм Куща, Авраам кущайэм Турәм! Нӑӈ ма мӑнты йушем йӑмән партԓэн ки,

43 тӑта щи, йик ўты тӑхайән ма ԓойԓәм, пӑ эви, хŏй йик ӑмәртты этәԓ, ԓўвеԓа ма йастәԓәм: ‘Сŏхта пўтэн эԓты мӑнэма йэша йищты мийа’,

44 хŏй пӑ мӑнэма йастәԓ: ‘Нӑӈ йиԋща, верблюдԓана йик ищи ӑмәртԓәм’, – щит щи нэ, хŏй Турәм Куща ма кущайэм пŏха ԓэщатсәԓы’.

45 Щи нŏпсэм хŏԓна пӑтэԓ унты ӑт тусэм, хун Ревекка этәс, пӑ сŏхта пўтәԓ ԓӑкрәԓән, йик ўты тӑхайа ŏхԓәс, йик ӑмәртәс; пӑ ма ԓўвеԓ йастәсәм: ‘Мӑнэма йик йищты мийа’.

46 Ԓўв ищи кумән сŏхта пўтәԓ иԓ эсәԓсәԓы пӑ йастәс: ‘Йиԋща, верблюдԓан ищи йищәԓтәԓԓам’. Пӑ ма йищсәм, верблюдԓам пӑ ԓўв йищәԓтәсԓы.

47 Ма ԓўвеԓ иԋщәссэм пӑ йастәсәм: ‘Нӑӈ хŏй эви?’ Ԓўв йастәс: ‘Вафуил эви, ԓўв Нахор пӑ Милка пŏх’. Щӑԓта ма ԓўвеԓ ԋŏԓән тӑйты сорԋэӈ ԓуйәт пӑ йош сур кўсэт йошӈиԓаԓа пŏтсәм.

48 Ма пӑ, ŏх пŏнман, иԓ ԋўрсәм пӑ Турәм Куща ишәксэм, пӑ Турәм Кущайа йӑм йасәӈ йастәсәм, Авраам кущайэм Турма, Хŏй тўӈ йуш хўват мӑнэм ты тусԓы, кущайэм апщи хиԓынэ ԓўв пŏхәԓа нэӈа ўты урәӈән.

49 Ин пӑ мӑнэма йастаты, ма кущайэма щи ԓŏват йӑм пӑ вещкат вер верты нŏмәс нын тӑйԓәты мўй ӑнта? Щит щи мӑнэма йастаты, мӑнэма йэԓԓы верәт тўӈащира верты урәӈән».

50 Лаван пӑ Вафуил йŏхԓы йастәстән: «Турәм Куща эԓты тӑм вер уԓ; мўӈ нӑӈена атәм пӑ йӑм йастәты ӑт верәтԓув;

51 тӑта щи, Ревекка нӑӈ йэԓпенән; ԓўвеԓ ўйи пӑ мӑна; Турәм Куща йастәм щирән, кущайэн пŏх имийа ԓўв ат питәԓ».

52 Авраам митху ԓын йасәӈԓән хуԓмаԓән, мўв унты, ŏх пŏнман, иԓ ԋўрәс пӑ Турәм Куща ишкәс.

53 Щӑԓта митху щел ŏх пӑ сорԋэӈ пŏрмасәт этәԓтәс, пӑ ԓумәтты сŏхәт, пӑ Ревеккайа мӑсԓы; йайәԓа пӑ аԋԏэԓа ищи тынәӈ мойԓәпсайәт мӑс.

54 Щӑԓта ԓўв пӑ ԓўв пиԓәԓән уԓәм хŏйатәт ԓэсәт, йищсәт пӑ хоԓсәт. Аԓәӈсӑхат нŏх киԓмеԓән, ԓўв йастәс: «Кущайэм хŏща мӑнэм эсԓаԓән».

55 Туп йайәԓ пӑ аԋԏэԓ йастәсӈән: «Эвев мўӈ пиԓэвән йаӈԓэм хӑтәԓ ат уԓ, щи йўпийән мӑнԓән».

56 Ԓўв пӑ ԓынана йастәс: «Мӑнэм аԓ рŏнаԓтаԓән, Турәм Куща ма йушем йӑмән партсәԓы; мӑнэм эсԓаԓән, кущайэм хŏща ма мӑнԓәм».

57 Ԓын йастәсӈән: «Эвемән вохԓэмән пӑ иԋщәсԓэмән, мўй ԓўв йастәԓ».

58 Ревекка вохсэԓән пӑ ԓўвеԓа йастәсӈән: «Тӑм хŏйат пиԓән мӑнԓән?» Ԓўв йастәс: «Мӑнԓәм».

59 Щӑԓта Ревекка, ԓыв апщеԓ, пӑ ԓўвеԓ эсәмән ԓаптәм ими, пӑ Авраам митху хŏйатԓаԓ пиԓән, Ханаан мўва китсәԓаԓ.

60 Ревеккайа Турәм эԓты йӑм вохсәт пӑ ԓўвеԓ йастәсәт:

61 Ревекка митнэԓаԓ пиԓән ԓойс, верблюдәт шӑнша омәссәт, пӑ щи хŏйат йўпийән мӑтсәт. Щиты митху Ревекка ўсԓы пӑ мӑнәс.

62 Исаак Беэр-лахай-рои эԓты йŏхтәс, ԓўв Негев морты мўвән ус.

63 Йэтна пеԓа Исаак тŏрнәӈ-лыптәӈ хӑра шушиԓыты мӑнәс, йэԓ ватман кащаԓәсԓы: верблюдәт йиԓәт.

64 Ревекка пӑ Исаак кащаԓәсԓы, пӑ верблюд эԓты иԓ ŏхԓәс.

65 Щӑԓта митхуйа йастәс: «Хŏй щи хŏйат, мўӈ йэщаԓтэв мўв хӑр хўват йиԓ?» Митху йастәс: «Щит ма кущайэм». Щи йасӈәт хуԓтмаԓ кемән, ԓўв ŏхшам ўс пӑ ŏха пŏтсәԓы, пӑ йэмәԓман венша иԓшәк эсәԓсәԓы.

66 Митху Исаак пеԓа иса, мўй ԓўв верәс, пŏтәртәс.

67 Исаак, Сарра аԋԏэԓ пирщин хота, эви ԓŏӈәԓсәԓы, Ревекка нэӈа ўсԓы, пӑ ԓўв имеԓа йис, сӑмәӈа тӑйты питсәԓы; щиты аԋԏэԓ пӑрәм йўпийән Исаак нŏпсәԓ ԓӑрпиԓәс.