1 Ўты пайтәсмеԓ йўпийән, Павел пиԓән уԓәм ŏтәт ŏша пайәтсэԓ, пухәр нэмәԓ Мальта.

2 Пухәрән шŏшийа уԓәм па сыр хŏйатәт мўӈева йӑм арат ԋотәп версәт. Йэрт пӑ ищки уԓәм пӑтыйән, ԓыв тўт пŏтсәт пӑ хŏԓыйэ мўӈев вана вохсәԓаԓ.

3 Хун пӑ Павел варәс аԓтэԓ ӑктәс пӑ тўта пŏныԓыйәс, ŏхты вой, тўт рўв эԓты хŏнтаман, ԓўв йошәԓа, пŏрэмәман, иԓԓы лўԋиты питәс.

4 Хун пухрәӈ хŏйатәт, Павел йош эԓты ŏхты вой иԓԓы лўԋиты шийаԓәсәт, ԓыв кўтԓаԓән пŏтәртты питсәт: «Уйәтман, тӑм хŏйат веԓтатты ŏт: ԓўв щарәс эԓты нŏх питәс, туп вещкат ԓух сўт ԓўвеԓ ԓыԓӈа уԓты ӑт хӑйԓәԓы».

5 Туп ԓўв, ŏхты вой тўта рӑԋкәмаԓ йўпийән, нэмәԓты атма ӑт хойәс.

6 Ԓыв ԓўвеԓ нŏх пўвԓәты мўй пӑ, шӑмкапан пӑрман, иԓ рӑкәнты ԓавәԓсэԓ; туп, хўв ԓавԓәсман пӑ ваттэԓән, нэмәԓт атәм сŏрта ӑт питәс, па щира нумәсты питсәт пӑ йастәԓәт, ԓўв иԓампа ԓух.

7 Щи тӑха ԉэпән Публий нэмпи пухәр куща хотәт усәт. Ԓўв мўӈев вана ўсԓы пӑ хуԓәм хӑтәԓ мойԓәптысув.

8 Публий ики ащи каврәма пӑ хŏнәԓ кӑшийа йўвман ŏԓтӑхайәԓән ŏԓәс. Павел ԓўв хŏщайәԓа ԓŏӈәс, пойәкщәс пӑ, ԓўв эԓтэԓ йошԓаԓ пŏнмаԓ кемән, ԓўвеԓ тўмтака версәԓы.

9 Тӑм вер йўпийән пухәрән уԓты, муш тӑйты па мŏхет йŏхтыԓысәт пӑ тўмтака верыԓысайәт,

10 ԓыв мўӈева ар йӑм вер версәт пӑ мӑнты питмевән мŏсты ŏтәтән мӑсайув.

11 Хуԓәм тыԓәщ хӑщәм йўпийән мўӈ Александрия эԓты уԓты, Диоскуры нэмпи паршәӈ хопән мӑтсув, щи пухәр хŏща тӑԓ хӑщәптәс,

12 щӑԓта Сиракузы воша йŏхәтмев йўпийән, щита хуԓәм хӑтәԓ усув.

13 Щиԓта мӑнмев йўпийән, Ригия воша йŏхәтсув. Йухәт хӑтәԓ нўм вот пŏԓты питәс пӑ кимет хӑтәԓән мўӈ Путеол воша йŏхәтсув,

14 хŏта хӑнам йохԓув уйәтсув, пӑ ԓыв хŏщайэԓ ԓапәт кем хӑтәԓ уԓты вохсайув, йухәт Рим воша мӑтсув.

15 Щита уԓәм хӑнам йох, мўӈ эԓтэв хуԓмеԓ кемән, мўӈ йэщаԓтэв Аппий вош хӑр лот пӑ Хуԓәм Хоԓты Хот унты этсәт. Павел ԓывиԓаԓ шийаԓәмаԓ кемән, Турма пумащипа йасӈәт йастәс пӑ нŏпсәԓ такамәс.

16 Хун пӑ мўӈ Рим воша йŏхәтсув, сот ԉаԉ йох куща йӑрәм ŏтәт ԉаԉ йох ун кущайа мӑсԓы, Павел пӑ атэԓ щира ԓўвеԓ ԓавәԓты и ԉаԉ ху пиԓән уԓты эсәԓса.

17 Хуԓәм хӑтәԓ хащәм кемән, Павел иудейәт эԓты ԓӑтәӈ йŏх йӑха вохсәԓы пӑ, хун ԓыв йӑха йŏхәтсәт, ԓывиԓаԓа пŏтәртәс: «Хӑнам йох! Мирэма мўй пӑ ащиԓув щирәта нэмәԓты атәм ӑт кўш версәм, ма йӑрман Иерусалим эԓты Рим мŏхета мӑсайәм.

18 Ԓыв, мӑнэм сўт вермеԓ йўпийән, эсәԓты ўтщисэԓ, ма хŏщайэм сŏрәм ԓӑта нэмәԓты нўр ӑнтом;

19 туп иудейәт йасәӈԓаԓ кӑтна мӑнман уԓԓәт, мӑнэм кесарь эԓты сўт вохты вера йис, туп ӑнтом ма мирэм мŏԓты хŏща нўрәӈа верты урәӈән.

20 Щи пӑтыйән ма нынан вохсәԓам, уйтантыты пӑ нын пиԓәнән пŏтрэмәты урәӈән, Израиль нŏмәс йэԓ пŏнты урәӈән, ма тӑмиты йӑрсайәм».

21 Ԓыв пӑ ԓўвеԓа йастәсәт: «Мўӈ нӑӈ эԓтэн ӑнта нэпек Иудея мўв эԓты йоша ўйԓысув, ӑнта йŏхтыԓыты хӑнам йохәт эԓты нэмәԓты хŏйат нӑӈ эԓтэн айкеԓ ӑт китыԓыйәс пӑ мŏԓты атәм йасәӈ ӑт йастыԓыйәс.

22 Туп мўӈева нӑӈ эԓтэн хуԓты мосәԓ, хŏты нӑӈ нумәсԓән. Мўӈ уйәтԓэв, тӑм утәԓтәты вер эԓты кашәӈ тӑхайән ўра ворԓәт».

23 Щӑԓта, ԓўвеԓа аԉәм хӑтәԓән, йӑм ар хŏйат ԓўв хŏщайәԓ хоԓты хотәԓа йŏхтәс; пӑ ԓўв аԓәӈсӑхат эԓты йэтән унты ԓывиԓаԓа Турәм Хон Уԓәпса эԓты пŏтәртәс. Вантәм верәт этәԓтыйәс пӑ ԓывиԓаԓ эвԓәптәман, Моисей Закон пӑ Турәм айкеԓ туты хŏйатәт нэпекәт эԓты ўйман, Иисус эԓты пŏтәртәс.

24 Тухԓәт ԓўв эвԓәптәсԓы, па ŏтәт пӑ ӑт эвәԓсәт.

25 Кўтԓаԓән ўра ворты питсәт, пӑ хун ԓыв мӑнты питсәт, Павел щимәщ йасӈәт йастәс: «Йэмәӈ Ԓыԓ Турәм айкеԓ туты хŏйат Исаия сӑхат мўӈ ащиԓува йӑма йастәс:

26 'Тӑм мир хŏща мӑна пӑ йасты: пӑԓԓәнән хуԓԓәԓән пӑ ӑт мŏштәԓԓән, пӑ сэмԓәнән ватты питԓәты пӑ ӑт шийаԓәԓԓән.

27 Тӑм мŏхет сӑм вŏйән лӑп таԓса, пӑ пӑԓԓаԓән ўрайән хуԓԓәт, пӑ сэмԓаԓ лап хӑтщәсԓаԓ, сэмән ӑт шийаԓәты щира, пӑ пӑԓԓаԓән ӑт хуԓты щира, пӑ сӑмԓаԓән ӑт мŏштәты щира, пӑ Ма пеԓайэм ӑт керԓәты щира, Ма ԓывиԓаԓ тўмтака ӑт ат версәԓам'.

28 Щиӈәԋща, нынана ԓэр ат питәԓ, Турәм нŏх пайәтты щир па рут мира китса: ԓыв щи хуԓԓэԓ».

29 Хун ԓўв тӑм йастәс, иудей йох, ԓыв кўтэԓән такан ўра ворман, мӑтсәт.

30 Щӑԓта Павел тӑԓаӈ кӑт тӑԓ сŏхәптәм хотәԓән ус пӑ хŏй ԓўв хŏщайәԓ йŏхтыԓыйәс, хŏԓ вана ўйԓысԓы,

31 ԓўв, ӑт пӑԓман пӑ ӑт йэртԓыман, Турәм Хон Уԓәпса эԓты пŏтәртәс пӑ Турәм Куща Иисус Христос эԓты утәԓтәс.